![](https://hisare.ir/wp-content/uploads/2024/06/shahryar.r-650x330-1.jpg)
ساێه وە ساێه لە شوونێیان بۊم. نیشتمەو سەر دەس لێیان، زانسم تیرم وە خەتا بچوود گیانم نامەسەو بان مانگاگە. ئەوان سێ، هەتمەن هەر سێیانیش بێسڵاھ ئەو کەل ناتنە. ئێجوورە ڕکیانێگ تا ئێرنگە وە سەرم ناتۊد… وە گومانم جوور کەسێگ لە سییەی زمسان ژەنانۊنەێ وەفراوێگا ڕکیامەو. وە زوور مرکم لە بان زرانییم قرار دام. ئەوەگە خسۊنەو ئاخر گردمە نیشانە. ئێرنگە دی جوور ئەو مەوقە ک هاتۊنەو کەل وە کورزم کورزم ڕێ نەکردن، گورجرترەو بۊن و وە قایمتر گام وەشانن. لە دەرۊنم کیشوکەوانێگ بۊ… تەقە لێیان بکەم یا نە…؟ گیان ئایهمێگ لە نواێ مانگاێگ!؟ شەهات مەرج ئەوگ وەن دزی لە ئیمە ناسەو یە بۊیە، تا دزی نەکەێ ژنە پێ نیەن. جوور خوەم ک وە زوور جەم و هاوکوڕەیل چێمە دزی… دڵدار بۊن، ئێجوورە بۊیه…! چشتێگ ک لە بن زاتما هەر خوەشەو پێ نێیاشتم… . پڕپاڕ تک دڵ خوەم کەفتەو هۊرم، لە پەڕ پەچیهگە… خودا زانێدیش ئەگەر هاوکوڕەگان دەم وەرکەگە نەگردانەو و پەلەکڕنێ نەکردان م کاوڕ هار نەۊم… .
شەهات دەزۊرانەگەێ چەوەڕێ یەسە وە مانگابازێ منەو بۊنێدەێ تا بەڵێ بێیەێدە پێ. هەر ئەوجوورەگ لە ناو توخمارەێ من و ژنەم شەرتە، جوورێگ لە بازیێگ بۊ. ئەمان بەختەوەرانە ئەو دۊاێ ئابادیەگەمان کوڕ بۊن وە دزییهو نیەناسن، دڕگدار بۊن ها کارکردنەو لە ناوێیان.
خوەیشک خوەێ پڕ چەو تماشاێ باڵاێان نەکرد. ساێهگانێیان لە ناو نۊر کاڵ دارتهل سەر کەل، چۊنە پەیشتیاۊدە یەکا، دیار نەۊ چەن کەسن. ئەمان هەر ئەو ئەژم تەماویشه دیار کرد شەڵەتەکوڕن.
یە قەێرێگە هەناێ بوودە وادەێ خەو، وە هوو قەردێگ باێهس سەر مانگ بێیهمەو، خەوم پەڕێد هیچ، ئەو دۊاێ کولووریهیل ژیانم دەم وا کەن. لەواێ ئێوارە جوور کەسێگ دیانێ کولوور بوود و چشت شیرینێ خواردۊد وە پیم کەێد. ناو سەرم بوودە سەگەڕاو، خەو لە باڵ چەوم نیەکەفێد. یانە گ دیم ئڕا دزی هاتنەسەو کەل دو سێ جار چەوم فلیقانم، دجارە نووڕسم نەواێ وە قەوڵ ژنەم ک ئۊشێ فامد نەمەنێیه شێویاۊم، خیاڵ کردم کەسێگ دۊنم. نیەزانم دۊەشەو بۊ یا پێرەشەو لە ژێر جییەگە هڵاژیاۊم و چەوم زڕناقە داۊدە پڕی هەسارەگان ڕێیەگەێ کاوە ک وە تک لەقە دا لە ناو دەنێیانم!
