هسارە: چیروک “دوو باڵ بۆ نەفڕین” ؛ وە پێنۊس رەنگین نۊسەر لاو سنەیی ئەڤین عەزیمی نۊسیاس ک لە فستیواڵ سەراسەری چیروک مەهاباد لە ساڵ ۱۴۰۴ هەتاوی پلەێ یەکم بەش لاوان هاوردە دەس.
ئایی خوا، ئاخر بیژە من سەرم لێ شێویاگە؟ کێ قرچەی نیمەڕۆ لە ناوڕاس تاوسانا تێ بوو ناوشار؟ گشتی خەتای دایکمە، کوڕە شیرینەکەم، کوڕە شیرینەکەم ئەونە شامی ئاتە ژێر باڵما تا ئاخری وە داچکە تاڵەیک ئەمخەڵەتنێت و تەکیا تێم.
لە ناوڕاس پیادەڕەوەکا تەک دایکما ئەگەڕین بوو کەوەرگ! ئەیژی تا قات چتە. وە سڵامەتی شەو قیمە و کەوەرگمان هەس، خاڵۆ ئومێدێکیش ناتلنەو بوو بنیاوم وە خوەشییەو بڕێتەو بوو ماڵ.
تا چاو کار ئەکا مەردمە و گشتی ها لە بیر بەوبەختییەگان خوەیا. لە مناڵ دو مانگان بیگرە تا پۆپچەرمۆی نەوە ساڵە وا وە دزی ئێزرائیلەو ئەچنە ڕێگا تێتە بەرچاوت. هەرکام لەم بنیامەلە جوورێکن، دانێ بەرزە دانێ نزمە، دانێ چاخە دانێ لەڕە، تەنیا چتێکیان وا لە یەک ئەچێ ئەوەسە میروو سەریان وەم گەرما گوم بیوە و هاتنە بوو ناوشار! بیژە تێن بوو ناو ئەم هەرا و بەزمە ئەیژن چە؟ من بۆم بکریایت لەبەر ئەو کارتۆن تام و جێریمەو تەکانم ناخوارد.
هەرچێ مناڵە خوەم ئاسایی ئەونە خوەر داگیەسە مل سەریانا وەک مامرە گێجە لەتر ئان؛ ئاو لای دەمیانا شۆڕەو بیوە و ئەونە تواشای چەرخ چەرمۆی یەخ دەر بێهێشتەکەیان کردیە لەوا نییە ملیان گێڕ بوێ. ئەوە وا دایک و باوکەکە ئەسەنن بووی چکێ حاڵ ئەگرێ و ئەویشە وا دایک و باوکی ئەیکێشن، لارە لار بێ یەخ لە جەحانم وە خەفەتێک ترەو ئەچێتەو بوو ماڵ.
منیش وە قەوڵ دایکم کوڕە شیرینەیکم وە جفتێ شواڵ کوردی و تیشرتێ زۆرۆوەو و ئارەق لە ناو قژە ڕەشەکانما تێتە خوارەو. ناو ئەو حەمکە بووی ئارەق و تەماکۆوا ئەونە خەفەتم خواردیە ئیتر وردە وردە باشار ناکەم و ئەو خەریکە من لە ناو ئەوا! لە حێوەتا ئەونە حیچم بوو نەماگە با چاوم گێڕ نەوێتە شوون توکان ئەسپاوبازی فرووشیا، سەرم وەک بەچکە بەوزادە داخستیە و هەواس خوەمم داگەسە ئەوەو ئانێ ئەچمە ڕێگا پام نەچێتە مل خەت بەین کوچکەکان کەف خیابانەگا. دایکیشم هەر ئەم جفتە چاو کوڕیە ناوێنێ وا گێڕ بیونەسە شوون تووپ و تفەنگا یا شایەد گەرەکی نییە بیوێنێ، نازانم! هەر خەریکە لە شۆن کەوەرگەکەی خوەیا ئەگەڕێ. من ئەم خەیر و بەرەکەتمە نەگەرەک ئەشێ کێ بوێنم؟! ئەشێ قۆڕەی ناوسک بوێنم.
