دودانه تر مه‌لۊچگ
هەم هانه بان خانگ
وه جیک و جاک و شادی
دێرن هه‌واێ ئازادی
چ چینه چینێانه
زنه‌ی وه کامێانه
خاستر تماشا بکه‌ی
گووش وه باسێان بێیه‌ی
دۊیه‌ته مه‌لۊچگ پوشێ
سه‌رێ وه شه‌رمه‌و ئۊشێ
هه‌رچ که‌سه‌گه‌ێ دنیام
نازار دڵم وه ته‌نیام
به‌وتا بچیمه وه‌هار
وه سه‌ر ئی دار و ئه‌و دار
قه‌ێر یه‌کان بزانیم
چه‌رخ زنه‌ی بڕانیم
دانه وه ده‌م یه‌ک بنه‌یم
خوسه وه دڵ ده‌ر بکه‌یم
له ناو دنیاێ بێ‌هووده
خه‌م ئه‌ر بخوه‌یم بێ‌سووده
دنیاگه‌مان باخه‌سه
دڵ بێ‌خوسه‌و داخه‌سه…..
مه‌لۊچگ کوڕ که‌فێه یاد
تووڕ و دامه‌گه‌ێ سه‌یاد
هه‌ناێ داێگێ له دامێ
پڕ بۊ گیانێ له زامێ
له ده‌رد و ناڵه سزیاد
له جه‌ور ڕاوچی گریاد
دایگێ تەنیا له ناو دام
کوشته‌ێ مردن وه ئارام
دڵێ وه ژان خوشاریا
کوڕ دی هه‌ناسێ بڕیا
زنه‌ی له وه‌ر چه‌وێ تار
ئازای سوقانێ بیمار
نه‌زانستیا دی چه بکه‌ێ
رۊ له کامین وڵات نه‌ێ؟….
وه شوون ئه‌و کارەساته
مه‌لۊچگ کوڕ هه‌ماته
له هه‌رجی چوو خاس نوڕێ
نه‌کا نریاۊ هه‌م توڕێ
فکرێ داێم هوشیاره
ڕوحێ داێم بیداره
هه‌ناێ که دڵنیا بی
دڵێ قایم وریا بی
سه‌ر که‌ێه ژێر باڵێ
خوه‌ش بو چما ئه‌حواڵێ
ئۊشێ وه یار نازێ
یه‌ێ غه‌زه‌ڵ و یه‌ێ رازێ
خوه‌شی مێانه‌ێانه
شادی هه‌میش هه‌ێانه
دنیا وه کامێانه
هه‌م چینه چینێانه…..
