نۊسنەر: موستەفا ڕەحمان دووست
.
ڕووژەیل ئەوەڵ وەهار بۊ،زمسان لە سەرەو چۊد وە سەر یەوە “گوڵ تڵا” وڕینەێ وەفرە شیرە کردۊد.
لە شوون خوەێ ئەڵسادەو پاو چێ ئڕا لاێ داپیرێ
وەت:” داپیرە ،م هەم وەفرە شیرە توام”
داپیرە بۊیە خەنێ و وە دەنگ ڕەنگینێگەو دەس کرد وە شێعر خوەنین ئڕاێ،وەت:
“نە وەفــر مــــەن نە شیــــرە
زمســـــان چێــیــە لە ئێــــــرە
وەهار هاتــێیە هەم لە نـــــوو
گوڵ کەێــدن چۊزە و چــروو
ڕووڵە بچــوو وەرەو دەیشت
لە بووسان بکە گوڵ گەیشت.”
نەخەێر گوڵ تڵا گووش نەتەکان لە داپیرە!
خوەشێ هات داپیرە قردگێ شیرە بکەێدە ناو جامێگ و یەێ مشت وەفر تەمیس بخەێدە ناو شیرەگەێا و یەۊ وە قاشق بنیشێدەو سەرێ بخوەێدەێ
-م وەفــــــرە شیــــــرە تواااااااام…
داپیرەگ دی گوڵ تڵا وڵ کەر نییە و هەر دو پا کردێیە لە یەێ کەوشەو و وەفرە شیرە تواێ، چەوێ هڵاوردە کۊیەیل دەور ئاوایا ،کۊیەگان هێمان کڵاوەێ وەفر وە سەرێانەو بۊ، هناس گەوراێ کیشا و وەت:
“خوەزێەو قاچ و قول بێیاشتام و بچیام لە بەرزی کۊیەگە لەو کڵاوەێ چەرمێیە وەفر ئڕاد باوردام.
خوەزێەو دڵ ساف کافێگ جوور “هەمەناز” بێیاشتام و بچیامە شوون “چوار برا” تا وەفر لە لێیان ئڕاد بسێنم.
ئاخ و داخ لە دەس پیری ک نە قاچ و قول ئڕام هیشتێیە نە دڵ ساف و کاف مناڵێ جور” هەمەناز”
ئێ کەش دجارە دەس کرد وە شێعر خوەنین و وەت:
“مناڵـــی چـــێ،جوانی چـــێ
دەســـم لەرزێ،دڵم لــــــەرزێ
مانگەیل چێن و زمسان هات
وەفـر پیــــــری ئەو سەر ناد”
گوڵ تڵا چەوێ کەفت لە چووڕ ئرمسێگ ک لە سۊک چەو داپیرەێا هاتەو خوار.
دڵێ ئڕاێ سزیا و وەت:
“داپیرە یە خوو خەم خواردن نەێرێد،بم هەم قاچ و قول دێرم و هەمیش مناڵم و وە قەوڵ خوەد وەتەنی دڵم ساف و کافە، ئێرنگە چم کەوش و کڵاو کەم و کەفمە ڕێیا وەر ئەو بەرزی کۊیەگە.ئمجا وە پیم بۊش لە کوورە “چوار برا”بۊنمەو ؟تا جوور “هەمەناز” وەفر لە لێیان بسێنم.
داپیرە وەت:”مەتەڵ “هەمەناز و چوار برا”مەتەڵ دریژێگە، ڕپد بار ئەو زەۊ تا ئڕاد بۊشمەێ،گاهس لە ناو مەتەڵەگە شوون چوار برا بۊنیدەو.”
گوڵ تڵا وەت:”ئمجا مەتەڵەگە کوڵ و کوڵ بڕ بۊشەێ لەپسا ئڕا وەفرە شیرە دەق کەم”
داپیرە وە سۊک دەورملەگەێ ئەسرەیل چەوێ سڕیەو وەت:
“یەکێ بۊ و یەکێ نەۊ،دۊیەتە بۊچگڵەێ بۊ ناوێ “هەمەناز” بۊ، لە بەخت گەنێ هێمان مناڵ بۊ باوگ و داڵگێ مردن و خوەێ چێ ئڕا ماڵ یەکێ بۊ وە کوڵفەتێیان.
