هەڵبەست پەسەن کریاێ لە فستیواڵ خەڵات ئەدەبی مەولەوی کورد لە شار سنە پایز ۱۳۹۳
هه‌زم له نۊسانه
له نۊسانه‌و ده‌س وه پێ که‌م
هه‌رچێ ناوێ نه‌ی
خاوهن پێنۊسێگم هه‌زێ هه‌ڕافیه و بێ‌قه‌وڵه وه فام م!
که‌وجره‌تم که‌وجره‌ت!
رخ هه‌مزاد خوداییه له نۊسان و هه‌رئان له دڵم پێیا بوود و
هه‌ر رووژ خودا پاوه‌مانگم، لاو لووم بکه‌ن گیسم بووڕن
شایرێگم هه‌زم له ده‌روه‌چه ئه‌ڵامه‌ت تاجب
ده‌روه‌چ یانێ ئاسمان، هه‌ڵفڕین. نه، نه کی وه‌تێیه
یانێ هه‌رچێ ت بۊشی!
هه‌رچێ ت ناوێ نه‌ی!
بۊش سه‌رم وه نه‌زرد یه‌سه پیر بۊمه و تامڵ له‌گاو‌شه نان ت نه‌ێرم وه خودا.
زانی هه‌زم له هۊچه هۊچه تێ نییه تا وه بووڕ‌ه‌و بنووڕیده پیم.
وه یه‌واش ئۊشم و وه دزیه‌و نۊسم هاوش، نیشتمان و ماچ، شه‌و هساره و چه‌ن نخته
له‌ێ شێعره ت شایرید و م
م رایه‌ت، هه‌وچی، بووڕه‌که، مزۊر، ده‌وکه‌ر، نانه‌له‌م.
وڵم که ده‌س له قه‌وم لاده
له‌ێ وڵاته نامووم
ئه‌زره‌ته‌مه‌ن وه فه‌ره چشته‌یل فه‌ره، وه تن و گه‌هایش وه مردن
له شوون ته‌رمه‌گه‌م موور بارن و
بێ گه‌رمه‌شین له قه‌وره‌گه دڕما نه‌که‌ین، یه خه‌وه‌ردان
له جی گوڵ مشتێ شێعر بپاشن
لێوم ئه‌زره‌ته‌مه‌ن جگه‌ره‌ێگه‌و هناسم دۊکه‌ڵێگ تیه‌ڵ
ناو کلکانم تاسه‌ێ تاسانن گرن و قه‌پاڵم قه‌ور ته‌نگێگه
چه‌قه‌ێ فه‌نده‌ک چه‌ق، چه‌ق
هه‌زم له ده‌روه‌چه نخته، نخته
بزمار ته‌خته، ته‌ق، ته‌ق
چه‌نێ له‌ێ شێعره سڕیه‌م و سڕ به‌م
دڕوو ماڵ کی رمانێیه!
هه‌زم له هۊچه هۊچ
بجوورن
په‌نجه ئڕای گرتن سێفه یا شین، وه‌ێ، وه‌ێ.
له‌ێره سێفه‌گان وه قانوون جازبه خه‌نن کرمه‌گان له دڵێیان
زاو زۊ که‌ن بێ هساو.
شایرێگم هاوشه لیم داخریاس و ماچ.
ماچ نوستالوژی زۊنه‌مه.
له هۊرمه‌و نیه‌چوو لیموه‌یلێگ
له ناو له‌پم خنکیان و وه‌هارێگ وا برده‌‌ێ خه‌نێیه‌یلێگ له دڵم خنکیان و
چه‌وه‌یلێگ له هناز خوه‌رئاوا ئاوا بۊن ئاوا، ماڵدان ئاوا
تاسه تاسه، تاسه‌یلێگ تاسنێده‌م بێ وه‌‌لیفه‌ت
ده‌رچێن نه‌ێرم و ت نیه‌زانی
په‌نجه، سێف، کرم، ناخۊن، شین، وه‌ێ وه‌ێ
دێرمه چوه بنۊسم
ده‌س له قه‌وم لاده هه‌ێ هاوار
ئمشه‌و هه‌ر ئمشه‌و وه ئرمێسم پێنۊسه‌گه قوسڵ ده‌م و له لوو شێعره‌گانم کفن که‌م و نه‌مه‌ێ، نه‌مه‌ێ ئا ئا ده‌سم مه‌گرن
توام گومێ بکه‌م تف له رۊ تا گه‌پ له ت نێیه‌ێد و
ئێترافێگ له م نه‌مینێد وه جی
خه‌م، شێعر، ژان، گیان دان، ئاگر، زه‌لان، وه‌ێ، وه‌ێ
هاوار نیه‌تۊه‌نم به‌جه‌ر ئێ پێنۊسه بکه‌م هێرنگه ده‌س
که‌ێده پێ سه‌خورڵا
ملاژم کڕ کیشێد و زندانێگ چڕێده‌مه‌و خوه‌ێ
دڵم گیریاست، دڵم گیریاس له خوه‌م له ت له شه‌قامێگ له م دۊرده‌و خس و له‌و کاته‌گ وه‌یه‌که‌و بۊنمان قه‌ێخه کریا
هێمان تاسه‌ێ که‌پووگان ئه‌و شه‌قامه هه‌ڵوه‌شنێده‌م و زڕخه‌وم که‌ێد
ئوشم داڵگه خوه‌زیه‌و نه‌زایده‌م
ت نیه‌زانی
پێنۊسه‌گه ها ده‌سمه‌و توام خوه‌م بتاسنم له‌ێ شێعره
چه‌پ بکوتن ئڕاێ خاوهن گیس بڕیاێ و سێف کرموو و
لیموو خنکیای و ده‌روه‌چێگ ناوێ قه‌ێخه‌س و فه‌ره چشته‌یل تر نخته
بسووزم بسووز
خوه‌ره‌سووز له ده‌رۊنا په‌شێوم و شیه‌و بووم
تووام له رووژنامه‌ێ شه‌وه‌کی بڵاو بوم
یا له ناو یه‌کێ له پوستره‌گان وێنه‌م دانه‌ن ئۊیه خوه‌ش
وه ئۊیه مزیانێ
شایر تاسێاێگ له‌ێره بڵووزه که‌ێد و ئاگر گرێد
وه ئۊیه مزیانی! مه‌لۊچگ وه ده‌سه‌یل
هام له قین و توام تنیش سێ نخته
پێنۊسه‌گه ها ده‌سمه‌و تاسه‌یل زۊنه له مێژم ژاو ئه‌ڵاڵن
پێنۊسه‌گه ها ده‌سمه‌و
توام تنیش له سۊک دڵم له تیه‌ریکی شه‌وار بێ یه گ
شووفارێ بوو بوه‌ێد و فزووڵێ شک چاڵ بکه‌م و خوه‌م سه‌راوه‌نۊن جارچی جار بکیش
چه‌پ بکوتن ئڕاێ شێتی شایرێگ پێنۊس شێتێ کرد و بڵاو بۊه‌و
نیه‌زانێد چوه بنۊسێد و هه منه‌ی په‌ت گه‌ردێد له‌ێ شێعره
ده‌سم مه‌گرن چه‌پ بکوتن.
کرمیته‌گه ها کوو ده‌سم مه‌گرن چه‌پ بکوتن.
