سڵام و رێز وە خزمەت جنابد
نیما گیان خوەد وە بەردەنگەیل ماڵپەڕ هسارە بناسن
نیما عەزیزیانم لە هاڵ هازر کڵاس نووم، ۱۵ ساڵمە لە شار ئسڵام ئاوا ژییەم، ئەڵاقەێ فەرەێگ وە موسیقی دێرم و یە ۳ ساڵە ساز تەمیرەکار کەم ک ئمێدەوارم بتۊیەنم لەێ کارە موەفەق بووم.
.
لە کەێیەو وەل شێعر و ئەدەبیات کوردیا ئاشناوە بۊدن؟
هناێ کڵاس شەش بۊم هە لەێ شارە ئسڵام ئاوا بۊم یەکمین شێعرم نۊسام.
.
هاندەرد لەێ رێیە کی بۊ؟
جناب مەسعوود قەنبەری ک مۆئەلم کڵاس شەشم بۊ فرە لە بارەێ زووان داڵگی و ئەدەبیات کوردی وەلمانا باس کرد. چیرۆک و شێعریل فرە ئڕامان خوەنس و هەر رووژ لە ئەدەبیات کوردی باوەتەیل نووتر و رەنگینتر یاێ گرتیمن
.
تا چەنێگ ئەول شێعر شاعرەیل کوردا پەێوەندی دیریدن؟
تا ئەورە ک تۊیەنسمە و بتۊیەنم ، شاعرەیل و نۊسەریل گورا بناسم و لە شێعر و چیرۆکەگانێیان بخوەنم و پەێوەندێگ ولێیانا داشتوم.
.
وە باەوڕ خوەد کام شاعر لە سەر کارەگاند کارگەری داشتێیە؟
شاعرەیل کوردێگ لێواێ مامۆستا بانان و مەسعوود قەنبەری و هەروەها شێرکو بێکەس و … لە ئەدەبیات فارسیش ئەحمەد شاملوو و …
.
چ قاڵب شێعرییێگ کار کەیدن؟
ئازاد
.
بەردەنگەیل نیما کەێ تۊیەنن بڵاو بۊن کتاوێگ لە لێ بۊنن؟
جارێگ تۊیەنم بۊشم وەخت ئراێ چاپ کتاو فەرەس
.
چ قسیەێگ وەل هاوبازەیل خوەدا وە هەروەها باوگ و داڵگەیلا دیریدن ؟
قسیه م یەسە ک ئجازە نەیمن فەرهەنگ و زووان داڵگیمان لە هۊرەو بچوود وە تا ئەورە ک گیان دیریم کتاو بخوەنیم، وە دەس وە قەڵەم بۊم ک بتۊیەنیم یەێ ئنسان موفید ئڕاێ کومەڵگامان بۊمن .
یە بزانیم و لە هۊرمان بمینێ هاوڕێیەیل ک دنیا بێ هونەر، بێ وەلیفەتە .قسیەێ م یەسە باوگ و داڵگەیل عەزیز بیلن مناڵەگاندان وە زووان داڵگی خوێیان قسیە بکەن، فەرهەنگ خوێیان لە هۊرەو نەوەن وە یە بزانن ک فارسی وەتن کڵاس نییە . تەشویقێیان وە خوەنس کتاو بکەن تا فەرهەنگ کتاو خوەنین جی بخیمن وە ئڕاێ هەر هونەرێ ئەرزش بنەیمن وە هەروەها ئەرزش فەرەێگ ئڕاێ دەرس و مەدرسە قائڵ بوون.
.
آخرین کتاوێگ ک خوەنیدە کەێ بۊیە ؟
ئاخرین کتاو ، کتاو (تو را دوست دارم چون نان و نمک ) ئەسەرێ لە نازم حکمەت .
.
وە قسیەێ ئاخر ؟
وە قسیە ئاخر یەسە ،سپاس لە گشت کەسیلێگ ک لەێ ڕێیە ئامووژیاریم کردن و هەروەها جناب مۆرادی بەڕێز و سایت هسارە ک تۊیەنسێیە بەشێ لە زووان داڵگیمان و کار و کتاوەیل دووسەیل بڵاو بکەێدن.
.
سپاس ک وەلمانا گەپ دایدن .
سپاس لە گشتدان .