ژن خاون ماڵیش دۊیەتێ داشت،”فرەناز”ناوێ بۊ، فرەناز فرە ڕۊدار و بێ ئەغماز بۊ. گشتێ هاوسایل بەدێیان لە لێ هات، ئمجا هاوساگان فرە دووس هەمەناز داشتن.
داڵگ فرەناز ک دی کەسێ خوەشێ لە دۊیەتەێ خوەێ نیەتیەێد و گشتێ دووس هەمەناز دێرن ئمجا دی بەدێ لە هەمەناز هات و هەرچێ خەم و خوسەو ناڕەهەتی خوەێە ڕشانە مل سەر هەمەناز بەدبەختا.
توواس هەر جوورێ بۊیە هەمەناز وە پاێ خوەێ لە ماڵەگەێان بچوودە ڕێیەو تا دی هاوساگان دپیەک ڕەفتار دۊیەتەێ وەل هەمەنازا نەکەن و وە هاوماڵ یەک نەکەنان.
ئێ کەیش ئەگەر هەمەناز وە پاێ خوەێ بچیادە ڕێیەو هاوساگان نەوەتن ئێ ژنە ئێ قردگ مناڵ بەدبەختە لە ماڵ کردەو دەیشت.
ئمجا هەر ڕووژێ یەێ کەت وە سەر ئێ دۊیەت بەدبەختە هاورد و نەیشت گڕێگ بنیشێدەو زەۊ و تەزێ دەرچوود،گوڕاێ گوڕ و لە شوون یەک هە کار داد وە پێ تا وڵەکەتێ بکەێد.
هەمەناز دی لە گیان خوەێ سێر بۊد .خوەشێ هات لە ئەو ماڵە بچوودە ڕێیەو،وەلی نە قەومێگ داشت و نە کەس و کارێگ تا پەلامارێیان بوەێد.
لە سەر یە هەر چێ ژن کوڵ وە پێ کرد دێیان نا وە مل جگر خوەێا و هە چەوێ وە ئاسمان بۊ شاێەد خودا چەوێگ هڵاڵێد وە پێیا و لەێ گرفتاریە بڕەسێ وە دادێ.
ڕووژێ لە ڕووژەیل ژن خاون ماڵ چاشت و قەواڵتێ فرە خاسێگ داد وە فرەناز دۊیەتێ و یەێ چەپاڵ نان وشکیش داد وە هەمەناز.
ئێ کەش فکرەو کرد کەتێ وە سەر هەمەناز بارێد.وەت:
“ئە دۊیەتەگە هەڵسەو پاو بچوو لەێ کۊیە چەپێ گوڵ بار تا بنەم وە تاقەگەوە گاهس دڵم شادەو بوود.
هەمەناز بێچارە چەوێ هڵاوردە دەیشتا.
زمسان بۊ و پسا وەفر و واران لە سەر سەیل کرد.
هەمەناز قردگێ ئێ پاو ئەو پا کردو وەت:
“ئاخە خانم م وە ئێ زمسانەو وە ئێ وەفرەلۊلە بچم لە کوو گوڵ بۊنمەو؟؟!
ژن خاون ماڵ کردەێ وە قاڵەێ قاڵ و وەت:
“ئەنۊ م خەرج ت ئڕا چوە دەم؟نان خوەر نیەتوام…زۊ کە نامەی گرتێ بێ گل گیان. هەڵسەو پاو بچوو چەپگێ گوڵ ئڕام بار، م چوە بکەم زمسانەو وەفر وارێ!!!؟زۊ کە داجم لە وەر چەوم نەوسیە.تا گوڵ ناوردیدە نایدەو ئڕا ئێ ماڵە.
کردە کوڵە چوێگاو هات ئڕا هەمەناز.
هەمەنازیش وە هەڵەپڵە دەرچێ و بێ یەگ دڵنگ گەرمێ بکەێد لە وەر کەفتە ڕێیا،وەر کردە ئێ دەیشتەێا.لە سەرما هاز لە گیانێ نەمەنۊد و دێیانەیلێ بان یەک نەگرت.
وەفر گشتێ وڵات داپووشاۊد، وەڵنگ سەونزێگیش وە قەێ دارێگا نەۊ چ بڕەسێ وە گوڵ.
