هساره ماڵپەڕ هسارە سه‌ر وه هیچ لایه‌نێگ نییه و ته‌نیا ئامانجێ خزمه‌ت كردن و پێشخستن زوان و ئه‌ده‌بیات و فه‌رهه‌نگ كوردیە /ماڵپەڕ هسارە له وێراشته‌كردن ده‌قه‌یل ئیوه‌‌ێ هه‌نین ئازاده
هه‌ناسه سه‌رده هەمراێ 
خه‌م له خه‌مه‌یلمان زاێ
جامه‌ک له بان ده‌سد مه‌یل
کوچک وارێد له هه‌وره‌یل
زوقوم زقانمان سزان
سکڵ وه کوانێگ ڕچان
زوقوم کووسد بکه‌فێد
زوقوم به‌ختد بخه‌فێد
زوقوم ماڵد بڕمێدن
دڵد ئاگر بگرێدن
بچوو دی خوه‌ر مه‌شاره‌و
سه‌وزی وه‌هار باره‌و
بچوو تا سروه‌ێ ئاوای
جیکه‌ێ مه‌لۊچکێ بای
چماێ زمسانه داێم
دڵم پڕ ژانه داێم
دماێ چیلگه‌گان تێدن
زمسان بێکووم وارێدن
شه‌وه‌یل زمسان سه‌نگینن
خه‌وه‌یل زمسان ڕه‌نگینن
خه‌وه‌یل زمسان ج قۊلن
زڵفه‌یل خوه‌ر چ هۊلن
خه‌وه‌یل زمسان دروو بی
وه‌هاره‌گه‌ن دروو بی
زڵفه‌یل هۊل خوه‌ر چی
له‌ی شاره بێ خه‌وه‌ر چی
چه‌و نۊقانیمنه هاوار…
ته‌نیا شه‌و دیمنه هاوار…
هه‌ناسه سه‌رده هەمراێ
خه‌م له خه‌مه‌یلمان زاێ
ئاباێ ڕه‌شێگ هاوه‌رمان
بیلا بارن وه سه‌رمان
ئازیه‌تی خوه‌ر بپووشیم
ژار و ژه‌قوم بنووشیم
هه‌ێ ڕه‌نجه‌ڕوو…خوه‌ر کوشیا
دی ناتێد سوو … خوه‌ر کوشیا
لای لای داێه‌گان مووره
چه‌و کوورپه‌گانمان کووره
….
گوڵبه‌ره‌فتاو چه‌و ده‌ێدوو
هه‌ر دڵه‌قنجگه که‌ێدوو
دۊنێد یاره‌گه‌ێ تووریاس
خوه‌رهه‌ڵاتیش، خوه‌راواس…
گوڵبه‌ره‌فتاو شیند بوو
کزه‌ێ دڵ خه‌میند بوو
مه‌گیریه گوڵبه‌ره‌فتاو
دنیا چه‌س بێجگه ئه‌زاو؟
دنیا لۊره‌ێ گورگه‌یله
زۊخ فه‌راده‌و خه‌م له‌یله!
هه‌ناسه سه‌رده هەمراێ
خه‌م له خه‌مه‌یلمان زاێ
ته‌مه‌لۊله‌ێ سه‌رده‌ساڵ
ها وه‌ر کۊیه‌یل جۊر شه‌ۊ واڵ
کۊیه‌یل ئه‌رووس زمسانن
که‌ێ وه هووڵ دارسانن
کۊیه‌یل ده‌سێیان ها مل هه‌ور!
خوه‌ر کوشاننه‌و وه سه‌ور!
هه‌ناسه سه‌رده هەمراێ
خه‌م له خه‌مه‌یلمان زاێ…
هه‌ناسه سه‌رده هەمراێ
خه‌م له خه‌مه‌یلمان زاێ…