چکێ تر خوەم ئەخڵاونم، چ لە پاڵ گوێچکەمەو دەنگێ خوەش تێ، هەڵ ئەگەڕمەو وە شۆن دەنگەکا، ئەی گیاااان جۊجەڵە! ڕا ئەکەم بوو لای کارتۆن جۊجەڵەکان و تا نوک لۊتم سەر ئەچەقنمە ناو کارتۆنەکا، تواشایان ئەکەم، ئەی قەززایان!! کورە من تازه نۆۆۆ ساڵمە، پیاگێکم، خاوەر پلاستیکیم بوو چەس؟! من جۊجەڵەم گەرەک!
نهه، وا دیارە دایکم ئەموێنێ، ناو ئەو شلۆقیا وە لەچکە سۊرە گوڵ گوڵیەکەیەو ئەیوێنم، لەبەر خوەرەکە چکێ برۆی چیوەسە ناو یەکا. خوەی ئەگەینێ پێم:
– هیوا ئەوە بۆچە ناو ئەم شلۆقیا دەرئەچی؟ ها هەرا کە پەلەمانە.
(ئەرێ وەڵا پەلەی قیمە و کەوەرگەکەمانە)
+ دایکە جۊجەڵەکان زەریفن ئەزانی؟
– ئەرێ ئەزانم خوا خوەشیان کا بۊ خاونەکەی.
+ ئەیژم دەنگیشیان خوەشە ئەزانی؟
چکێ گوێچکە شل ئەکات با ناو دەنگ دەوڵ و سۆڕناکە دەنگ جۊجەڵەکان بژنەفێ.
– ئەرێ ئەیژیتا قاسپەی کەوە!!
+ ئەیژم بوو تواشا کردنیش خوەشن ئەزانی؟
– منیش ئەیژم نەزەرت چەس هیچکاممان یەک نەنینە سەرکارەو؟ ئەزانم چەت گەرەک، نە، ناسێنین! هەر ئەوەمە ماگە ماڵەکە بووی ڕێقنە بگرێ!
+ دەی تخواااا، تو گیان ئەم تاقانە کوڕتە ئەمڕا مەیژە نە.
کاورای جۊجەڵە فرووش لە پشت کارتۆنەکەنەو وێسیا پاوە و تواشامانی ئەکرد، ئەونە گەرمیۊ کراسە سەوزەکەی خۊسیاۊ، کڵاوە لەبەدارەکەی ئەونە هاوردۊە بەرەو، چاوی دیار نەۊ وەلێ هەر وەو سایەبانیشەو پووسی سۊتیاۊ و لچی وشکەی هەڵداۊ، هەروا تواشای ئێمەی ئەکرد و وە بێدەنگی چت فرەی ئەوت!
دایکم ڕۊ کردە لایەو وتی:
-وە دەس مناڵ ئەم دەور و زەمانەو، ئەمانوەخشن برا.
(ئەیژیتا زەمان خوەیان چۆنیوە! وە جێ دانێ جۊجەڵە کولانێ مامر و جۊجەڵەیان بۊ!)
+ وا نەیژی خوەیشکم.
-دەی ڕۆڵە گیان ئەمە سەندیشمان، ئەیانوەیتە کوێ؟
+قەوڵ ئام نەتڵم بوو تو ئەزیەتیان بوێ، ئەیانوەمە بەرهێوان.
چکە چکە دڵی نەرم بۊ. وازانم خوەیشی دڵی پێیەوەۊ، کەفتۊە بیر زەمان مناڵیەکانی، وە قەوڵ خوەی ئەو ڕۆژەلە فێرە خوەشیوە.
هاتین دانێ بێرین چ چاوم کەفتە ناو چاو جۊجەڵەکە، بەزەییم هاتەو پێیا، وتم:
+دایکە خوا هیچ مەخلۆقێکی تەنیا دروس نەکردیە. ئەم هەژاریشە با دڵی نەتەرەکێ، بیانکەینە جفتێ؟!
دوانە جۊجەڵە کوردییە زەریفەکەمان حەساو کرد. ئانێ دەنگیان ئەهات ئەتواتا بوڵبوڵە لە پاڵ گوێچکەمەو ئەخوەنێ! پیاگەکە کارتۆنی نەۊ، خستیانیە ناو دەڵقێ بوومان. دایک قەرەوی کردەو، هەرچێ وە دەسیەوەۊ دایە دەس منەو. جۊجەڵەکانی نیا بان دەسیەو و سەر دەڵقەکەی باز کرد. جۆرێ سڵحاندیانی با دانەکەفن، لۆیک لە لەچکەکەیشی دا ملیانا با هەم دەرنەچن و هەم لە ژێر ئەو قرچەی خوەریشا نەکوڵن. کورە بەخوا لە من فرەتر دڵی پێیان خوەشە، جا نازانم ئەم دایک و باوکەلە بووچە وانە، نایتێرنە ڕۊ خوەیانا. من بوێتە سەد ساڵیشم هەر جۊجەڵە ئەسەنم و کایەیش ئەکەم!