هەمەناز چەوێ هڵاوردە ئاسمان پڕ لە ئەور سییەێا و لە وەر خوەێەو وەت:
“خودا،خـــوداگەێ چــارەساز
چەوێ هـــڵاڵ ئەو هەمـــەناز
تاقەت و سەور بێیە وە پیـــم
دڵێگ جوور ئەور بێیە وە پیم
چەپگەێ گوڵ لە کەو کەوین
ئڕام بـــخە لــە ڕۊ زەمیــــن”
هەمەناز دی هاز لە پایلێ نەمەنۊد و دەسەیلێ ڕچگیاۊد، یەێ هەو وە چەوەیل پڕ لە ئرمسەو چەوێ کەفت لە ترۊسکەێ ئاگرێگ ک لە دۊرەو دیار بۊ، نادە دەوا وەرەو ئاگر تا گەرم خوەێەو بکەێد.
لە دەور ئاگر چوار گلە ریش چەرمێ نیشتۊن.
یەکێگێیان دڵنگ سەونز ڕەنگ لە وەرێ بۊ،یەکێ دڵنگ سۊیەر ڕەنگ، یەکێ زەرد و یەکێ چەرمێ.
هەمەناز تا چەوێ کەفت لە لێیان سڵامێیان کرد.
ڕیش چەرمێیەگە ک دڵنگ چەرمێ لە وەرێ بۊ جواو سڵامەگەێ دادەو و خوڵکێ کرد ئڕا لاێ ئاگرەگە. وەت:
“دۊیەتە خاسەگەم وە ئێ سەردەوا گ سانیش لە سەرما تەرەکیەێد لەێرە چوە کەید و ئڕا چوە هاتیدە؟؟؟!”
هەمەنازیش هۊرد و هراش ژیان خوەێ ئڕا ڕیش چەرمێ
وەت.
لە دۊاێا وەت:”ئێرنگە باێەس چەپگێ گوڵ ئڕا خانم بوەم”
ڕیش چەرمێ ، چەرمێ لە وەر ڕۊ کردەو ڕیش چەرمێ سەونزەقوا .وەت:
“براگەم هەر ت تۊیەنی چەپگێ گوڵ بێیەید وە ئێ دۊیەت بێچارە.”
ڕیش چەرمێ سەونزە قوا وەت:
“وە بان هەر دو چەوم.”
هەڵسادەو پاو دەس هەمەناز گرت و کەفتە ڕێیا.
تا کەفتە ڕێیا وەفرەگان لە وەر پاێ بۊن وە ئاو و دارەگان قوڵچووخ کیشان و چیمەنەگان جیق دان. هەرچێ گوڵە لە ژێر خەڕگ سەر هاوردنەو بان و گوڵ چەقانن.
هەمەنازیش وە خوەشڵە خوەشی چەپگێ گوڵ کەنیەو و لە ڕیش چەرمیەیل خودا سپاردی کرد و شکر خودا کرد و کەفتە ڕێیا
ژن خاون ماڵ لە پسا خوەێ گورجەو کرد تا بچوود وە هاوساگان بۊشێد، هەمەناز سەرێ چییە و گوما بۊیە.
لە وەر خوەێەو وەت: ” ئەگەر ئێرنگە لە زقم ڕیقیەو نەوردۊد لە چنگ گورگ گیان دەر نەکردێیە.”
هێمان پا لە دەر ماڵ ئەو دەیشت نەناۊد، چەوێ کەفت لە هەمەناز وە چەپگێ گوڵ قرمزەو وە دەمەخەن لە دۊرا تیەێد.
ژن خاون ماڵ هە یە مەنۊد جفتێ شاخ لە بان سەرێ دراێد، وەخت بۊ لە خوسە هەڵترەقێد،ئمجا وە ڕۊ خوەێا ناورد.
گوڵەیل لە هەمەناز سەن و وە خوت و بوڵ چییەو ناو ماڵ.
زمسان چەرمێ پووش چیەو سەر و وەهار سەر سەوز شوونێ گرت.
یەی ڕووژ ژن خاون ماڵ چڕی ئەو هەمەناز و وەت:
“ئە دۊیەتەگە هەڵسەو پا بچوو یەی سەوەتە سێف بار، ئمشەو مێوان دیریم.”
هەمەناز وەت:
“خانم هێمان ئەوەڵ وەهارە ،دارە سێفەگان هێمان تازە چۊزە چەقاننە، م بچم سێف لە کوورە بارم؟”
ژن خاون ماڵ کردەێ وە قاڵەێ قاڵ و وەت:
“یا هە ئێرنگە چید سەوەتەێ سێف ئڕام تیەری ،یا چید و لا ئەو دۊاێ خوەد نیەکەی.”
