نۊسەر : مارگارت ئاتوود
وەرگێڕان: مراد دێهبانی ( ڕێوار )
ــــــــــــــــــــــــ
مەلۊچگ بۊچگڵە فرە ڕۆژنامە خوەنی . فرە لە ڕادیو گووش تەکان و فرە وە تێلڤزیون نووڕس. ڕۆژێگ وە یەێ جارەکی چیشتێ لە بانا کەفت و شکیاد . چوە بۊد وە مدوو ئێ چێشتە؟ وەتنێ سەختە ، وڵام هەرچێ ک بۊ ، ئەوی نەبایەس ئێ جوورە لە کۊرە دەربچیاتا ، فرە کەس لە ئێ جوور کاتەیلێ مەزریەن چۊن قاڵەێ قاڵ کردن کار فرە خاسێگ نیە . وڵام مەلۊچگ بۊچگڵە ئێ چۊنە نەکرد . ئەوی هەمیشە پرشەێ شەڕێ هات ، چێ ئڕا ناو خێیاوان و دەس کرد وە دەوین دەنگ خسە ناو قوڕگ و ئێرنگە نەجیکن کەێ بجیکن :”ئاسمان پسا کەفێ ئەو خوار!!!”
ـ مامرە دەسیلە ـ لەپسا لە بان گاڕێ گەوراێ چوار چەرخەێ خوار و بار ، بار دا .وەت:” تەسەق بکە خودا مەلۊچگ بۊچگڵە ئێرە جی هەموانیێگە ، تو لە پسا ئاساژ لە گیشتێ بڕید !”
مەلۊچگ بۊچگڵە وەت :” وڵام ئاسمان پسا کەفێ ئەو خوار !من لە پسا مەترسی دەم وە پێیان”
مامرە دەسیلە ـ وەت :” تو پارەکە هەم ئێ قاڵەێ قاڵە خسید وە ڕێیا و ئاسمان هێمان ها لە شوون خوەێ ، هەڵبەت لە دۊاجارێگەو ک من دیمەسەێ!” یە وە لاپرتنگەو وەت.
مەلۊچگ بۊچگڵە وە دڵڕەنجیێگەو وەت : “ئاسمان پسا کەفێد ئەو خوار”لاپرتنگێگە ، ڕاسە گ ئاسمان لە پسا تیەێ ئەو خوار کەفتن ئاسمان نیشانەێ کەفتن هەر چێ چێشتەسە ، ئەو خوار کەفتن و شەل و کوت بۊن ، بایەس لە خەو هێز بگرین!”
مامر دەسیلە وەت “بچوورەو ئڕا ماڵ ،چیشتێ هەڵقوڕن ، کەمێ داکاسیە ، یا هەر کار ترەک ، سوو خاسترەکەو بۊد.”
وڵام سووا هات و مەلۊچگ بۊچگڵە خاسترەو نەۊ .
سەرێ دا لە هاوڕێ ئەوساێ ـ بووقڵە لە ژێرەو دار، ک ئێرنگە لە زانکۆ گەوراێگ مامۆستا بۊ .
مەلۊچگ بۊچگڵە وەت :”ئاسمان پسا کەفێد ئەو خوار.”
ـ بووقڵە لە ژێرەو دار، وەت :” یە شیکاریێگە، وڵام لە زانیاریەیلێ ک لە دەس هەس ئێ جوورە دیارە ک یە ئاسمان نیە گ لە پسا کەفێ ، بەڵکم یە زەویە ک لە پسا چوود ئەو بان چێن زەۊ لە ڕاس هەر ئەو شوون ئاسمان گرتنەسە ، ئێ گیچەڵە مدووێ کارکردەیل چەرخشتی زەویە و هەرەچێ ئەو کارکرد گیانەوەرەیل نەیرێ ئڕا یەسەگ ئیمە نیەتۊەنیم کارێ ئڕای بکەیم.”
مەلۊچگ بۊچگڵە وەت :” وە باوەڕ من قردگێ جیاوازیش وەل یەکا نەێرن ، یەگ زەۊ بچوود ئەو بان یا ئاسمان باید ئەو خوار . لە هەر دو لا ئیمە ئاسمان لە کیس دەیم و لە لێ بێ بەش بۊم.”
بووقڵە لە ژێرەو دار وە شێوەێ جەنگ و ناوجیێگەو وەت :” ئێ نووڕگە فرە گڕ و گەوجانەس.”
مەلۊچگ بۊچگڵە دەر دەفتەر بووقڵە لە ژێرەو دار وە قایم کیشادەو جوورێگ ک دکور چووپەمەێ بووقڵەلەژێرەو دار و کارتون ڕووژنامەگان لە بانا کەفت ئەو خوار، ئێ کەش زۊزی چێ ئڕا لاێ قازڵە لووسە ،هاو وتاقی ئەوساێ، ک ئێرنگە هەڵەگر یەێ ڕووژنامەێ پڕبایەخێگ بۊ.
مەلۊچگ بۊچگڵە وەت :”ئاسمان پسا کەفێ ئەو خوار ، یە ئەرک تنە ک وەتارێ لە ئێ مژارە بنۊسی.”
قازڵە لووسە وەت : “ئەگەر بوەتای بەشەیل بازاڕ بوورس لەپسا کەفن ئەو خوار، خەوەر وە هساو هات، ئیسە لاپەڕەێ ترەک ئڕا ئەوخوار کەفتن ئاسمان دیاری کریاس، ئیمە لە ئێ گیچەڵە بێ خەوەر نییم . کارناسەیلمان پسا لە سەرێ کار کەن ،وەێ زۊ گەپێ بەن ئەو پەرتخ و بڕنەوەی. هیچ هەوەجەی وە دڵگران کردن مەردم نییە.”