پاو قەدەمیان خەیرۊ، هەر کەفتینە ڕێ گەینە چەرخ کەوەرگەکە، دو کیلۆمان سەند و پێچمان کردەو بەرەو لای ئیسگای تاکسی.
گەینە لای تاکسییەکان. چ ئەونە شلووقە ڕێ ڕێدار نییە. گشتی ئەونە هەوڵیۊ و ئەیدا بەر یەکا سەفەکە هاتۊ تا سەر چوارڕاکە، ئاوەو پا بچواتاین چتێکی نەماۊ، ئەگەییانە ماڵ! لەم ناوە ناوە تاکسییەکانیش مقێکیان نیاۊە خوەیانەو، کەسیان سوار ناکرد.
من و دایکیشم لە ژێر سایەبان سەر چەرخ میوەکانا وێسیاین با چکێ خەڵوەت بوێت و جۊجەڵە نازارەکان لەبەر گەرما نەخنکن. دایکم لەچکەکەی لە سەریانەو هەڵگرد با نەفەسێ کێشن و بزانێ لە چ حاڵن؛ چ بۆچە جۊجەڵە وەک ئەسیرێ وا ساڵان و مانگان لەو تاریکە سەڵات ئێنفرادییا بوو وێ هەر چاوی کەفتە هەوا و ڕۆشناییەگە چاوی بەرقێکی نەداوەو و وە باڵ و پا پەڕیە خوارەو! دەی بێ خاسی کە.
بۊە یەک حەمەرەمزێک! جفتە جۊجەڵە لە ژێر چەرخ میوە فرووشی و لە بەین کەوش مەردما دەرئەچوان. من لە لایکەو دڵم هاتۊە ناو دەمم نەوا دانێ پایان پێیا بنێ و بیانتلێقنێتەو، لە لای تریشەو شواڵەکەم هەڵ کردۊ نەوا خوەم پا بنمە ملیانا و ڕام ئەکردە شوونیانا، دایکیشم لە دڵەو ڕەحمەتی ئەهەنارد بووم و دەرئەچۊا لەو لاو بیانگرێ. جۊجەڵەی خوا خاس بۆ نەکردێ تا پەنج دەیەقە لەمەوبەر لە بەر گەرما وەویە سایلەی داکریا، ئایسە لە حەنای ئێما بۊنە بەچکە جنەو!
وە هەر بەوبەختیێک نەۊ جۊجەڵەمان گرد. خستیانمانە ناو دەڵقەکە و تاکسیکمان گرد بەرەو ماڵ.
لە ناو تاکسییا جۊجەڵەکان چاویان ئەچۊا بەرەو پشت ئەتوت هاکا مدارەو بۊن. هەر ڕا چاویان ئەبەست تا بازیان ئەکرد ئەتوتا تیرێک خەلاسی ئەننە بن دڵمەو، ئەونە جۆرێ خوەشیانم گەرەکۊ ئەتوت ڕەفێق بیس ساڵەمن. ژنێ خوا خاسی بوو کا چکێ ئاوی دا پێمان، ئێمەیش قەترە قەترە تکانمانە دەمیان. جۊجەڵەی باوان لە خوەشی ئاوا وەختۊ ڕایک تر خوەی خاتە خوارەو، باڵ و پەڕی لێ پەیا بۊ و ڕەنگ زینگی لێ نیشت. منیش هەناسەیک ڕەحەتم کێشا. دوعایک فرەم کرد بوو ئەو خانمە و پاڵم داوەو تا گەینە بەرەو.
پیادە بۊن. دایکم چۊەو بەرەو ماڵ، منیش وە هەڕاکردن خوەمم گەیاندە توکانەکەی کا عارف. نییە حەساو دەفتەریمان هەس ناوچاوی تەکما ناکریێتەو ئەیژیتا قەرزی ها لامەو! هەرچەن هەر قەرزیشی ها لامەو.