هەمەناز وە دڵ شکیاێ ئرمس زایە ناو چەوێ ،کەفتە ڕێیا وەرەو باخ.
وەهار بۊ و پەل دارەیل تازە چۊزە داۊن، هەر چێ چەو گل داد هیچ کام لە دارەیل هە یەێ سێفیش وە قەێ پەلەو نێیاشتن.
هەمەناز دی هاز لە ناو قولەیلێ نەمەنۊد.
شەکەت و وڵەکەت نیشت ئەو بان سانێگ ، چەوێ هڵاورد وە ئاسمان کەوا، گوڵە گوڵەی ئەور چەرمێ وە ئاسمانەو بۊ، لە وەر خوەێەو دەس کرد وە شێعر خوەنین.وەت:
“خودا خــــوداگەێ چارەساز
چـــــەوێ هڵاڵ ئەو هەمەناز
تاقەت و ســـەور بێیە وە پیم
دڵێگ جوور ئەور بێیە وە پیم
چۊزەێ دارەیل خــــوداێ م
بکـــــە میـــــــوە ئــــڕاێ م
لەێ ئانە کردەێ وا هێڵان و هڕ و بیڤ، ئەور سەر تاێ سەر ئاسمان داپووشاد و کردەێ وە گرمەهڕ و بڵاچە و واران داێا.
هەمەناز چەوێ گل داد وە ئێ لا و ئەو لاێا تا جیێگ بۊنێدەو تا دۊاێ واران لە ژێرێ داکاسیەێد.چەوێ کەفت لە چەرداخێ لە دۊرەو دیار بۊ.
وە هەڵک دەو خوەێ ڕەسانە لاێ چەرداخ، چەوێ کەفت لە چوار ڕیش چەرمێ ک لە وەرز زمسان چۊدە لاێان!!سڵامێیان کرد.
ڕیش چەرمێ سەونزه قوا جواوێ دادەو وەت:
“دۊیەتە خاسەگەم وەێ واران و لافاوە لەێ دەیشتە چوە کەید؟”
هەمەناز لەێ نوو نیشت هۊرد و هراش گەپ خوەێ ئڕاێان وەت.
ڕیش چەرمێ سەوزە قوا ڕۊ کرد ئەو ئەوەگ دڵنگ سۊیەر ڕەنگ لە وەرێ بۊ،وەت:
“براگەم کار کار خوەدە، هە ت تۊیەنی بڕەسی وە داد ئێ دۊیەت بێچاره.”
ڕیش چەرمێ سۊیەر لە وەر وەت:
“ئەێ وە بان هەر دو چەوم”
لە شوون خوەێ هەڵسادەو پا و گرت لە دەس هەمەناز و کەفتە ڕێیا.
واران کردەو و هوا گەرمەو بۊ جوور وەرز تاوسان.
دارەیل گوڵ چەقانن و گوڵەگان بۊن وە میوە، گیشتێ دارەیل لە ژێر بەر لق چەمانن.
هەمەناز یەێ سەوەتە سێف لە دارەیل هەڵچان و لە ڕیش چەرمیەل خودا سپاردی کرد، لە دڵەو شکر خوداێ گەورا کرد و کەفت وە ڕێیا وەر ئەو ماڵ…
ژن خاون ماڵ لە پسا ئڕا هاوساگان وەت هەمەناز گوم بۊیە، لەێ ئانە چەوێ کەفت لە هەمەناز وە یەێ سەوەتە سێفەو وە دەمەخەن لە دۊرا داد.
ژنەیل هاوسا تا چەوێیان کەفت لە هەمەناز شادەو بۊن و ماچێ کردن، وەڵام ژن خاون ماڵ چمان هە هەمەناز نەۊد، ناو برۊانێ چێ لە یەک و سۊلە کردە ماڵەو، ئێ کەیش سەرێ سڕ مەنۊد ک ئێ دۊیەتە ئێ هەمگە سێفە لە کوو هاوردێیە، ئمجا وە ڕۊ خوەێیا ناورد و هەم لە نوو یەێ وڵات داد وە هەمەناز بێچارە و وەت:
“ئە دۊیەتەگە دەسد بجمن ئمشەو مێوان دیریم.”
وەهار سەر سەوز لە سەرەو چێ و وەرز تاوسان گەرم هات.
