دۊیاێ چەن ساڵ بێ‌دەنگی و بێ‌بەشییم لە کۆڕەیل ئەدەبی فەرهەنگی، پایز و زمسان ئمساڵ دەرفەتەیلێگ هەڵکەفت وە بوونەێ خوڵک کردن وەڕێیەو بەرەیل خەڵات بێژەری هەفتەنامەێ سدای ئازادی، دۊیاێ ئەوە خوڵک کار گروهـ شێعر کوردی کرماشان ئەڕاێ ڕێوڕەسم ڕێز گردن لە ماموستا ئەتا نەهایی ئێکەشیش ڕێوڕەسم پەردە
لادان لە سەر کوومەڵە شێعر “نارنجییەگان لە لەشما دانەسە دەیشت” ڕێزدار فەرزاد سەفەرە بەشداری بکەم، دەسکەفتەیل ڕەنگین و پڕ باێخێگ بۊ.
ڕێوڕەسم پەردە لادان کتاو بەڕێز سەفەرە هاوکات وەل ڕووژ زوان داڵگییەو بۊ.
دۊیاێ ئەو پەرتخ ڕەسانن کارەیل هەر ڕووژم ئەول هاو کوڕ لێ‌هاتووێگا ڕێ کرماشان گردیم لە وەر، دەمە تەقەێگیش داشتیمن تا ڕەسینمان و شوون کۆڕەگە. دۊز سەر وەخت ڕەسیمن، ساڵون هڵاێە پڕ بۊدن. شوونێگ دیمنەو و بەشداریمان دەس پێ کریادن. ڕزا جەمشیدی بەرپرس کارگروهـ شێعر کوردی هەر خوەێ پێشکەشکار کۆڕەگە بۊ. “وەخت ئەڕاێ وەڕێیەو بردن بەرنامەگەمان کەمە!” یە قسیەێ پێسکەشکار بۊ، کوتەرانیش داشت هەرکەس چڕیمن ئەو بان سن زۊ زی قسیەیلێ بکەێدن، شاعرەیل یەک لە دۊیاێ یەک ئەڕامان شێعر خوەنین، چەن کەسیش لە سەر کتاو ڕێزدار سەفەرە وتارەیلێگ پێشکەش بەردەنگەیل کردن، هۊردە هۊردە دیمن شاعرەیل فەرەێگ دێرن چن ئەو بان سن تا ئەوقەرە ک تاقەتم تاق بۊ، موبایلەگەم سایلنت کردۊم گ هۊر و فامم لە فەزاێ ساڵونەگە ئەو دەیشت نەچوودن، چەن جار لە ناخ دڵەو هانم دریادن قردگێگ بچمەو دەیشت، ئەمان نە! پێویستە جم نخوەم تاگەر وە زامەت و تەقەلاێ وە ڕێیەوبەرەیل و ئەو کەسانە گ بەرهەم پێشکەش کەن بێ‌رێزی نەودن، پێشکەشکار یەکێگ لە بەرپرسەیل شارداری کرماشان بانگەواز کرد. پیاێ تەڕ پووشێگ چی ئەو بان سن شێعر کوردیێگ خوەنی، دۊیاێ ئەوە دەس کردە قسیەیلێ, کوردی کەڵهۆڕی ئداریێگ وەت، گەپ لە کارەیل فەرهەگی کوردی شارداری کرماشان دادن، گوشە قڵاخەو بۊم، گوزارشێگ لە کارەیل ویەردەێ بەش فەرهەنگی شارداری کرد، ئمجا وەت دیریمن هەوڵ دەیمن خەڵات شێعر بخەیم ئەوڕێ، خەڵاتەیل وەر چەو بگرێگیش دیاری کردۊن. لە ناو مژگم پرسیارەیلێگ هاتە دی، یاران وە چ مدووێگ لێوا کارێگ کریەێدن لە کرماشان، ئەۊش لە لاێەن شاردارییەو! وەتم مدووێ هەرچێ بۊیە گرنگ نییە، گرنگ یەسە تەقەلایل و داخوازەیل میدیا و تێکووشەرەیل کوردی‌کار کرماشان تۊیەنسێیە چەن هێڵ باێد ئەو نوا، بەرپرس دریژە وە قسیەیل و بەرنامەیل داهاتووێیان دادن، وەتم لەێ زمسان وشک ڕەقە ئێ گەپەیلە جوور جیق دان نەرمە گیاێ تازەێگە لە کرماشان، چمان بڕیار دانە لەێ ساڵ وشک و ڕەقە ک کرماشان بۊیەسە پایتەخت فەرهەنگی ئاسیا کەمێگ پف بکەنە بان خەڕگ و خوەڵێگا کە نیشتێیەسەو بان میژوو و کەلتور سڵ سقان دار کرماشان.
یانە نیشاندەر یەنە گ لانە کەم بڕێگ لە بەرپرسەیل فەرهەنگی، کوومەڵاێەتی و ئابووری کرماشان وەر کوترەگەێان هاوردنس ئەو یەک، ئمجا لەێ هاڵ و مەرجە بڕ فەرەێگ لە شاعر و نۊسەر و تێکووشەرەیل زوان و کەلتور کوردی لە کرماشان وەێ کۆڕە ناتۊن! پرسیارەیل جووراێجورێگ لە کاسەێ سەرم هاتوچوو کردن، داخم ئەڕا؟ نەزانسنە؟ فیلترشکەن نەێرن؟ خوڵکێیان نەکریاس؟ ئاست کۆڕەگە لە خوار زانسنە؟ شەکەت بۊنە لە بەشداری کردن لەێ‌جوور جەرخەیلێگ؟ ئێکە خوو سوو ڕووژ زوان داڵگییە و ئێرنگەیش کتاوێگ وە زوان داڵگیمان پێیا بۊیە و دێرن ڕێز لە شاعرەگەێ گرن، داخم بڕ بڕەو بۊنە و هەرکەس ساز خوەێ ژەنێدن؟ هەرکام لەێ مدووەیلە درس بوودن پێویست بۊ وە بوونەێ باێخ‌دان فەرەتر وە زوان داڵگی باتان و لە پاڵ‌دەس بەشدارەیل، بەشداری بکردان، جی دێرێدن لە دەرفەت خاس‌ترێگ ئێ کیشەیلە خەسارناسی بکریەن.
.
سوهراب مرادی. زمسان ۱۴۰۳