وەت: کوڕ وریاێ، جوور ئسمایل جنازە وە جییەگەوە نەخەنەدە جییهخەرمان.
وەتم: چوە توای لە ئسمایل، ئڕا براگان خوەد نیەۊشی سەرێیان ها ناوگەڵێیان!
وەت: قەومەگان خوەد ئڕا نیەۊشی؟ هە براگان منن، ئەلهەمدلا بۊیەسە کسب گشتێ.
وەتم: ئەمان بنووڕە م جوور شێر هیچە دەورم نییە.
کردەو جواو: خوەزێیەو گەرت بکیشیاید جوور مەردم، ئەمان تفاق بێیاشتاێ…
وەتمە پێ: تفاق جوور براگاند!؟ م شاێهد دێر کەفتۊمەو خوەم ئەمان، پیاێ لە چل ساڵان دەنەێ جفت بوود، منیش ئێرنگە دەنێیم جفت بۊیە…
چەو لێ تەنگەو کردم، تواسم بخەمێیەو هۊر چشتێگ ک هەر لە بەێن خوەمان بۊ. وە تۊلەکیەو وەتم: هەر کەس نەزانێ ت زانی…
بزکەێگ کرد و وەت: ئەک ماڵێگدە گولە ئڕا ڤیڕەد…
ئشتبا نەکردۊم، وە گومانم لە سەر شوون یەک ڕێ کردن، پەیشتیانە ناو یەکا، ئاێهم خسنە شکەو. لە دەر ماڵ ئیمە وسانە یهێ ڕزار، سێیان بۊن، سێیان! چمان هسارەگان ئەوقەرە دۊرەو بۊن، نۊرێیان بێنزەو بۊد. سیاتگی ئاسمان هاتۊدە زەۊ. لەو تیەریکەشەوەیلە بۊیە ک دزەیل خوێڕاو وادەێ دەنە پێیان. ئەژم ساێهگانێیان هەناێ وە سەرپەنجە گام هەڵگرتن ڕخ خسە گیان ئاێهم. خوەزێیهو منیش هەر وەێ دڵنیای یانه ک ڕێ کەن، سوو بچیاتام وەرەو قەرتدارەگانم.
یانە دانە لە کەێان. م ک وە خلگە بێماڵ بۊن ناو دراوردۊم، دار و نەدارم چەن گلە میەلەڕ قەرتی و مانگاێ بازێگیش ک ئەگەر بفرووشیامەێ ئڕا قەرتدار، باێه ئڕا جامێ دوو بچیایمە دەر ماڵ مەردم، یە گشت زانن. وریایشم، لەبە چرچ قەرتدار ها لە بەخەڵم، هەر خەو نەێرم. داێەم لە خەو هەڵپەڕم. یە هاڵ گشتێ مەردم لەێ وڵاتەسە… لە کەم شانسی ئیمە بۊمنەسە هاوپەڕهێ ئێلێگ ک باوەڕ دزی لە ناوێیان بۊیەسە خاس. جوانەگانێیان چمان ئڕا دزی کردن تیەنە دنیا… لەبە مەشق دزی کەن چمان گردیدە کیشایدەسان، لەبە دەس و پاێان شووڕە! دزی لە خوەێان مەێنە، ئەمان لە ئەودۊاێ مەردم مەێن نیەو مناێگ نەیرێ.
چەوم زڕناقە داۊد لە ناو کۊچە، هناسم جوور هناس کەوکێگ ک تازە بەن کریاۊد کڕ خس. چەوەیلم تێژەو بۊن، تا تەنانەتێ مەلەوەریل ڕێزێگ ک لە دەور لامپ سەر کەل باڵ دان، دیم. گووشم زوور ئڵاجەۊێگ گرتۊد… دەنگ هناس کیشان دزەگانیش هاتە پیما. چشت نادیاریێگ چمان ڕێ هناس کیشانم گرت، دڵم لەبە پڕان و خۊن ڕەسییه پێ لە ناو قەفەسەێ سینێیم جیێ نەۊەو. تواس لە دەمم باێدەو دەیشت، دی هە لە ناو دەمم پڕان.