ژن خاون ماڵ گشتێ ئێڕووژەیلە لە هۊر ڕێوڕەنگ تازەێ بۊ تا وە سەر هەمەناز بارێد.
یەکێ لە ڕووژەیل ک هەمەناز لە وەیشت گەرما و کار فره گیشتێ گیانێ بۊد وە نەتڵ ئاو، ژن خاون ماڵ وە سەوەتەێگەو هاتە بان سەر هەمەناز و وەت:
“هە ئێرنگە بکەفە ڕێیا و بچوو پڕ ئێ سەوەتە ئنار و پرتقاڵ بار و زۊزی بەورەو ک ئەگەر دێر بایدەو ڕێید وە ئێ ماڵە نیەم.
هەمەناز سەوەتە لە ژن سەن و شەکەت و وڵەکەت کەفتە ڕێیا وەر ئەو باخ، وڵام نە ئنارێگ وە قەێ دارەیلەو بۊ و نە پرتقاڵ.
ئەو قەرە چی وەرەو نووا تا ڕەسی وە بێیاوانێگ. چووڵ بڕی بێاوان وە جی تا لە دۊرەو چەوێ کەفت لە تەنیا دارێگ .ناد وە دەوا وەرەو دار تا بچوود ساتێ لە ژێر ساکی دارەگە داکاسیەێد،تا ڕەسی وە تەنیا دارا لەی نوو چەوێ کەفت لە چوار ڕیش چەرمێ،
ڕیش چەرمێ سۊیەر لە وەر چڕی ئەو هەمەناز و وەت:
“ڕووڵە وەێ گەرم تاوسانە ئڕا لە ماڵ دایدەسەو دەیشت ،هاتێدە لەێ بێیاوانە چوە بکەید؟”
هەمەناز لە نوو هۊرد و هراش گەپ خوەێ ئڕاێان وەت، تا ڕەسی وە پەڵپ ژن خاون ماڵ.
ڕیش چەرمێ سۊیەر لەوەر ڕۊ کرد ئەو ڕیش چەرمێ زەرد لەوەر، وەت:
“براگەم هە خوەد تۊیەنی بڕەسی وە داد ئێ دۊیەت بێچارە و ئنار و پرتقاڵ بێیەی وە پێ.”
ڕیش چەرمێ زەرد لە وەر وەت :
“ئەێ وە بان هەر دو چەوم.”
لە شوون خوەێ هەڵساد ئەو پا و دەس هەمەناز گرت و کەفتە ڕێیا.
وە یەێ هەو گەرماێ تاوسان چێ و بۊ وە واهێڵان و وەرز پایز هات، وەڵنگ دارەیل زەرد و بوورەو بۊن و گلە گلە دارەیل ئنار و پرتقاڵ بەر دان.
هەمەناز یەێ سەوەتە ئنار و پرتقاڵ لە دارەیل هەڵچان و لە ڕیش چەرمێیەیل خودا سپاردی کرد و لە ناو دڵەو شکر خودا کرد و کەفتە ڕێیا وەرەو ماڵ
ژن خاون ماڵ گیشتێ ژنەیل ماڵ هاوسا کووەو کردۊد و لە پسا گەپ گوم بۊن هەمەناز ئڕاێان داد.
یەێ هەو چەوێ کەفت لە هەمەناز وە سەوەتەێ ئنار و پرتقاڵەو وە دەمەخەنێ لە دۊرا هات، تا ڕەسی وە دەر ماڵ ژنەیل ماڵ هاوسا چەوێیان کەفت لە هەمەناز و کردنەێ وە خوەشڵە خوەشی و ماچێ کردن. وڵام ژن خاون ماڵ ک ئاوڕۊێ لە لاێ ژنەیل هاوساوە چۊد هە یە مەنۊد هەڵترەقیەێد.
هاوساگان وەتن:
“ئەێ ئافەرین وە پید هەمەناز، وە ئێ تاوسانە ئێ پرتقاڵ و ئنارە لە کوو هاوردیدە!!!؟”
ژن خاون ماڵ لە وەر خوەێەو وەت:
“باێەس سەر لە کار ئێ دۊیەتە دەر بارم، وە بێخود نییە ژنەیل ماڵ هاوسا یەۊ لە فرەناز بیشتر دووس دێرن، ئێ کەش کەفم ئەو شوونێ تا بزانم چوود ئڕا کوورە و ئێ چیشتەیلە لە کوورە تیەرێد.”
