پارچە شێعرێگ لە ئاکو جەلیلیان
یه‌كێ بۊ (ك هێمان هه‌سه‌ێ) یه‌كێ نه‌ۊ (ك ناوێگ لێ نه‌مه‌نێیه)
یه سه‌ره‌تاێ هه‌ر مه‌ته‌ڵێـگه
(له رووژهه‌ڵات تیه‌م، وه‌ره‌و رووژئاوا چم)
یه سه‌ر و بنْ قسیه‌ێ سه‌ره‌ورده‌یلْ مه‌ته‌ڵه‌یله.
له‌و شه‌وه ك خه‌و دیم په‌روانه‌ێگ له سه‌ر كه‌لاكێـگ باڵه‌وازی كرد؛
هه‌ر ئێوارگان مرم و به‌یانان زینێیه‌و بووم
نیه‌توام بخه‌فم
های دۊیه‌تْ رووژهه‌ڵاتی!!
نه سووربۆن سووری سه‌ر گوونات له هۊرم برد و
نه ورسای وه‌ره‌سه‌ێ كه‌وكه‌وی چه‌وه‌یلد هات
ئیفڵ‌یش وه دۊیه‌فلی سه‌ر ئه‌ڕا داڵاهووێ ده‌رۊند چه‌مان
شانزه‌لیزه شانزه ساڵ پیرم كرد
له رووژئاواترین شه‌ونێیه‌مه‌گاێ دنیاوا راد نۊسم.
های دۊیه‌تْ رووژهه‌ڵاتی!!
ئه‌گه‌ر خودایش چه‌نه ت دووس بێیاشتام، گیچه‌ڵێگ نێیاشتم
لێره خودا سایه نه‌ێرێ و سێوه‌رْ تنیش سێویاێیه
گیفانم پڕه له هۊچ و دڵم پڕه له به‌ژن و باڵات
هه‌ناێ هۊرد كه‌م؛ سه‌رپه‌رتۊ به‌ردینْ ئی ئاسمانه خوناو كه‌ێد و
هه‌ناێ ناود بهم؛ شه‌راو له ده‌مم وارێد
خه‌مْ ئه‌بروو، خه‌مْ ئابڕۊ له هۊرم به‌ێد
ها هۊرد:
(ده‌سماڵێ پڕ كه‌م له هه‌نار و به‌ێ – جڵه‌وكیشێدم تا وه ملیه‌نه‌ێ )
هزار مله‌ێ مافه‌ته لێ داێ بڕیم
م چووڵ بڕیم و شار وه جی هیشتم و ت
شار بڕید و ژیار ئه‌وجی هیشتی
ئیسه كی شاواز كیشده؟ پووڕێ مانگ و هساره‌یل جڵه‌وشاهی راد بژه‌نن:
– شاواز شاوازْ دۊیه‌تْ رووژهه‌ڵاتی؛ هه‌واخواێ نه‌مرێ (ئـ.ا.ك.ۆ) –
های دۊیه‌تْ رووژهه‌ڵاتی!!
دی له ئاو و ئاوینه رخم چوو؛ ئمڕوو له هۊرد بمینێ
گاهس هه‌ر ئی رووژه، رووژْ به‌خت و جه‌ختْ ت بوو
ت هاو رازْ شلێر و شیلان و شه‌وبووی و م هاو ره‌گه‌زْ ده‌رد و سه‌رد و به‌ردم
ت سووماره له زێد و زیلان و زه‌لان دیری و سێوانێگ له برمه‌هه‌ڵاڵه و م:
پرۊسنه‌كێگم ك له زاكان وه‌فر و سایه‌قه هاتمه
سێوانه‌گه‌م سێوه‌ێ ته‌نیا داره‌گه‌ێ سێویاێ له خه‌مه
وه‌ڵام؛
… دڵنیام له وه‌هار بانان هزار سێوانْ داره‌ڕا كریاێ دێرم.