چمان ساێهگان ئەوان هاتۊد و پەیشتیاۊدە لەشما. هەرەسەم تەنگ کردن. ساێەی یانە زوورێیان لە چوە گرێد نیەزانم! لەبە وە ئتمینانەو هاتن وەرەو ماڵەگان چمان وەرەو سەر کڵاسێ چین ک فرە ئڕاێ دەرس خوەنۊن. سیەوێیان لە ژێر پەتووەگە کردۊدەمە کوچگ… وە یەێ دەس پەتووەگە هاوردۊمە مل دەمماو هەر چەوەیلم مەنە دەیشتەو. نووڕسمە ئاسمان چ تیەریکەشەوێگ بۊ. هەر خاس بۊ فەسڵێگ نەۊ ئەور وە ئاسمانەو بوود، وەنە دەق وە ئاێهم کرد… .
وه یەێ دەس پەتووەگە کیشامە مل دەماو وەو دەسەگە لە بانئەنوود ژێرخان ژێرم لەپەکوتی کردم، بێجگە چەن سرۊت پۊترکیاێ دەسم وە قەێ هیچەو نێیاد… مەقزم هیچ نەڵووڕی… پڕێ لە دەسم چۊد. گڕێ یەێ جا ئاو دەمم وە گریە قۊرتا دام… تا ناو دەمم بۊیە چیلێ. دی چشتێ نەمەن قۊرتا بێیهم. ئەمان چشتەیلێگ لە بن زەینم دڵنیای دادنە پیم. دەسم چیه مل گورز ئەرجنەگەێا. دەورەی نەمەنێیه وە گورز دز بگری. گورز لە لاێ ئێ ناوقەێجەڕیایلە مناڵبازەکی بۊ. هەتمەن پڕ قەێان سڵاھ بۊ. بێجگە یە، ئەوان ساتێگە ڕێ کردنەو گورجن، تو هێمان گیاند پەشێو ژێر جییەگەس، لەوا تیەن ک لە ناو خەو گیرد بارن.
لەپەکوتی ئڕا ئەوەکە کردم، دۊیەشەو ناۊمەێ ژۊیەر سەرم. نەواێ ژنە لە تاو مناڵەگان لە وەر دەس لاوردۊدەێ. ئێ پەژارە داگرتەم. تا هێزێ بێیەم بارمەێ یانە هەم مانگاگهم لە تەۊلە درارن هەم خوەم بەترەف کەن. لەپەکوتی کردم ناهمێیهری داگرتۊدەم. لەپەکوتی کردم ک دەسم دادە قەێ چشتێگەو… سەرد و ساف بۊ، بەڵی! براێ ڕووژ تەنگم بۊ… هناس ڕەهەتێگ کیشام…
ئەگەر لەێرە بناتامە پێیانەو، دو دۊیەتەم و سێ کوڕەم ناۊمەو بانێ. ئەگەریش لە هەڵواڕکیانێ چشتێگە پێیان ناتاد، بوونە گولەێ وێلێگ لە ناوێنمان. پووڕێد یانە بێدەنگ بووسن…؟ هەناێ تیەنەو کەل هەرچێگ بتواێد نواێان بگرێد، چۊچننەێ. زوورم جوان تازەجووشن ئێ جوورە تیەنە دزی، ئڕا یەگ ناودارەو بوون و لە ناو هاوسن و ساڵەگانێیان وە شانازییەو بۊشنەێ. ئڕا یەگ دۊیەت بەنە پێیان، ئڕا یەگ دۊیەتەیل وە پیای بۊنێیان دڵنیا بکەن.