تاوسان لە سەر چێ و پایز هات.بۊ وە واهێڵان و وەڵنگ دارەیل ڕزیاد.
ڕووژێ لە ڕووژەیل هەمەناز لە پسا کار کرد، فرەناز کردەێ وە قاڵەێ قاڵ و وەت :
“داڵگە م خواردەمەنی توام.”
ژن خاون ماڵ وەت:
“داڵگە بوودن وە نەزرد یەسە ئڕاد تیەرم.”
ئێ کەش مشتێ بەڵگەو قەێسی ڕشانە داوان دۊیەتەێ
ئاو کەفت ئەو دەم هەمە ناز، وڵام فرەناز لە نوو کردەێ وە قیژ قاژ و وەت:
“یە کەێ خواردەمەنییە؟م لە یانە نیەتوام، م وەفرە شیرە توام.”
ژن خاون ماڵ تواس بۊشێ هێمان زمسان ناتێە وەفر ها کوو؟یەێ هەو قسیە لەدەم خوەێ سەنەو. کەفت ئەو هۊرێ توواسێیە چ کەتێگ وە سەر هەمەناز بارێد و تواێد سەر لە کارێ درارێد.وەت:
“وەفرە شیرەیش ئڕاد درس کەم ڕووڵە.”
ئێ کەش ناو برۊان برد لە یەک و ڕۊ کرد ئەو هەمەناز وەت:
“زۊ کە دۊیەتەگە داجمیە ،مەگەر نیەۊنی دۊیەتەم وەفرە شیرە تواێد؟بچوو کەمێ وەفر بار تا وەفرە شیرە ئڕای درس بکەم.”
هەمەناز وەت:
“ئاخە خانم، ئێرنگە وەفر ها کوورە؟!!!دو سێ مانگ سەور بکەن تا وەفر بوارێد.
وڵام ژن خاون ماڵ وە کوڵە چوێگ وەشکیادە هەمەنازەو.
هەمەناز بێچارە لە ڕۊ ناچاری کەفت وە ڕێیا لە شوون وەفر.
ئێ جارە ک ژن خاون ماڵ تواس سەر لە کار هەمەناز دەربارێد،دەس فرەناز گرت و وە دزیەو کەفت ئەو شوون هەمەناز.
هەمەناز ئێ جاریشە هە چەو ئڕا ڕیش چەرمیەیل گل داد ،وەختێگ قەێر فرەێگ ڕێ کرد و شەکەت بۊ چەوێ کەفت لە هەر چوار ڕیش چەرمێ.
ڕیش چەرمێ زەرد لە وەر چڕی ئەو هەمەناز وەت:
“ڕووڵە ئێ کەشە خانم کلد کردێیەس وە شوون چوە؟”
هەمەناز سەر کرد ئەو خوار و وەت:
“وەفر”
ژن خاون ماڵ لە دۊرەو چەوێ وە پێیان بۊ و گووش لە قسیەیلیان تەکان. لە وەر خوەێەو وەت”بیل تا بوەمەد وە ماڵ باێەس کوت کوتد بکەم. ئێرنگە نیشید و لە لای ئێ ڕیش چەرمیەیلە ئاوڕۊم بەید؟؟!!هاتێ سەد گلە ڕاس و دروو لە پیشت سەرم وەتۊد تا ئێ ڕیش چەرمیەیلە دڵێیان ئڕاد بسزێد.”
خاس بۊ هەمەناز و ڕیش چەرمێیەیل دەنگێ نەژنەفتن.
ڕیش چەرمێ زەرد لە وەر ڕۊ کرد ئەو ڕیش چەرمێ ،چەرمێ پووش.وەت:
“براگەم هە خوەد تۊیەنی بڕەسی وە داد ئێ قردگە دۊیەت بێچارە.”
ڕیش چەرمێ،چەرمێ پووش وەت:
“ئەێ وە بان هەر دو چەوم.”
لە شوون خوەێ هەڵساد ئەو پاو دەس هەمەناز گرت و کەفتە ڕێیا.
تا کەفتن وە ڕێیا وا هەڵکرد و کردەێ وە زقم، ئاوەیل ڕچگییان و سان لە سەرما ترەکیاد. کردەێ وە وەفر، هەمەناز کەمێ وەفر کوو کرد و لە ڕیش چەرمیەیل خودا سپاردی کرد و لە دڵ شکر خودای گەورا کرد و کەفتە ڕێیا وەر ئەو ماڵ.
