کام ئاسمان؟
کام زەۊ؟
م له داڵه گیژان هسارەیل
له لافاو مەنزومەێ شەمسی
له مەدار نەزانسن
هناێ دارێ له ئڕایل بێ جوواو
له زەێنما جیق دەن و
له دەروەچەیل گیانم
چەوم ،گووشم و دەمم
پەلەو دەن
گوم بۊمه
کام دڵ تەنگی ؟
کام خەو؟
م له هزارەێ دۊرەیل نزیک و نزیکەیل دۊر
هناێ ئاسمان دووارێ
له ئەقڵ ئاێەمەیل پووشێ
بۊمەسە کوومڕکیش خێیالەیل جاران و
له سێدارەێ دڵ تەنگی و
دڵه‌ڕپه و دڵداری وه دارا کیشیەم
کام روژ؟
کام شەو؟
م له دنیای دمکراسی توپ و تفەنگ
روژن بیری ئەتوم و شیمیایی
له خوانچەێ
گوله و گیوتین
منەی نان ئڕاێ
ورسێیەیل وڵاتەیل ورسێ گەردم
کام ئاێەم ؟
کام تەو ؟
هناێ نرخ نان
تک تکیانه و !!
ماناێ دمکراسی
گردن و وێران کردن!!
حقوق بەشەر
قۊخای دنیا کردن!!
ئازادی
کوشتن !!
کام وڵات؟
کام قەوم؟
م کی‌ێم؟؟
ت کیید؟؟
دنیا ها کوو؟؟
ئڕاێ کوو چوود …؟؟