دۊیەتە بۊچگەگەم تەون دز بردێیهسەێ… لە پارەکەوە ک دان لە ماڵ “ئەلیپەنا”. وە گولە ژێر بەخەڵێ ئاژاننەو، گشت وەتن : ئلاهی شکر، بەس نییە بەێ لە بەێ بەتر نەۊیە، ئەگەر بکوشتانەێ چوە!؟
دۊەتەم تەوەن بردێیهسەێ… هە جوور “ئەلیپەنا” ک دی ئەو کوڕ جارانە نییە، چمان پاڕخەێ تواێد هاڵا هاڵا لە گیانێ بمینێد. وە گومانم هاڵ ڕووژ ئەو پیاێ دو مترییە بۊیەسە پرسیار ئڕاێ… .
هەر ئۊشێ باوگە: دز چوەس؟ منی هەر ئۊشم دز ئاێهمێگە جوور خوەمان. ئەمان، قانێ نیەود… دجارە پرسێد دز چوەس…؟ وە گومانم ئەۊ خاس ڕەسیەسەو لە ماناێ دز… . چوە تۊیەنی پیایێگ جوور “ئەلیپەنا” ک گاوەسن وە تەنیا هێز دەێد، لەوا لە گل بخەێد!؟ باێەس دێوەزماێگ لە ناو سەر خوەێ لێ سازۊد ک هەرچێگ ئڕاێ ئۊشی قانێ نیەود. شەوانە گاجار لە دەنگ قیژەێ لە خەو هەڵپەڕینێ هەڵسم. دەنگ داڵگێ شنەوم ک وەرجە م ڕەسیەسە پێ…
-ها ڕووڵە نامەی بگرێدەد، دەنگ مەڵال! کەسێگ شنەوێد، ئۊشێ دۊیەتەی فڵانی ترسخوو دێرێ، یە بڕیەێدە باڵاد. دی کەس نیەخوازێدەد… دز ها کوو خەو دیدە! مەگەر ئەوە باوگد نییە لە وەرتاێرمەگە خەفتێیه، باوگێیان دراێد… بخەف ڕووڵە خیاڵدیش تەخت، هیچ نییە.
ئەگەر دۊیەتەم باوگێ لەوا بیاتا ک گشت گیانی لە ڕخا بۊیەسە کوچگ جوور وەختێ ئاێەم وەشیاتێگ دۊنێ، هەتمەن هەق دەێدە خوەێ، دز بوودە شەوێ شەوانەێ.
ئێ دەفە بپرسێ دز چوەس؟ ئڕای ئۊشم ک دز ئەسڵەن ئاێهمێگ جوور ئیمە نییە، دز هەیوولاێگە ک وژدان نەیرێ، ئەو بڕە گ لە ناوێیان سقان ترەکنێد و هان دریهن ئڕا ئێ جوورە کارەیلێگ، لە خوەێ بەتر، ئەسڵەن لە ناو گیانەوەریل تەنیا یەێ گلەێان لە خوەێ دڕێد و کوشێد ئەوەیشە ئاێەمە.
لە ژێر جییەگەوە چەومە پێیان بۊ… مانگابازێ لە تەۊلە دراوردن، خوەێ نەۊ کەفتۊد وەلێیانا. چمان سیەوێیان گرتۊدەێ، نە سەر وەشان و نە زوورزمەکی کرد. ترسم چەن ڕووژ ئێ دزەیلە بوونە خاوەنێ، هەناێ سەونزەگیا خەنە وەرێ بازی بکەێد ئەولێیانا. هەر ئەوجوورەگ ئەول ژنەما کەێد.
