نەورووز ڕووژ سەرکەفتن نـۊر وە سەر تیەریکی و کاوە وە سەر زەهاکە .
ڕووژ دەس وەپێ کردن مێژو پڕ لە شانازی گەل کوردە، ۲۷۱۹ ساڵە لە هەڵکردن یەکم ئاگر پیروزی گەل کورد وە سەر نەیارانێیا چودەو سەر تا ئمڕوویش گەل کورد لە نەورووز ئاگر پیرووزی خوەێ هەڵ کەێدن و دەس لە ناو دەس یەک لە دەورێا هەڵپەڕن.
نەورووز نیشاندەر یەکگرتن فەرهەنگی گشت ئەو گەلەیلەسە ک سەدان قەڕنە ئەول یەکا ئێ ڕووژە جەژن گرن. بڕێگ وە داخستن سفرەێ هەفت سین ، بڕێگ وە ڕووشن کردن ئاگر و هەڵپەڕین و بڕێگ وە ڕازونیاز لە شوونەیل پیرووز ئایینی و……. .
هەرکام لە ئێ ڕێ و ڕەسمەیلە نیشاندەر بیر و باوەڕ فەرهەنگی مرۆڤەیلێگە ک ئێ رووژە جەژن گرن ،تەقەلا ئڕاێ سڕینەوەێ هەرکام لە ئێ ڕێ و ڕەسمەیل تایبەت وە نەورووزە ، هەوڵدانە ئڕاێ پاکەو کردن بەشێگ لە فەرهەنگ هزاران ساڵەێ نەورووز.
ماڵپەڕ هسارە سەرەڕاێ پیرووزبایی کردن نەورووز، هیوادارە ساڵ تازە ساڵێگ پڕ لە خوەشی و شادی، هاودڵی و سەکامەتی ئڕاێ ئیوەێ بەڕێز بوودن.
