م شاعر کەو ڕخێگم
لە فرە چێشتەیل ڕخم چوود
لە خودا ک لە ئەزەڵ، وەل ئنسانا خۊنەوخوەرە بۊ..
لە زەمین، کووڵبەر زڵم و زام
ک لە بازنەێ بێ وەلیفەتی
ئڕا خوەێ داڵەگیژان کەێ
م لە جادە ڕخم چوود
جادەێگ ک سەر ناس لە وەر و
نیەزانم پسا چوود؟
یا دێرێ تێد؟
م لە ژیان ڕخم چوود
ک ئیمە، تەنیا لە ناو وێنەیل قەشمەرانەێ ئاڵبومەیل زۊنە، زینگیم
م هەر جار ک پیاگێ
ئڕا تاو بازی مناڵێ
تناف خەێدەو گژ دارێگ
تەوەن بەێدەم
م لە دەنگ ئەزانگ
لە سات چوار شەوەکی ترسیەم
وە لە وشەێ ئازادی
هەناێ لە دەم ڕامێارەیل دەرچوود..
بەڵام لە یانە گێشت فێشتر
لە ت ڕخم چوود
لە ت ک وە دەسماڵ چەرمگ ئەوریشمێ
ک پێشکەشد کردم
تا وە پێ سەرچووپی بگرید
دەم و دگان خۊناڵی تەورەگان سڕیدەو
لە ت ک ساڵان
بێ خەوەر لە خنکیان خوەد
هناسەیل بەختەوەری هەڵکیشاید و
کلک ژنید لە خۊن گوڵەگان
لە خۊن وشەگان..
کلک داید لە ناو خۊن شاعرەگان
تا لێوەیل داسەیل و چەقوەیل وە پێ سوور بکەید..!
م شاعر کەو ڕخێگم..!
………………………………………….
بازنە: حلقە، دایرە
قەشمەرانە: مضحک
ڕامێار: سیاستمدار
