ئیمە کییم؟
بانگ هاوار منە ئمڕوو
لە شار درو و دۊکەڵ و نەزانسەی
شار بی دەروەچ و ڕووژنامە و کار…
ئەێ تو کابراێ کوڵووڵ بزە لە لێو بڕیاگ
-من!!
باوگ و باپیرم مەێتەر خان بۊن.
خان مرد و من بۊم وە ئەسپ و ئێرنگەیش نان سووارمە.
– ئەێ تنو و بانان و ئازادی هەڵوژاردن و ئەو چشتەیلە؟
چەو بڕیمن لە شوونێ من و پرسیارەگەم
لە تەپ و تووز ورسیەتی نوغما هات…
ئەێ تو ئافرەت ڕووژانەێ ماتیک و تلڤزیون؟
– من!!
بۊمە وە لاپەڕەێ کڕکڕ کاقەزێگ لە سینگ ئێ هەمگە بانگ و مزگەفت ئێ شارە
ئێرنگەیش لە چوار ڕێیان تامەزرویی چەوەڕێ گیرفانێگم
هەڵگرێگەم…
– ئەێ تنو و بانان و ڕووژنای و ڕەنگ و ئشق و ئەو چشتەیلە؟
چەو بڕیمن لە شوونێ من و پرسیارەگەم
چۊ دۊا ڕەو تەم لە سەر خاک هەڵترازیا و گرتەو هواو و خەێوا هات…
لە شار درو و دۊکەڵ و نەزانسەی
شار بی دەروەچ و ڕووژنامە و کار
بانگ هاوار منە ئمڕوو
ئیمە کییم؟
.
.
وەهار ١٣٨٢
