گووچانێگ ئه‌ڕاێ چه‌وه‌یلم
بان چه‌ویێگ ئه‌ڕاێ ده‌سه‌یلم
ترۊسکه‌ێ هناس ئاسمان
تیه‌ڵ تر له ساڕێژ ئاسفاڵته‌یل زمسان نه‌ۊ !
هه‌ردگ ده‌س مێژوو
ئاوس ده‌مه‌کاوکییه‌یل تلیمارێگ له مردن بۊ
هه‌ردگ ده‌س مردن
له ماتیک و شه‌وه‌کی په‌تی ….
ئمجا م ئەو کوڕه نیم
هناسم بڕه‌ژم وه ترۊسکه‌ێ دیرووکه‌یل بانان
هه‌رچێگ ده‌مه‌کاوکی ها ناو چه‌ویلم
تفانمه ناو شەوار بێ هه‌لورێکێگ
تێوڵ هۊچ هساره‌ێ چلێیارێگ
ئاوس ده‌مه‌کاوکی کلیسایل بێ گه‌نم نه‌ۊ …
هه‌ناێ ده‌سه‌یل مانگ بیوه بوون …
خودا له کووڵ ته‌نیایی شەوار
سووار بوود و ئێواره‌یل شه‌هید له شوونێیەو موور تیه‌رن
م چراخ نه‌زووک تامازرووێگ دیم
ک له وه‌راێوه‌ر ده‌مه‌کاوکییه‌ل نیوتون
وه هه‌لوورکه‌یل ئازیه‌تی بارێگ نووڕس
که له ترس خوه‌ر
بهه‌یشت خوێیان فرووشن و
له شوون پاێ خودا شه‌س نوو زمسان وجاخ کوور چۊزه دان …..
ئمجا
م ئەو کوڕه نیم
شه‌س نوو جامه‌ک له هناسم پێیا بۊ
نیه‌زانی چه‌نێگ په‌لامارم تیه‌ره‌ن
نەرینجگه‌ێ سێفه‌یل زاواران و
سزیان خوه‌رئاوایل بێ ده‌س پێچێگ …..
زمسانه‌یل ناوسن بانان
شەوارێگ له گه‌نم و ئاسفاڵت
کردن ئه‌و وه‌ر
وه‌تم : هاتێ خودا دیرووک بێ په‌رتخێگ بوود
ک له سۊک ده‌مه‌کاوکییه‌ل تاریخ ئڵاژیاس
دیرووک سییه‌ێگ له ده‌س وا
ک ته‌مام هناسه‌یلێ
وه خۊن تیه‌ڵ سیه‌پرۊسنه‌که‌یل بانان ڕه‌ژینه .
ئه‌ۊ وه‌ت :
هاتێ
مردن
تام تیه‌ریک هه‌ڵپه‌ڕگه ێ بێیاشتوود
ئێره‌نگه زانم :
باپیرم وه ئا ده‌م هساره‌یل
ده‌س نماز گردێیه …….
ده‌سه‌یلم لفانه‌ێ
وشه‌یل زاوارانێگ بۊن
ک له مناڵی هه‌ر دگ گورچێێان دراوردن و
ته‌ک دان ئه‌و شان ڕاس شێعره‌یل زووڵه‌زا
وشه‌یل دڕاجه‌ێ پشته‌و خوار
گوڕاێگوڕ ئه‌ڕاێ خوه‌ێیان
سیکار کیشان و دۊکه‌ڵ سیکاره‌یلێیان
چنگێڕ خس ئه‌و ساێڕ جامه‌که‌یل تامازروو
ده‌سه‌یلم
له وه‌راێوه‌ر ساڕێژه‌یل سڵپ گردێ
خوه‌ێیان دان ئه‌و سێوه‌ێ
گازڕان زمسانه‌یل بێ قه‌ره‌وی
ده‌سه‌یلم
هووکاره‌ێ نووڕسن وه مه‌مگه‌یل دیالیز بۊن …
هه‌ر ئه‌و رووژه گ
سزیان مکیس واشه‌یل
له ده‌س شیه‌نه‌چیر ئاسمان
سانسور بۊ
هه‌ر ئه‌و رووژه گ
ژان رووژنامه‌یل پڕ له نرینجگه
شه‌قارته نا وه ئاژاژگی هه‌لوورکه‌یل وا
هه‌ر ئه‌و رووژه
زمسان
ژێرشه‌ۊ ژنانه‌ێگ له وه‌رێ بۊ
ک له ئاو ده‌م هساره‌یل سناو کرد ….