ژنەم گیانێ له قەێ گیان مانگابازێیهو بۊ. چوو تاۊ و لەپگ کەو وە دواوە داێهم لە ملێ نیەکەفێد. جل نوو ئڕاێ دۊرنێدن. ئەۊیش وە پێیهو وە قووزێگەو خنجگە کەێد. هەناێ دووشێدەێ لاونێدەوەێ، ئەۊیش مفنێد و سەر لەقنێد و گیا خوەێد… چمان هاودۊیەتن… دەنگ قووڕانن ورسیهری یان نەخوەش بۊنێ ناسێد. چەن جار مانگابازێ نەخوەش بۊیەو ژنەم تا شەوەکی خەو لە باڵ چەوێ نەکەفتێیهو لە ناو تەۊلە وە دیارێیهو بۊیه. چەن جار م ئمێدێ وە زنێ بۊن مانگابازێ نێیاشتمە، ئەمان فکر کەم وە خاتر ژنەم، زنێ مەنێیه. دەردێ زانێد، مناڵێ پێچیاۊد یا گوانێ ژان بکەێد، فەوری تەرکێ دەر کەێد… بوردانەێ چوە جواو یەۊ بێیاتام…. .
دجارە دۊاێنەێ گرتمە نیشان، لەێ ناو زڵماتانه خاڵ مەگەسەک کیلوو چەن…! یانە گ لە سەربازی فێر بۊم وە کار نات. ئەگەر دەسم زێیای بکردا جوان مەردم وە خاتر گاێگ بکوشتام چوە؟ دۊاێنە هەر ئەوە بۊیە گ لە ماڵیش دۊا کەسێگ بۊ ک چییهو دەیشت. هەناێ لەپسا چێ چەوێگ هاوردە مل منیشا. لەێ ناو تیەریکی و لە پشت پەڕ دەسڕ پیەنێیهو، چمان ناسیمەێ ئەمان ئەو سەرێ نەچۊم. وە دڵ سزیان ئمێد داشتم، مانگاگە نەوەن تا منیش کەل لە گیانێیان نەخەم… ئەمان گشتێیان وە یاساوڵ فەرزم کردۊن… بردنەێ… بیشتام دەرچییان تانەێ ژنەم لیم بۊیە ڕاس.
لە شوونێیان وە تاو پەتووەگە لە بان خوەم لاوردم، نەزانسم باێهس چوە بکەم… لیم ئاێا بۊ لاێ چەپم جوور ئاێهمێگ سەکتە کردۊد، سەنگینەو کرد. دڵم هەڵقوڵی ک هاوارێ بکەم… هەێ مانگاگەم…! ئەمان، ڕخم ئڕا مناڵەگانم چێ. بەن پەڕانگە پێچانمە دەسەو، بەن شواڵەگەم جەڕانمەو… کڵاشەگانم جووریم، لە وەرتاێرمەگە لە لاێ جییەگەم ناۊمان… هەر لە لام بۊن، چەن خڕ لە شونێیان وە دەور خوەمەو دام… تا دیمان ک هەر هانە پشت پام… وە زوور هەڵکیشامان، چمان وە پام تەنگەو بۊن، زبری مەوڕەگەێان پووس دەسم برد. بێیەگ بزانم چوە کەم کەفتمەو شوونێیان. تا م ڕەسیمە جاێگ لە چەوما دیار بۊن، کەل خوەمان و کەل شانمان ڕەد کردۊن. دڵنگ وەرێیان ڕمووزە تێ نەۊ، تەنیا چشتێگ وەێ شەوار بێرمووز شۊمه قردگێ ڕمووز داشت تۊک چەرمێ مانگابازێ بۊ. ماڵەگان یەک نۊر بێنزێگ داگرسانۊن ک هیچ وەێ شەوار سیەێ قەترانییە نەکرد. ئەو کوورسوویشە تا جاێگ لە ماڵەگان دۊرەو بۊد و چید وەرەو پەڕ باخەگان بۊیە هیچ. ئەلباقی چشتەیلێیان ئەول تیەریکی شەوا تێکەڵ بۊد. ساێه وە ساێهیان چیم. ڕەسۊنە سەر پەرچین و باخەگان دۊ ئابادی. دزێگە لێیان لە پشتا دۊ مانگاگه جەڕانۊدەو تا خاستر ڕێ بکەێد، مانگابازێیش کرجەو بۊد، چمان دەوی. کەسە لێیان وەرەو دۊوا نەکرد، زرنگتر ڕێ کردن. قردگ تر دۊرەو بۊاتان، دی دەربەن قووڕانن مانگایش نەۊن.
