تەڱرە ژیلەێ وەهارە / خڕخاڵ چەرمێگ مچێ!
گیانێ جۊ وەفر داڵاهوو / ناوێ بەم دەسم ڕچێ!!
پا نیا ناو ئاو سەراو / ئی جوورە کیشیا مەیلێ
ماسی سۊرەگان وە ماچ/ هاتیانە توواف کلکەیلێ!
قبڵە¬گووڕن زەوارە/ فەقیانەگەێ وە دەس وا
خوەێ پێچنێدە زڵفێ/ نایلێدەێ ئەڕا کەس وا
خوەزگا وە لاێ خۆداوە/ کانی دڵێ لیخن نەود
تووریاس لە دەسم هاوار/ کافر وە هاڵ من نەود…
وە سێقەێ سەر چەوەیلێ/ زانم زنەی ئەڕا چەس
باێەس ئەویش بزانێ/ دڵەیل وە یەک ژیا چەس
ئەو ئەوەڵ تک وارانە/ من کۆڵوو تێنێ دەیشتم
تا باێدە خوەێەو دۊنێ/ یە ڕێزە لەڵێ نەیشتم
جواو پرسیارەگانم/ وەلاێ دەمێگەو دیا
تمەز کۆچک ناۊە بان/ بافەێ خاسێگوو چیا…!
چیا تا کووشک گیانم/ لاوار لاوار بڕمێد…
ستۊن… پەردۊ… بشێوێ/ تیروو دیوار بڕمێد…
بێ ئەو بەڵاچەێ بەڵا/ دایم وارێدە دڵم
نەرمە تەکان ئەبرووێ/ پۆف کەێدە گڕو سکڵم\
مانگ جۊ تووقاولەێ زەردێگ/ ها تێوڵ ئاسمانم
لەو ڕووژە دۊرەو کەفت دی/ نامەی نیشتە بان شانم…
هەڵبەت فڵانی قەێرێ / وە من خاستر زانستێە
تا وە چەوێ بخەێدەم/ جادوو و سڕ زانستێە
خوەزگا شەراو لێوێ/ بڕشێدە جام لێوم
بێ مەی وشکە زوانم/ مەخموورو دڵ پەشێوم…
دۆ کووما وەفر وە دزی/ شاریەسەو ئی دەێدامە!
من نەخوەش بیمەو تەنیا/ وەفرە تەرچک دەوامە!!
