وێنه‌ێ مناڵ دا ساڵانێ له ده‌س ئه‌و چه‌تۊن و نه‌مه‌زریاێه كه‌فێده ناو سه‌رچا‌وه‌ێ چه‌مێ، ئاو، وێنه‌گه وه‌ل خوه‌ێیه‌و به‌ێ، مناڵ پا وه پاێ وێنه‌گه وه لێوار چه‌مه‌گه‌ێا چوودن، هناێ ره‌سێیه ده‌یشت پیه‌ن و بێازێگ، چه‌م له هاوار و هاژه كه‌فێ، ئاوگه كه‌م كه‌م نیشێده‌و، مناڵ وێنه‌گه گرێده‌و، نووڕێیه پێیه‌و دۊنێ ره‌نگ و رۊ وێنەگە گۊیه‌ڕیاس، خاس ئێسفاێ شێوه‌ێ گرێ، زانێ شێوه‌ێ ناسیاره وه‌ڵام نیه‌‌‌زانی كییه:
- یه هه‌ر ئه‌و وێنه‌سه ک له‌شوونێ بۊم؟ گومان نیه‌كه‌‌م! نه خوه‌ێه، م گ چه‌وه لێ نه‌ڵگرتم، ئڕا چۊنه وه پێ هات؟ مه‌گه‌‌‌ر وێنه‌‌یش پیر بوودن؟ چه‌نێ لە ئومرێ چییه؟ ئێ هه‌‌مگه لووچه چوه‌ێگه وه ده‌م و چه‌وێیه‌و؟
ئاو تیه‌ێده‌و ده‌نگ
- خاڵوو نووڕسیه‌‌سه خوه‌ده‌و؟
- خاڵوو كامه؟چوه ئۊشی؟ م هێمان دا ساڵمه.
- راس ئۊشی، كورپهێ ده‌رۊن تا بۊمنه سه‌د ساڵێش هێمان مناڵه.
- باس چوه كه‌ی؟ كورپهێ ده‌رۊن كامه؟ م له رۊاله‌ت ئۊشم، ت باس كوڕپه‌ێ ده‌رۊن كه‌ی، تا ئه‌وره‌ێگه م ها هۊرم له ئاو وه راسی و پاكی ناو بردنه، یه‌سه تنیش درووزن لید ده‌ر هات.
- به‌و‌ره‌و براگه‌م به‌و، ێه‌ێجار تره‌ك بنووڕە منه‌و، م ئاوێنه‌م نه وێنه، وێنه بنه‌ولا، هه‌مۊشه‌و داێم راسیه‌گان نیشان ده‌م، ئێ چه‌مه دۊنی دریژایی ژیانه،منیش گوزه‌ر ئومرم، هه گیژاوێگ ێه‌ێ گیر وگرفت، هه تاڤگه‌ێ ێه‌ێ ئه‌وخوار كه‌فتنێگه له پله‌وپاێه‌ێگ، هه لادان سوكناێ موه‌قه‌تێگ و هه‌ر بڵق و كه‌فێگ ها سه‌ر منه‌و مشتێ خه‌و خه‌ێاڵ پۊچ و بێهوده. ئێره‌نگه بزان چه‌ن جار ئه‌و وێنه كه‌فته ناو گیژاو، له چه‌ن تاڤگه كه‌فته خوار، چه‌ن جار لاداده كنار،
- چووزانم، ئه‌وقه‌ره فره بۊ هساوێ له ده‌سم ده‌رچییه.
- كه‌مێ تر منیش چمه زه‌ۊوا
- خودا نه‌كه‌ێ ……….
