وێنه‌ێ مناڵ دا ساڵانێ له ده‌س ئه‌و چه‌تۊن و نه‌مه‌زریاێه که‌فێده ناو سه‌رچا‌وه‌ێ چه‌مێ، ئاو، وێنه‌گه وه‌ل خوه‌ێیه‌و به‌ێ، مناڵ پا وه پاێ وێنه‌گه وه لێوار چه‌مه‌گه‌ێا چوودن، هناێ ره‌سێیه ده‌یشت پیه‌ن و بێازێگ، چه‌م له هاوار و هاژه که‌فێ، ئاوگه که‌م که‌م نیشێده‌و، مناڵ وێنه‌گه گرێده‌و، نووڕێیه پێیه‌و دۊنێ ره‌نگ و رۊ وێنەگە گۊیه‌ڕیاس، خاس ئێسفاێ شێوه‌ێ گرێ، زانێ شێوه‌ێ ناسیاره وه‌ڵام نیه‌‌‌زانی کییه:
- یه هه‌ر ئه‌و وێنه‌سه ک له‌شوونێ بۊم؟ گومان نیه‌که‌‌م! نه خوه‌ێه، م گ چه‌وه لێ نه‌ڵگرتم، ئڕا چۊنه وه پێ هات؟ مه‌گه‌‌‌ر وێنه‌‌یش پیر بوودن؟ چه‌نێ لە ئومرێ چییه؟ ئێ هه‌‌مگه لووچه چوه‌ێگه وه ده‌م و چه‌وێیه‌و؟
ئاو تیه‌ێده‌و ده‌نگ
- خاڵوو نووڕسیه‌‌سه خوه‌ده‌و؟
- خاڵوو کامه؟چوه ئۊشی؟ م هێمان دا ساڵمه.
- راس ئۊشی، کورپهێ ده‌رۊن تا بۊمنه سه‌د ساڵێش هێمان مناڵه.
- باس چوه که‌ی؟ کورپهێ ده‌رۊن کامه؟ م له رۊاله‌ت ئۊشم، ت باس کوڕپه‌ێ ده‌رۊن که‌ی، تا ئه‌وره‌ێگه م ها هۊرم له ئاو وه راسی و پاکی ناو بردنه، یه‌سه تنیش درووزن لید ده‌ر هات.
- به‌و‌ره‌و براگه‌م به‌و، ێه‌ێجار تره‌ک بنووڕە منه‌و، م ئاوێنه‌م نه وێنه، وێنه بنه‌ولا، هه‌مۊشه‌و داێم راسیه‌گان نیشان ده‌م، ئێ چه‌مه دۊنی دریژایی ژیانه،منیش گوزه‌ر ئومرم، هه گیژاوێگ ێه‌ێ گیر وگرفت، هه تاڤگه‌ێ ێه‌ێ ئه‌وخوار که‌فتنێگه له پله‌وپاێه‌ێگ، هه لادان سوکناێ موه‌قه‌تێگ و هه‌ر بڵق و که‌فێگ ها سه‌ر منه‌و مشتێ خه‌و خه‌ێاڵ پۊچ و بێهوده. ئێره‌نگه بزان چه‌ن جار ئه‌و وێنه که‌فته ناو گیژاو، له چه‌ن تاڤگه که‌فته خوار، چه‌ن جار لاداده کنار،
- چووزانم، ئه‌وقه‌ره فره بۊ هساوێ له ده‌سم ده‌رچییه.
- که‌مێ تر منیش چمه زه‌ۊوا
- خودا نه‌که‌ێ ……….