مەلۊچگ بۊچگڵە ، وە دڵ شکیاێەو ڕێیا داگرت و چێ .پەلام برد وە مەیخانەێگ ، کەمێ نووشەمەنی هەڵکیشاد ئەو بان .
مەی فرووش ک ناوێ چالاکە وێڵگە بۊ، وەت : “چوە بۊیە کشتیەگاند خنکیانە؟”
مەلۊچگ بۊچگڵە وەت :”ئاسمان پسا کەفێ ئەو خوار!”
ـ چالاکە وێڵگە وەت : “وە باوەڕ من ،بچوو دۊیەتڵەێ تازەێ ئڕا خوەد بۊنەو ، یا ئڕا خواد گۆڵف وازی بکە ، هێزێ بیە خوەد و کەمێ لە هاز خوەد خەرج بکە ئڕاد خاسە.”
مەلۊچگ بۊچگڵە وەت : چیمەنەیل زەۊ گۆڵف کووتەیل کیمیاوی دانەسە لێیان ، بوون وە مدوو گرتن شێرپەنجە
چالاکە وێڵگە ک لە کارێ شەکەت بۊد و خوەشێ هات شەڕێ بنەێدەو وەت: “گڕ و گەناڵ چوە دێری لە جیێ بەی وە پیم؟
ـ مرخاوی بەختەوەرە ک ساێ گووش داخسۊد وەت : بوەخشین ، من نیەتۊیەنم دەس لە ساێ گووش داخسن هەڵگرم . من خاون یەێ گرووە شەڕانچــیم ،تایبەت وە گیچەڵەیل ئاسمانگ، بۊنە وە مدوو دڵگرانی جنابد . یە چیشتێ نیە ک ئیوە وە تەنیا چارەسەرێ بکەین . وڵام وەل یەکا تۊیەنیم بگۊیەڕنیمەێ ! دەسە چک ها لە دەم دەسدان؟
مەلۊچگ بۊچگڵە ئێ جوور یاریگەریێ نەتواس . چێ ئڕا خوەێ جەرخەێ نادە یەکەو ، ناوێ ناد ـ ئا.پ.ک ـ کوڵەو بۊ “ئاسمان ـ پسا ـ کەفێ” ، بایەس هۊرد و هراش ئێ گەپە ئڕا ڕۆژنامە نۊسەیل شیێ ئەو بکرداد ، کەم پێ چێ و فرە پێ چێ بڕێگ پارێزەوان لە دەورێ کوو بۊن ک فرەترێان مۊش خورما و ڕسک بۊن .ئەوانە دەس کردن وە مانگرتن و کوو بۊنەیل سیاسی . گەورا ڕێیەیل بەسان. کووبەسانەیل بایەخدار وەت و وێژ شێوانن ، تابڵوەیل گەوراێگ هەڵگرتن :” ئاسمان بارنەو ! ئاسمان نەو، قڵایش نیە ، ئمشەو شەوە مانگە شەوە هەم نێیە! ئاسمان سنوور ئیمەس!”
ـ ورازە مەسان ـ خاون شرکەت گەوراێ ساخت و سازێگ تایبەت وە فرووشان زەۊ و ماڵەیل کارکەنارەیل لە ئاسمان بۊ وەت : ئێ گەپە لەپسا فرە بنێ قۊلەو بوو!
خوەێ لە ناو ئەمار سیمانیێگ زنەی کرد . ئەمارێگ ک ئڕا پاراستنێ لە کوتەیل گەوراێ ئاسمان کەڵک گرتۊن و ئێرنگە لەپسا هەر کەشە کوتێگێ، لە کاتەیل جیاواز و لە بان جیەیل جیاواز کەفت ئەو خوار.
ئەوی کل کرد وە شوون ڕوویلە ماسی خوەرگە ـ .
ڕوویلە ماسی خوەرگە چێ ئڕا لاێ وە دنیاێ ساکیەیل . ئەوی ئڕا پۊل دەس لە هیچ کار گەنێگ نەکووشاد و قردگێ ئەو ژێر کارەیلێ نەچێ . هەمیشە ئێ قسیە لە سەر زوانێ بۊ ، ” خواردەمەنی بڕشنن لە بان مێزەگە ، مناڵەیل!” ئەو قەێرە ئڕا مێزەگان خوەێ وە جەورەو نێیاد تا ڕووژێگ ک ڕەسیەو چیشتەیل نرخدارێگن.
ـ ورازە مەسان وە ڕوویلە ماسی خوەرگە وەت :”ئێ مەلۊچگە ناوێ چوە بۊ کورە؟ ــ بێ باوگ داڵگە ، لە پسا گەن جوور گیچەڵ ئڕامان درس کەێد ! گەن جوور ها بان مێژگم ، نواێ پێشکەفت گرێ ، باێەس گیچەڵێ بووڕیدەو.”
ڕوویلە ماسی خوەرگە وەت: ” من جۊجگەیلێ جوور یە ئڕا قەواڵتێ کەمە یەێ قەپ . ڕێ لە یە خاستر نییە . گڕ و گەناڵێگیش لە شوونێیان وە جی نیەمینێ بێجلە چەن گلە پەڕە هۊردە ، هیچ کاتیش جنازەێان نیەۊنیەێدەو، چەنێ ئڕاێ دەی وە پیم؟
ورازە مەسان وەت :”چـەنە ئاسمان.”
و هە ئێجوورەیشە پێ هات .
