شەکەت لە بێ کەسی، لە یەێ ڕەنگی یا لە وسان خوەد
شەکەت لە پاێ ک نەیری… خجاڵەت لە گوچان خوەد
شەکەت لە جاڕەگان و کوتر دڕیاێ و قڵاگاند
شەوێ دادە سەرد ئەو دەر بێەیدن دی لە گیان خوەد
تە هاتی بۊدە ئاێەم تا جواو باوشـــەیلْ بێ ـ
لەشد بەن، لە خوەدەو هاتی ک گیان بەی وە ژیان خوەد
وەلی ئێرە لە ئاواتْ ڕەنگین قەڵبد پڕەو کەن، بەعد
دەسد نیشــان ڕاند دەن بێەی لە بان ڕان خوەد
ئەوەڵ قەڵبد دڕن ئێکە کتەو دەن تا بمینیدن
تن و شوون کتێگ و یەێ نەمەکدان زامەگان خوەد
وە پید ئۊشن کەمووتر؛ ئێکە باڵەیلد بەسن، وەختێ
ک نووڕیدن بەدت تێدن لە خوەد لە ئاسمان خوەد
لە ئێرە هەرکە شەو یەێ ڕەنگ، بەێان یەێ ڕەنگ ترەک دێرێ
عەزاود دەێ نەنووڕە یەێ ڕەنگی قەڵب و زوان خوەد
لەشد بوودە کەمان؛ چەمیەێدن و گیاند هە چۊ تیرێ
خوەشد تێدن شەوێگا دەر بچوودن لە کەمان خوەد
وەتی بێکەس هەر ئەو تەنیاس؛ وەلی خوو بێکەسی یانێ
هزاران کەس لە دەورد بوو، بنیشی خوەد لە شان خوەد
خوەش هاتیدە وە دنیاێ ئاێەمەیل ئەێ داوڵْ سەرشێت!
وەلی چەن ڕووژ تر بۊدن پەشێمــان لە ئەلان خوەد
شەکەت لە بێ کەسی، لە چەن ڕەنگی، لووبڕ لە ئاێەم بۊن
لە ڕانەیل کەوەو بۊ، لە دەنگ خرچەێ سقان خوەد،
لە نوو چی باوشد وا کەی وە کوتر شــــووڕ دڕیاێێگ
لە نوو چیدن بکیشیدن خجاڵەت لە گوچان خوەد …