ژن خاون ماڵ ک گیشتێ چیشتەیل لە دۊرەو دۊد ، زانس ک هەر چێ هەس ها لە ژێر سەر ڕیش چەرمیەیل. چی وەرەو نووا تا خوەێ بتەقنێد وە ڕیش چەرمیەیلا و بزانێد کیین و چۊ وەێ جوورە کەن.
وڵام وەفر و وەفرە لۊل ئاساش لە لێ بڕی ، لە ڕۊ نەچێ و هە وەر ئەو نوا چێ، هەر چێ فرەتر وەرەو نووا چێ فرەتر چقیاد لە ناو وەفر.
فرە ناز هەناێ دی داڵگێ چقیاس لە ناو وەفر ،دەس کرد وە وانگ و گیری و وەت:
“داڵگە بەو تا بچیمەو.”
وڵام داڵگێ وڵ کەر نەۊ و نەتواس باێدەو، فرەناز لە شوون خوەێ وساد و دی ئەو نووا نەچێ.
داڵگێ وە هەر جوور بۊ خوەێ کڕان وەر ئەو نوا، یەکم جار وەفر هات تا زرانیێ، ئێ کەش تا ناوقەێ ،ئێ کەش تا بان شان….
داڵگ فرەناز هە وە ئێ جوورە لە پسا چێ ئەو ژێر وەفر.
فرەناز ک چەوێ کەفت ئێ کەتە وە سەر داڵگێ هاتێیە، وە هەڵە پەڵە هەڵپلیادەو تا کەسێ بارێد بڕەسێ وە داد داڵگێ.
لە ناو ڕێ تەقیاد وە هەمەنازا، یەکم جار شەرم لە لێ کرد ، ئێ کەش لە ناچاری هەر چێ ک بۊ ئڕا هەمەناز وەت.
هەمەناز و فرەناز هەڵپلیانەو تا بڕەسن وە داد خانم.
وڵام هەرچێ گەردین نە دەنگێ لە ژن خاون ماڵ بۊ نە لە چوار ڕیش چەرمێ، چمان ژنە بۊد وە تگێ ئاو و چۊد وە زەۊا.
وەتن شاێەد هوا خاسەو بۊیە و خانم چیەسەو ئڕا ماڵ، وەل یەکا چینەو ئڕا ماڵ، وڵام خانم لە ماڵیش نەۊ.
فرەناز بۊ وە گیری، هەمەنازیش وە مل دۊیەتا دەس ناد ئەو گیری.
هەمەناز ئڕا یە ک فرەناز بووسنێدەو چێ جامێگ هاورد و وەفرەگە ڕشانە ناوێ و کەمێ شیرە کردە ملێیا،هەر دگێیان وە قاشقەو نیشتن و وەفرە شیرە خواردن.
داپیرە دەسێ کیشادە مل سەر گوڵ تڵاێا و وەت:
“هەمەناز وە ئارزووەیلێ ڕەسێ وڵام دی هیچ کەس ژن خاون ماڵ نەی.
گوڵ تڵا وەت:
“خاس وە پێ هات،ئمجا داپیرە ئڕا جوور ئەو دۊای مەتەڵەگاند سۊر نەکردن و هەفت ڕووژ و هەفت شەو نێیان لە ساز و دێوڵ؟”
داپیرە بۊ وە خەنێ و وەت:
“ئاخە هەمەناز هێمان مناڵە، بایەس گەورا بوود تا سۊر بکەێد، ئێ کەیش باێەس جارێگ فرەناز گەورا بکەێد و بکەێدەی وە دۊیەت خاسێگ جوور خوەێ
ئێ کەش خەنی و وەت:
“ئمجا چەن ساڵ ترەک ئەگەر ئمرێگ بوود ئەو دۊاێ مەتەڵەگە ئڕاد ئۊشم،ئەوسا دی هەمەناز و فرەناز گەورا بۊنە جوور دو گلە خوەیشک خاس هان وەل یەکا. تا ئەو ڕووژە ک دو گلە لە کوڕەیل مەموو نەورز تیەن ئڕا خوازمنی هەردگێیان و سۊرێیان کەن.ئ مجا هەفت شەو هەفت ڕووژ دەن لە ساز و دێوڵ و ساڵەیل ساڵ وە خوەشی وەل یەکا بەنەو سەر.
خومان لە ماڵ و مەتەڵمان لە چاڵ…
