شه‌هرام ئه‌کبه‌ری
بێگومان چه‌وچه له ناوچه‌ێ خوه‌مان جی خوه‌ێ له فه‌رهه‌نگ و زووانمان کردێیه‌سه‌و وتۊیه‌نیم بۊشیم به‌ش فره گه‌وراێگه له فولکلۆر ناوچه‌یل کوردەواری . له وه‌ت و وێژ ڕووژانه‌مان وه‌ل یه‌کا فره له‌ێ چه‌وچه‌یله دۊنیمن. یه‌کێگ له‌ێ چه‌وچه‌یله توام شیه‌و بکه‌م ک له کووا تیه‌ێد: که‌ێوانووێگ له ته‌نیا ماڵێگ له دۊر شارژییا. که‌ێوانوو کوڕێگ و وه‌ۊێگ داشت ناو وه‌ۊه‌گه‌ێ یاسمەن بۊ وه‌لێ وه پێ یاسی وه‌تن .که‌ێوانووه‌گه فره کار کرد له شه‌وه‌کی تا ئێواره ئه‌و زه‌ۊ نه‌نیشت.له ئقباڵ گه‌ن که‌ێوانووه‌گه وه‌ۊه‌گه‌ێ فره چڵێسۊ و هرچێ ماس و دوو و رۊن داشت وه دزیه‌و چنگێ کرده‌پێیا جوورێگ بۊ ک وه‌ختێگ تواسن وه ده‌ور یه‌که‌و نان بخوه‌ن که‌ێوانوو دی کوتیگ له ماسه‌گه خوریاس. که‌ێوانوو وه‌ل خوه‌ێیا فکر کرد وه‌ت هاتێ کوڕه‌م ماسه‌گه خواردۊد جارێگ تر وه‌ت نه کوڕه‌م چڵێس نییه، یه شوون یاسییه م خوو زانم ئه‌ۊ فره نه‌وسنه. هه‌ر کارێگ کرد بتۊیه‌نێد مچ یاسی بگرێد نه‌تۊیه‌نس. یه‌ێ رووژ کاسه ماسه‌گه له ده‌س یاسی برد له ناو ئه‌نباره‌گه‌ێیان هشار کرد تا دی نه‌خوریه‌ێد.که‌ێوانوو خوه‌ێ دزیه‌و و چێ ماسه‌گه بشارێده‌و. کاسه ماسه‌گه ناێه‌ێ بان تاقچه‌ێ ناو ئه‌نباره‌گەوە تا دی ده‌س وه‌ۊه‌گه‌ێ وه پێ نه‌ڕه‌سێد له دۊیاێ ئه‌وه قه‌ێر فره‌ێگ ئارد پشانه بن ئه‌نباره‌گه‌وا تا شوون پاێ بکه‌فێد. که‌ێوانوو هاتەو دیشت و چێ وه ژیان ڕووژانه‌ێ خوه‌ێ ڕه‌سی . یاسی له شون که‌وانوو چێ، زانس چیشتێگ برد هشار کرد ڕه‌سیه دره‌گه‌و دی بن ئه‌نباره‌گه له وه‌یشت ئارد وه ده‌ره‌و نییه چه‌نه سوو ده‌رزێگ له زه‌ۊ دیار نیه چه‌وێگ گل دا دی کاسه ماسه‌گه ها بان تاقه‌گه‌وا ، یاسی وه‌ل خوه‌ێیا وه‌ت چۊ بچم له ماسه‌گه بخوه‌م ده‌سمی وه پێ نیه‌ڕه‌سێد فره به‌رزه ئه‌گه‌ریش بچم شوون پام بکه‌فێد زانێد م ماسه‌گه خواردمه. که‌ێوانوه‌گه خه‌رێگ داشت یاسی چێ هاورده‌ێ و چێه‌و کووڵێ هه وه‌و جووره چیه‌و ناو چنگ کرده ماسه‌گه‌ێیا وتێره‌لێ خوارد و ده‌رچێ. شه‌وا گ هات که‌ێوانوو هاته‌و سه‌ر ماسه‌گه بزانێد چوه وه سه‌رێ هاتێه دی شوون سم خه‌ره‌گه که‌فتێه ، چیه‌و سه‌ر کاسه ماسه‌گه دی شوون چنگ ئاێه‌مێگه ک له ماسه‌گه خواردێیه،که‌ێوانوو له‌ێ کاره سه‌رێ سڕ مه‌ن . وه هه‌ڵه‌پڵه کاسه‌گه هاورد ئڕا لاێ کوڕه‌ێوو وه‌ۊه‌گه‌ێ و وه‌ت ” سه‌رم سڕ مه‌نێیه له‌ێ کاسه و ماسه * سم سم خه‌ره‌و چنگ چنگ یاسه “
