خوەد هلاج هەفت شاری
قڵاێ دڵم کردیده نیشان‌و وە بێز چەوێگ تیرێگ ئڕام وەشانید
تا جەیهوون گیانم پەێ کرد!
ئەوسا!
من پرێزگ پەتیێگ، دایدەو دەس ڕوو پەریشانی!
له ناو ئێ واهێڵان تەپ تیەریک پڕ له خەڵت خەوشه،
هەر ڕووژ بەورگ بەورگ له قوڵاخم له قولاوە دەم کەن کووسەیل قۊل‌و دڕگەیل پڕ له ژیەر تیەنگ خۊن، وە تاڵان چێ!
ڕۊتەڵ قۊتەڵ‌و ئەفڵاس ئەفناک، وە سەرپای پەتی گەردنگه وە گەردنگه هام له نواێ برد چەواند!
کەێ بڕەسم وەو ئاسووە ک ئڕام دیاری کردیده
خودا زانێد!
وە نمار لێوەو هەر ئڕاد ئاخ کیشم!
ئاخ قاچاخ‌کریاگ بێ‌کەس‌کۊژێگ له وڵاتەیل چووڵ نەناس پڕ له دەێدام!
وە چەوەیل بێ‌سووماوە سۊیەتگ سۊیەتگ له شوون پاگاند له قەێ قەڵب قەڵبم،
زۊخ داتکنم‌و له شوون زەردە خەنەێگد
ئەڵوەن ئەڵوەن ئرمسم
له داڵاهوا ڕۊ ئەو خاک دژمن سۊله‌ێ تێد بێ‌سەر‌شوون،
بێ‌قەدرو قیمەت‌و پەیمانه چوود!
وە گیان بێ هازەو بێ‌نزێگەو، له بوو هەۊرات هناسد،
ماێشت ماێشت وڵاتان بێ‌پەێ وە سەر گەز کەم!
له ناو سفێدی وەفرەگان مانشت، هە کلوانگێ ئڕام مەنێیه!
قمشی نیه‌کەم لە دەسەو بکەم! شەوەکیان نقرە‌وەش شەفەقه! ئێواران یاقووت هەڵگریاگ خوەرئاواس!
له دڵ خوەمیشەو، گاجار زمروت سەونز چەو هەفی‌درارێگە‌و گاجاریش فیرووزەێ ئاسمانی میل چەو هەسۊدێگ!
ئەوەیش ئڕا یه ک ئساێ باش‌ئسا،
له بان هەڵکەنیه: ” هۊر تو”!
یه، بێ‌گەزاف ورد هەر سوان من شەکەته له وڵات
مای
“هاڵەمای” لێ دای!
