ئمشـــەو – مامەد جواد جەلیلیان

 

به‌رق چاوه‌یل کاود وه‌شکیاسه‌ گیانم ئمشه‌و

زه‌نجیر زوڵف هۊلد زڕیاسه‌ گیانم ئمشه‌و

نازار چاو که‌ژاڵم! نه‌یری خه‌وه‌ر له‌ هاڵم

هه‌رچێ خه‌موو په‌ژاره‌س وه‌ر ناسه‌ گیانم ئمشه‌و

به‌و سه‌ر بێیه‌لیم شاوێ تر قامه‌ت ره‌نگین ده‌م خڕ!

بــێ ت که‌لاوه‌ێ ئاگـــر رمیاسه‌‌ گیانم ئمشه‌و

چه‌ن ساڵ ئازگاره‌ دڵ سه‌ردوو بێ قه‌راره‌ ؛

ئـه‌ێ بــاخ بــێ وهـــاره‌ شکیاســه‌ گیانم ئمشه‌و

م خاک وشکه‌زاران ت ئاور پڕ له‌ واران

زه‌خمـه‌یل ئشــق جـاران کـولیاسه‌ گیانم ئمشه‌و

داخ دڵــم نیه‌زانی  داخم له‌ بێ زوانی !

داره‌یــل دڵ گـــرانی پــه‌ل داســه‌ گیانم ئمشه‌و