+ وە ترسە ترس وتم: سڵااام کا عارف گیان، کەیفەکەت سازە؟
– وە لا لۊتێکەو وتی: عەلەیک و دوان، حەساو دەفتەری بمتلێ بووچە نە!
+ ئەی هەزار ماشەڵڵا ئیمڕۆ چەنێ جوانەو بیوی، ئەیژیتا کوڕ چواردە ساڵەی!
– چکێ حەزی کردە خوەی و دەسێکی هاوردە سمێڵە ساواکییەکانیا و وتی: هیوا زوان باز بیژە بزانم چەت گەرەک؟
+ غەرەز لە موزاحمەت عەرز کەمە خەمەتت دوان جۊجەڵەم وە تاو دڵی سەندگە، ئیسە هانە ناو دەڵقا، وتم ئەگەر هەست کارتۆنێکم پێ بەی.
هەناسەیک وا لە بن دڵیەو دەرئەهات هەڵی کێشا. وەو هەیکەڵە گەورەیەو هەڵسا کارتۆنێک میزانی دا پێم، بێ قسە و بۆڵە! بەخوا ئەمە خوای جۊجەڵەکانۊ، خوا گیان دەست خوەش.
+وتم: ئەی هەزار جار خانەت ئاوا.
دو پام بۊ دوان تریشم قەرز کرد و ڕام کرد بەرەو ماڵ. دایکم درگا چەرمۆوەکەی خواری نەبەستۊ، چۊمە ماڵەو و دو تەبەقەکەم کردە دو هەنگاو.
دایکم جۊجەڵەکانی نیاوە ناو ڕووشووییەکە لەو لای درگاکەو، منیش وە نەرم و نیانیک نیایانمە ناو کارتۆنەکە. هەڵیانم گرد و بردیانمە بەر تێلێڤیزیوونەکە، لە ژۊر ماڵەکەو لە بان ڕووفەرشییەکەو دایانم نیا. تێلێڤیزیوونم ڕۆشن کرد چ لە خوەش شەڼسی جۊجەڵەکانا تام و جێری ئەدا!
چۊم جلەکانم گۆڕی و هاتمەو بوو لایان، هەر جرۊکەیکیان وا ئەچۊا ناو گوێچکەما دڵمی ئەخستە فرتە فرت لە خوەشیا. دڵم تاقەتی نەگرد، چۊمە لای تلیفۆن بان ئۆپێنەکە و شومارەی ماڵ هێژام گرد. هێژا ئامۆزامە وەلێ وەسە برام و شەریک جورممە، ڕۆحێکین لە دو جەسەدا. ماڵیان ها لە دو کۊچە ئەولاترەو. قاوی لێ ئەکەین خەپە چون پێچەوانەی منە و ئایسەیشە وا هەشت ساڵیە وەختێ دەرئەچێ تەکەی گوپی تێ. هێژا خوەی بەرزی کردەو، خاسە خوا شوکر حەوسەڵەی سڵام و ئەحواڵپرسی تەک گەورەکانما نەۊ.
+ سڵام خەپە خوەشی؟
– سڵام ئابرا خوەشم وە خوەشیت.
+ دوارە قسەی منۆ دوارەو کرد؟ من فرە خوەشم خاسە تویش وەک من خوەش وی. ئەمانە وێڵ کە خەوەرێکم هەس، بیژە چە؟
– چە؟
+ جۊجەڵەم سەند!
– تخوا؟ چەندانە؟
+ جفتێ.
– موارەکە، چەرخیان وە سڵامەتی بچەرخێ. کەی بێم بوو لایان؟
+ دەی تا ئەوە بیژم، جۊجەڵەکان ئایسە برسییانە، هیچێ نییە بخوەن زاتم نەۊ بیژمە دایکم برێنج بنێتە بان. ئەگەر دایکۆ برێنجی دروس کردگە مشتێ بێرا و ئایسە بێ.
– حەلە، تا سێ بشمێرە هاتم.
