دۊیاێ سێ مانگ پا له زهۊ کوتان و دوش‌فه‌نگ، ئمڕوو ده‌ر دۊیاێ فڕوکه‌ێ بارهه‌ڵگر ئه‌رتشیێگ وه نه‌رم تیه‌ێده‌و خوار تا یه‌که یه‌که وه‌و کیسه‌یل برزنت شانه‌و لێ بچیمنه‌و بان، یه‌کێ له ئهو مناڵه‌یله که‌ێده‌و شووخی:
– بچهها عمودی میرید افقی برمیگردید.
بێ هۊچ هه‌وڵ و ته‌قه‌ڵاێ تۊیه‌نیدن شوونه پاێ ترس له ناو ده‌م چه‌و هه‌رکام له‌وانه وه دی بکه‌‌یدن، هه‌رکام لهو چه‌ویله ت دۊنی له منه‌ی که‌ت که‌له‌مه‌ێ قه‌ۊێگ گه‌ردن، نیه‌زانم ده‌لیل زانستی دێرێدن یا نه، جار جار، وه‌ر‌‌ج له یه‌گ که‌له‌مه‌ێگ بقومیه‌ی له ئاێه‌م ئاگاس، ئیمه کورده‌یل ئۊشیم فڵانی چمان زه‌ڕنیقه داۊده دڵێ. دۊێاێ ئه‌وه‌ێگه کیسه‌یل برزنت له ناوڕاس ئهو فروکه بارهه‌ڵگره که‌ڵه‌که کرێه‌ێدن، له بان د ڕز نیمکه‌ت له ههر د لاێ پێج کریاس، داکاسیه‌یم، دهنگ به‌ڵه‌نگو بۊچگێگ لهو ناوه ده‌راێدن:
– بچهها که‌مه‌ر بندها را ببندید.
له پاڵ ده‌روه‌چێگ دانیشم،له‌پ کوتم تا تاڵێ لهو نه‌واره‌یل برزنت شووڕه‌و بۊیه بووه‌سمه خوه‌مه‌و، له زۊوه‌و دڵم توواێدن لهو بانه‌و بنووڕمه دنیا، هه‌گ چۊ ئێ دۊیاێ مه‌ردم نووڕیده چشتێگه‌و ئه‌وقه‌ره ته‌وفیر نیه‌که‌ێدن، با له روانگه تره‌و سه‌ێر دنیا بکه‌م، بزانم دنیا له روانگه‌ێ تره‌و چۊنه، دهنگ و بووڕه‌ێگ تیێه‌و ناو ، سه‌رم کاس که‌ێدن، قه‌ێ نیه‌‌‌که‌ێ تیه‌رزێ، هۊرده هۊرده پایل مه‌ل ئاسنی له زهۊ برێه‌ێدو باڵه‌و گرێدن، ئهول به‌رزه‌و بۊنا چمان یه‌کێ چنگ خه‌ێه‌و ناو زگم و ههر چێگ ها له تێ تیه‌رێه‌و ده‌ر هه‌ڵقم، له دۊرا ده‌لیاێگ له هه‌ور ره‌ش و پێس نزیکه‌و بوودن ، چۊ ماشینێگ بچووده ناو تنڵ دریژگه‌و، تیه‌ریکی داگرێده‌مان ، دۊکه‌ل ره‌ش کارخانه‌یل ته‌ورێز ته‌نانه‌ت له ئهو لووکه چه‌رمێیه ها وه ئاسمانه‌و ره‌حم نکردێیه، هه چۊ دڵ پێس سه‌رماێه‌داره‌یل چرکنێ کردێه، نه‌سوور کوڕ به‌رزو هه‌رچه‌ن کردێیه‌سه رۊ وه رۊمه‌و وه‌ڵام ههر چێ هاوار که‌ێ ته‌نیا جۊلیان ده‌م و له‌وسێ دۊنم، لێ نیه ڕه‌سمه‌و، ده‌س ئڕاێ گووشم دڕا که‌م، یانێ نیه‌زانم چوه ئۊشێ، له نوو هاوار که‌ێ :
-مراێ، مراێ، چوه دۊنی ؟
ئێ جار ده‌س ئڕاێ ده‌روه‌‌چه‌گه دڕا که‌م:
-بنووڕه خواره‌و
