هساره ماڵپەڕ هسارە سه‌ر وه هیچ لایه‌نێگ نییه و ته‌نیا ئامانجێ خزمه‌ت كردن و پێشخستن زوان و ئه‌ده‌بیات و فه‌رهه‌نگ كوردیە /ماڵپەڕ هسارە له وێراشته‌كردن ده‌قه‌یل ئیوه‌‌ێ هه‌نین ئازاده
م دووسد دێرم
ئەوقرە گ تیر کەمان ئارش بچوود
چەنە زوور بازوو رووسەم
چەنە پاکی خۊن سیاوەخش
شایەدی فێشتر
م دووسد دێرم
چەنە گڕەێ دڵ داڵگ ئەڕا کوورپە
چەنە سەر سەختیی باوگ
قەد تەرەک تەرەکەیل بان پووس دەسێ
شایەدی فێشتر
م دووسد دێرم
چەنە تامازروو بۊن مناڵ ئەڕا ئەسپاو بازی
ئەڕا وەیلکان و تاوە تاوە
تا ئاخرین شومارە گ زانی
هەفت گله،نوو گلە…
شایەدی فێشتر
م دووسد دێرم
چەنە زکرەیلێ گ داپیرم هەر رووژ خوەنێ
چەنە هرمەت باپیرم
وە ئەنازەێ دڵپاکیی مەردم ئەوسا
شایەدی فێشتر
م دووسد دێرم
چەنە وەهار و خونچەێ پەلپوو دارەیل
قەد هڵم گەرماێ تاوسان
چەنە زوور واێ پاییز و سەردیی زمسان
شایەدی فێشتر
م دووسد دێرم
چەنە قوڵپە قوڵپ ئاو کیەنی وەر ماڵەیل
چەنە هنکی ئاو کونە
جوور دڵنشینی ساڕکی کووڵا
شایەدی فێشتر
م دووسد دێرم
چەنە بێقراری ئاێم چەوەڕێ
چەنە هۊرد بۊن ئاێم دڵشکیا
قەد سەختی دڵکەنین و دڵ بڕین
شایەدی فێشتر
م دووسد دێرم
تا ئەور، تا ئاسمان
تا ئەورە گ نە کەسێ دییە نە شنەفتێیە
تا هەناز خودا
شایەدی فێشتر
م دووسد دێرم
م دووسد دێرم