تلیفۆنەکەم دانیا. بوویک فرە ئاشنا ئەهات. چۊمە ناو ئاشپەزخانە بزانم چەمان هەس؟ چ گیاس! هاکا چۊینە ناو زمسانیش وەلێ گیای بەهار ماڵ ئێمە تواو بوونی بوو نییە. نەیکێشا دو دەیەقە هێژا وە دەڵقێ برێنج لە دەسیەو هات. سڵاممان کرد و چۊین بوو لای کارتۆنەکە. هەر تواشای تام و جێرییەکەیشمان نەکرد، جۊجەڵەکانمان هەڵگرد و لە ناو تەنیا خەوەکەو بردیانمان بوو بەرهێوان. هێژا برێنجەکەی داکرد بوویان و دەسیان کردە برێنج خواردن، دانێ سەرە دەبەیشمان پڕ کرد لە ئاو و داماننیا بوویان. جفتی سەرمان نیاۊە بان کارتۆنەکە و چاومان لێیان داناخست. دانێکیان قاوەیۊ و ئەودانەکەیان ڕۊ وە زەرد ئەچۊا، زەردەکە چکێ بۊچکترۊ وەلێ فرە فرزۊ ڕێگەی نادا ئەو دانەکە. ئەو دانەکە گەورەترۊ وەلێ چکێ گێجی لێ ئەدا.
دەسمان کردە قسە کردن لەبارەی ئایەندەیانەو: داخوم کەی گەورە ئەون؟ گەورە بۊن کامیان خوەشتر ئەخوەنێ؟ ئەتانین فێریان کەین باڵ لێ بەن و بفڕن؟ کەی ئەتانین هیلکەکانیان بفرووشین و دەوڵەمەنمانەو کەن؟ لەم حاڵ و ئەحواڵاۊنە چ وە دەنگ دایکم هاتینە دەرەو لە خەیاڵ و چۊین پەلە پەل نەهارمان خوارد و قسەیشمان ئەکرد ناویان بنین چە؟
دوای نیم سەعاتەو نزیک سەعات یەک و نیم چۊینەو بوو لایان، ئاو و برێنجێ فرەیان خواردۊ و سکیان بەرزەو بۊ. هەرکاممان یەکێ دانێکمان هەڵگرد و نیایانمانە ناو هێوانەکە با چکێ پیادەڕەوی کەن و غەزاکە هەزم کەن، هەر دایانیانمان نیا وەک کەسێ وا ڕێگەی گوم کردوێ کەفتنە هاتوچۊ. زەردەکە شیرین شیرینێ باڵیشی لێ ئەدا و فرزە فرز دەرئەچۊا. لە کەمتر لە یەک سانیە خوەی گەیاندە لێوارەکە و وێسیا تواشای خواری ئەکرد، چ یەکدەفعە دو باڵی لێ دا و پەڕی. دیم زەردە نەما! ئەوەڵ دەس و پام شلەو بۊ، چکێکی پێ چۊ تا هاتمە خوەما. نازانم چوون خوەمم گەیاندۊە ناو حەوش. هێژایش ئەو جۊجەڵەکەی هەڵگردۊ و هاتۊە شوونما. چ زەردە وە دوان باڵ باز بۊچکەلاینەو ها سەر زەویەکەو، چاوی بەسریاوە و ئیتر نەفەس ناکێشێ. نیامە ناو مشتم، دانە دانە فرمیسکەکانم ئەڕژیا ملیا و پەڕەکانی تەڕ ئەکرد. ئەو جۊجەڵەکە دەسی کردۊە جریوە جریوێ بەرز، وەکشتێ خەریکۊ ئەیلاواندەو. دوای بەینێ گیریان و شیوەن من و جۊجەڵەکە، هێژا وتی خۆ ناتوانین کارێ کەین بێ با لە باخچەی گووشەی حەوشەکا چاڵێ کەنین و جۊجەڵەکە بنینە قەور.
ئەو دانەکەمان لە ناو حەوشەکا دانیا. چاڵێک بۊچکمان کەند و زەردەمان نیا ناوی. خاکمان داوەو ملیا و گوڵێکیشمان نیا بان قەورەکەیەو، کوچکێ قورت قورتیشمان نیا بانی بوو نیشانە. جۊجەڵەکەمان هەڵگرد و وە خەم و پەژارەیک فرەو چۊینە بان. دایکم ڕەنگ و ڕۊمانی دی دڵی داکەفت. من هەنیسکم ئەدا و نەمئەتانی قسە کەم، هێژا داستانەکەی گەڕاندەو. دایکم نیامیە باوشی تا چکێ ئارام بۊم. جۊجەڵەکەمان نیا ناو کارتۆنەکە و هەروا بێ قسە چکێ لە بەرهێوانا دانیشتین.
