هسارە : بازی کوردی به‌شێگه له فه‌رهه‌نگ کورد بێگومان هه‌ر کوومه‌ڵگاێگ له دنیا له به‌ش بازی کردن مناڵه‌یل ئڕا خوه‌ێ قسیه‌یلێگ دێرێد. وڵات کوردستان وه تایبه‌ت ناوچه‌ێ که‌ڵهۆڕ له به‌ش بازی کردن خاون بازیه‌یل فرەێگه وه تۊیه‌نیم بۊشیم ناوچه‌ێگ ده‌وڵه‌مه‌نه له ئه‌ێ بابه‌ته.له نیشتمان کوردستان بازیه‌یلێگ کریه‌ێد زوورم وه سه‌ردی و گه‌رمی ناوچه یا ده‌یشته بۊین یا کۊیه و که‌ش بۊن ئه‌و وڵاته‌گ کورد له ناوێ مه‌زریاس خریه‌ێده‌و ڕێ. بازیه‌یل کوردی له ناو مێژوو و دڵ تاریخ کوردییا تیه‌ێد وه زوورمێیان ئڕا ته‌ندرستی له‌ش و ژیان خه‌ڵک کورده .ئڕا یه‌گ زێاتر ئه‌ێ بازیه‌یل کوردی وڵاتمانه بناسیم گله گله شییان که‌مه‌و.
په‌ڵان
به‌شداره‌یل ئه‌ێ بازییه له د گروپ جیه‌و گرن هه‌رچه‌ن که‌سێگ تۊیه‌نێد له‌ێ بازییه به‌ش داری بکه‌ێد. هه‌ر گروپ سێ گله کوچگ باریک و دریژ وه به‌رزی سی تا چل سانت نه‌نه‌و ک قورسی هه‌ر کوچگ قزم د کیلووه وه له یه‌ک ده‌ور مترێگ جیاوازن. د گروپ له یه‌ک که‌متر له چل مترفاسڵه گرن .دۊای یه‌گ هه‌ر گروپ کوچگه‌یل خوه‌ێیان نانه‌و به‌شداره‌یل ئه‌ێ بازییه هه‌ر کامێیان یه‌ێ کوچگ گرنه ده‌سه‌و وه خه‌نه‌و کوچگه‌یل گروپ وراێوه‌ر خوه‌ێ. هه‌ر که‌سێگ کوچگ ئه‌و گروپ بڕمنێد یه‌ێ جار تر تۊیه‌نێد وه خڵات کوچگ دوێمیش بخەێد هه‌ر گروپێگ سێ کوچگه‌گه بڕمنێد پیروز وه سه‌ربه‌رز ئه‌ێ بازیه‌سه . هه‌ر گروپێگ وه‌رجله ئه‌و گروپ سێ گله کوچگه‌گه بڕمنێد یه‌ک ئمتیاز گرن وه له دۊای ئه‌وه د گروپ جییان وه‌ل یه‌کا ئاڵشت (عه‌وه‌ز) که‌ن وه له نوو بازیه‌گه له سه‌ر گرن بازی په‌ڵان جی چووڵێگ تواید ک ئه‌و کوچگه‌یله‌گ خه‌ن له چیشتێگ نەێد زوورم له ده‌یشت شار په‌ڵان بازی که‌ن . بازی په‌ڵان زوورم کوڕه‌یل به‌شداری لێ که‌ن له بازێگ جیه‌یل ناوچه‌ێ که‌ڵهۆڕ ژنه‌یلیش ئێ بازییه وه ڕێ خه‌ن یا له ناو گروپ دۊیه‌ته‌یلیش لوواێ لوو کوڕه‌یل به‌ش داری که‌ن.لە ناو خەڵک ئێ باوەڕیشە هەس ک هناێ ئێ بازییە کریەێد واران وارێدن.