“ئەک دڵد دراێ کوڕ…!” لەوا خوەم لە دەس پەشێوەێ خڵاس کردم… .
لەپسا لە تیرڕەسم لاچین. لە باخەگان وەرەولا بچیاتان دی دەس کەس وە پێیان نەڕەسی. فەرمان لە کەمەر ئەو خوار خسن سەربازی کەفتەو هۊرم… لە کەمەر ئەو خوار دەس خەم… باێەس لە مانگابازێیش ئەو دۊر دەس بخسام. گشت هاز گیانم و چەوم کووەو کردم. وە هۊرم نیەتێد، کەسێگ لە دەس وه تیرم خاس وەتۊد، ئەمان ئێرنگە وەخت ئێ گەپەیلە نەۊ…
ئەگەر دەسم زێیای بکرداد و جوان مەردم وە خاتر گاێگ بکوشتام چوە…؟
چەوەیلم دی وە تیەریکی خێ کردۊن. ناد ئەلی هاوردم… نیەزانم کەێ کلکم هاتە مل ماشەێا… چمان لە خەێوا کەسێگ نیشتۊدە پشتێ. هێمان چەوم وە بڵاچەێ دەم لۊلەێ پەڕان بۊ ک بەتاڵمەو بۊ. لە مانگاگە ئەو دۊر تەقانۊم ئەمان پەڕان، ساچمەێ ئەو ناوە گرێدە وەر، لێیان هەتمەن پەخشەو بوود دەێد لە مانگاگەم.
ئەگەر لە چەو کوڕەگان درارێد چوه…!؟
لەواودە لە خوەم نیەگوزەرم، یانە ئڕا مناڵبازەکیێگ هاتۊن. ئەژم شەڵتەکوڕ لە وەر چەوم چمان بەنێگ بۊ گوڵمووڵەێ بکەید. گولەگە ڕمانەێ… ئەو دوانەگە دەس وه کار بۊن… نانە ئەو جییە گ م لە تێ وساۊم… وە زگەو خوەم ڕمانمە ناو جۊیەی تازە درەوکریای پەڕ باخەگان، سرۊتێیان رۊ زگم ئاژانەو….
ناو ئێ بگر بگرە هەوسار مانگابازێ وڵ کریاۊد و وەرەو ماڵ ناۊده دەوا… خنجگە کرد، چمان زانس گووڵ خواردێیه، چمان لە قەپ گورگ سەنۊمەوەی. گیان ئڕاد مانگابازێ! بدەو وەرەو ماڵ… نەمینسە یەگ ساچمە گرتۊدەێ. دی زات نەکردم لە ناو جۊیەگە هەڵسم. دو سێ گولە تر نانە دەوروەرما… واز هاوردن… دەنگ خوتوبووڵێیان هات… لە دەنگ قسیەکردنێیان سەر هێز دام، ساێهێان دیم و دەنگ کڕانن هاودزێیان وە ڕۊ زەۊا هاته گووشما ک ئاژیاۊدەو. بێدەنگی نیشتە بەێنمان، چمان بۊشن خاڵوو ئەوه مانگاگەد، قول هاوکوڕەگەمانیش لە جی ئەزیەتەگەد.
جارێیان چۊدە سەرم، دەس بردم ئڕا فانووسقەێ کەمەرم تفەنگەگە پڕ بکەم. تازە کەفتەو هۊرم ناوردمەسەێ… نز لە خوەم بڕیم، خاس بۊ ناتنەو دیارم و مەردم چرچ لە بەخەڵ ئیمە هاتنەو جی. زوورم سنساڵدارەگان خوەێان ڕەسانۊن. دوان دز هێمان پادار، هاو دزەگەیان کیشان وەرەو ناو گەنمەگان ئەو پەڕ باخ. لە چەوم گوما بۊن… .
