شێعر کڵاسیک
-
پارچە شێعرێگ لە ئاکو جەلیلیان یه‌کێ بۊ (ک هێمان هه‌سه‌ێ) یه‌کێ نه‌ۊ (ک ناوێگ لێ نه‌مه‌نێیه) یه سه‌ره‌تاێ هه‌ر مه‌ته‌ڵێـگه (له رووژهه‌ڵات تیه‌م، وه‌ره‌و رووژئاوا چم) یه سه‌ر و بنْ قسیه‌ێ سه‌ره‌ورده‌یلْ مه‌ته‌ڵه‌یله. له‌و شه‌وه ک خه‌و دیم په‌روانه‌ێگ له سه‌ر که‌لاکێـگ باڵه‌وازی کرد؛ هه‌ر ئێوارگان مرم و به‌یانان زینێیه‌و بووم نیه‌توام بخه‌فم های دۊیه‌تْ رووژهه‌ڵاتی!! نه سووربۆن سووری سه‌ر گوونات له هۊرم برد و نه ورسای وه‌ره‌سه‌ێ که‌وکه‌وی چه‌وه‌یلد هات ئیفڵ‌یش وه دۊیه‌فلی سه‌ر ئه‌ڕا داڵاهووێ ده‌رۊند چه‌مان شانزه‌لیزه شانزه ساڵ پیرم کرد له رووژئاواترین شه‌ونێیه‌مه‌گاێ دنیاوا راد نۊسم. های دۊیه‌تْ رووژهه‌ڵاتی!! ئه‌گه‌ر خودایش چه‌نه ت دووس بێیاشتام، گیچه‌ڵێگ نێیاشتم لێره خودا سایه نه‌ێرێ و سێوه‌رْ تنیش سێویاێیه گیفانم پڕه له هۊچ و دڵم پڕه له به‌ژن و باڵات هه‌ناێ هۊرد که‌م؛ سه‌رپه‌رتۊ به‌ردینْ ئی ئاسمانه خوناو که‌ێد و هه‌ناێ ناود به‌م؛ شه‌راو له ده‌مم وارێد خه‌مْ ئه‌بروو، خه‌مْ ئابڕۊ له هۊرم به‌ێد ها هۊرد: (ده‌سماڵێ پڕ که‌م له هه‌نار و به‌ێ – جڵه‌وکیشێدم تا وه ملیه‌نه‌ێ ) هزار مله‌ێ مافه‌ته لێ داێ بڕیم م چووڵ بڕیم و شار وه جی هیشتم و ت شار بڕید و ژیار ئه‌وجی هیشتی ئیسه کی شاواز کیشده؟ پووڕێ مانگ و هساره‌یل جڵه‌وشاهی راد بژه‌نن: – شاواز شاوازْ دۊیه‌تْ رووژهه‌ڵاتی؛ هه‌واخواێ نه‌مرێ (ئـ.ا.ک.ۆ) – های دۊیه‌تْ رووژهه‌ڵاتی!! دی له ئاو و ئاوینه رخم چوو؛ ئمڕوو له هۊرد بمینێ گاهس هه‌ر ئی رووژه، رووژْ به‌خت و جه‌ختْ ت بوو ت هاو رازْ شلێر و شیلان و شه‌وبووی و م هاو ره‌گه‌زْ ده‌رد و سه‌رد و به‌ردم ت سووماره له زێد و زیلان و زه‌لان دیری و سێوانێگ له برمه‌هه‌ڵاڵه و م: پرۊسنه‌کێگم ک له زاکان وه‌فر و سایه‌قه هاتمه سێوانه‌گه‌م سێوه‌ێ ته‌نیا داره‌گه‌ێ سێویاێ له خه‌مه وه‌ڵام؛ … دڵنیام له وه‌هار بانان هزار سێوانْ داره‌ڕا کریاێ دێرم.
پارچە شعرێگ لە نەمر عەباس کەمەندی پێم ئه‌ڵێن فه‌رمووته شێتم ئه‌ی به قوربان ئه‌و ده‌مه باسی شێـتیم تا…
بیشتر بخوانید »