فرەتر لە خوەم، بۆ ئەم جۊجەڵە هەژارە خەفەتم ئەخوارد، من هێژام بۊ وەلێ ئەم بێچارە هەر ئەیجرۊکاند با ڕەفێقەکەی جواوی باتەو وەلێ کەسێ نەۊ. هاتینە ئەم دێو و تێلێڤیزیوونەکەمان ڕۆشن کرد. تواشای کارتۆنمان کرد تا ئێوارە وا هێژا چۊەو.
بوو شام قیمە و کەوەرگەکە پێ گەیی. لە ناڕەحەتییا ناقم گیریاۊ نەمئەتانی نان خوەم، چکێ وە کەوچکەکە کایەم کرد جا هەڵسام و چۊم بوو لای جۊجەڵەکە. چکێ تەنیام هێشتۊ با ئارام بوێ ئایسه ئیتر مەشیا قسەم بووی کردایت.
دەسم هاوردە پشتیا تا دانیشت.
+جۊجەڵە گیان کەم خوەت ناڕەحەت کە، ئاخر خۆ قەرار نییە هەرکەسێ باڵی بۊ دەس کاتە فڕین! وا هیچێ وە هیچێ ناوێ، ئیتر فەرقێ لە بەین هەڵۆ و مامرا ئەمێنێ؟ ئاسمان پڕ وێت و زەوی چۆڵ، ئەوێ؟ تو ئەزانم هار نیت و ژیریت، هۆشت بوێ ئێشتباکەی زەردە نەکەیت چون دوای تو سەکتە ئەکەم. ئەزانم ناومە ئەوەو وەلێ زۊ زۊ تێم بوو لات تا ڕەفێقێکت بوو پەیا کەم. شەوت خوەش.
وامئەزانی فرەتر خەریکم دڵداری خوەم ئامەو ئاخر جۊجەڵە چتێکی لێ حاڵییە؟ وەلێ وا بیرم ئەکردەو وە جرۊکە جرۊک ئەیژێ: ئەی زەردە بووچە باڵی بوو ئەگەر قەرار نەۊ بفڕێ؟
سەعات نزیکەی هەشتۊ هاتمە ئەمدێو، درگای هێوانەکەم نەبەست. سەنیایکم لە ناوڕاس هاڵەکا دانیا و چکە چکە خوەمم کردە خەو. تا سوح خەوم دی. خەوم ئەدی جۊجەڵەکانم نەسەندگە و گشتیان هانە لای یەکەو لە ناو کارتۆن پیاگەکا. زەردەیش هەر لەبەر هارییەکەی لە وەستیانا لە بان دانێ سەنەڵی پاوشاییەو دانیشتگە و هەر ئەیژێ: باڵ بۆ فڕین ئەوێ! باڵ بۆ فڕین ئەوێ!
سەعات حەفت وە دەنگ شەققەی تون باڵ داچەڵەکیام، نەمئەزانی کەیە و هام لە کوێنا. بەرچاوم لێڵۊ، خوەم گەیاندە لای درگای باز باڵکونەکە، ئەوەڵ وامئەزانی ئەمیشە خەوە وەلێ ڕاسۊ:
دوان قاڵاو سەریان کردۊە ناو کارتۆنەکا، شەقە شەق باڵیان لێ ئەدا و شەڕیانۊ. خەریکۊن تاقانە جۊجەڵەکەمیان ئەخوارد! وامئەزانی خەریکم ئەقێڕنم وەلێ دەنگم لە ناو قڕۆما خەفە بۊ و نەمئەتوانی بیەمە دەرەو، تەنیا تانیم بچم ڕۊوە کارتۆنەکە و تواشا کەم: ڕەشی چوار باڵ و دوان قاڵاو تواو سەر کارتۆنەکەیان گردۊ. تەنیا سۊری چکێ خوێن لە بێخ کارتۆنەکا دیارۊ…
قاوەییەکە خۆ وای نەئەزانی باڵ بۆ فڕین ئەوێ. وای ئەزانی؟ سەر گۆپم تەڕ بۊ و ناو مەغزما تکرارم ئەکردەو: ئاخر لەبەر چە…؟