مەردم ئاوایی، خڵێف دانە دەورم.
وەتمە پێیان دامە لە یەکێ لێیان قولەیلێ گردێیە، هانە ئێ دەور وەرە. هاج واج نووڕسن، باوەڕ نەکردۊن! تا چینەو سەر خۊن یاروو و شوون کڕاننێ وە بان زەۊوەگەوە. فرە لێیان کوومیانەو قنگڵەقنگ چین، ئەمان خوەم و چەن کەسێگ هەرچێگ گەردیم لە شونێیان چمان بۊدە نمێ ئاو و چۊدە زەۊوا. هەڵپلیامەو ک دەنگ بێنزێگ هانا کردەو پیمان: یەمە لەێرە بان بوەنەم…
زانسۊد دەسمان لێ نیەچوود!
لە هەوڵ گیانێیا زندان و جرمێگ ک سوو تۊیەنس وە پۊل و پارتی بسێنێدەی وە گیان سەن، تەنیا پەژارەیگ ک داشت، شەهات یەۊدە ک تڵسمێ لە ناو مەردم شکیاۊد.
هەناێ، چەومان کەفت لە کوڕ خەڵپان لە خۊن، واقمان پەڕی…!
“خاڵوو ئەسەد” لە پشتا دا لە ناوبڕەمان، هاتە بان سەر دز، وە زوور قسەگە لە ناو دەمێ چەرخی.
وەت: ت دەسکیش دزەیل وە ئابادی خوەمانید!؟
دەسکیش دزەگان، براێ ژنەم بۊ! ئڕا خاتر مفتەکیشان لە دەورێیان، ئاگر ناۊدە ماڵ خوەیشکەگەێهو. هەر د هاودزەگەێ دادە ژێر دارەو، ئتراف ئڕاێان کرد. وە تاو ژێر بەخەڵێ گرتیم هاوردیمەوەێ وەرەو ماڵ. ئەو پاێ وە ڕۊ زەۊوا کڕەێ هات… خۊنێ نەوسادەو… .
ڕەسۊمنە دۊر نزیک ماڵەگان، نووڕسمە دەمچەوێیهو، سەر ئەو بان نەکرد. ئەمان دیار نەۊ لە خجاڵەتی یا لە بێهاڵی. کڕێگ لە خۊن لە شوونێ بۊ، ئەمان جادەگە چمان گشت کڕ خۊن بۊ. کەسێ وە پیریمەو نات، نەواێ لە قاڵوباڵێ ک خەو گشتێ پەڕانۊد، یان لە خەوا ناتۊن!؟
چراخ تەۊلەگە ڕووشن بۊ، چێم وەرەو ئەورە. پەڕانەگە نامە چز دیوار سیمانی و کوچگین تەۊلەوه لە ناو ساڕووکی دیوارەگان تا دۊیەتەم نەۊنێدەێ. کەس نەخەفتۊد. گشتێیان وساۊنه مل سەر مانگابازێیا ک دڤناکێ چەن بەراێبەر وشاوە بۊد. هناسێ وە زوور هاتە بان. گاجار سەر هێز دا نووڕسە کونایل خۊنوەدەمە گ لە گیانێ بۊ… ملێ سەرێ نەڵگرت و وە قایم دا لە زەۊ، ناو دڵم ئڕای خایس کرد. ساچمە ئاژانۊدەوەێ… هەناێ هڵالێ کردیم ڕەسیمنەو ساچمە تا کووراێ کونا کردۊد و چۊدەو ناو لە لێ. ژنەم ک کەت براگەێ شنەفتۊد، نەزانس وەێ مانگاگە بگرێدە سەر، یا براگەێ… .