که‌م که‌م لهو زڵه‌ماته د‌رایمن. جارێ تره‌ک روشنائی باڵ کیشێیه مل زه‌ۊا، ئهو ههمگه لۊله‌یل دریژ و ساختمانه‌یل به‌رزه ههر کام چۊ دڕگ تێژێ زگ زهۊ دڕینه‌و سه‌ر دراودنه، جێ خوه‌ێیان ده‌نه دوڵ و ده‌راویل قۊل پڕ له ئاو، خاس ک ئیسفاێ زهۊ گرم، دۊنم له پامان هه‌رکام له ئهو دووڵه‌یله بڕێ خانگ خه‌ڕگین درس کریاس، ک ئه‌گه‌ر بیلنان ژیان له ناو ئهو خانێیه‌یله به‌رده‌وامه، گوڵه‌جاڕه‌یل پڕه له گژ و گیاێ وڵات کورده‌واری بێ وێنه‌س.له‌تێ قرمز ێه‌ێ ده‌س،له‌تێ زه‌رد ێه‌ێ ده‌س ،له‌تێ سه‌ونز ێه‌ێ ده‌س،له‌تێ سورمه‌‌ئی، له‌تێ تێکه‌ڵ له گشت، هه‌ناێ له بان له‌که هه‌ورێگ ره‌ێ بووم، که‌فمه‌و هۊر(جه‌ک و لوبیا جادوئی ) خوه‌زێه‌و خودا بتۊیه‌نستام له جێ ئهو خایل ته‌ڵا‌ێگ ئهو خوار برد، من چه‌ندانه‌ێ پاڵاوگه یا کارخانه ئهول خوه‌ما بوه‌مه خوار، کارخانه‌یل نکتار و ئاومیوه، تا ئێ ههمگه میوه‌یل شیرن و ئاوداره‌‌وه تاڵان نه‌چودن، هۊرده هۊرده دهنگ و بووڕه‌ێ ئهو فڕووکه بارهه‌ڵگره جی خوه‌ێ ده‌ێه‌و فیکه‌ێ کارخانه. ئهو کارخانه‌ێ گ چه‌ن‌سه‌د ماشین پڕ له قوخ و هه‌مرو و زه‌ر‌ده‌لۊ و ته‌ماته و هه‌نگـۊر، قووڵ نانه‌سه بان قووڵ تاگه‌ر گه‌ێ بڕه‌سێده پێیان و بچن باره‌گه‌ێیان بکه‌نه هه‌ڵق ئهو هه‌ۊته‌‌بردیا، لاکردار هه چۊ خوه‌ره‌میره‌دار ههر چێ که‌یده هه‌لقێیا هڵوفێ ده‌ێ، سێرفی نه‌ێرێدن.
– نه‌سوور، وه‌ها نه‌سوور، ئه‌رێ سه‌گ باوگ ، چه‌ن جار وه ت بۊشم کارێگ لید تووام درس ئه‌نجامێ بێیه؟
– چوه بۊیه قوربان؟ چوه بۊیه؟چ خه‌تاێ له ده‌سم که‌فتێه؟
– ها ، ت ئێ پیر پاتاڵه‌یله چوه‌ێگه ها‌وردیه کار بکه‌ن؟ له کوو گردێانه‌و کردیه؟ ها؟ یانه لۊتێیان بگر گیانێیان ده‌ر چوودن، بوو هه‌‌ڵوا له بن گووشێیان تیه‌ێدن ، وه‌تم کوڕه‌یل جاێل جووان و کاری تووام،کاری! یانه یه‌ک یهێ نه‌فه‌ر تووان هووشێ وه پێانه‌و بوودن.
– قوربان به‌زه‌ئیم هاته پێانا، بێچاره‌ن، له بێده‌ره‌‌تانی کارکه‌ن، یه‌کێ بڕێ زگ ورسێ ها ملێیانه‌و.
– وه‌جانم، گه‌ێیاخانه وا نه‌کردمه، ت که‌ێ تووای له قسیه‌ێ م بڕه‌سیه‌و؟! کار رقابه‌ت به‌زه‌ئی هه‌ڵنیه‌‌گرێ، باێهس هه‌ڵدڕی تا نه‌ڵد‌ڕنه‌د، وه م چوه ورسێیانه؟ ژار مار خواردن.
کلکم وه نیشانه‌ێ هه‌ڕه‌شه به‌مه بان و ته‌کان ده‌م:
– هه ئێرهنگه که‌فێده لێیان، ئه‌گه‌ر جارێ تر بانه‌‌ئێره که‌فم له خوه‌دیش، ره‌سیدنه‌و؟ له ئێ وڵاته ئه‌وه‌ێگه فه‌ره‌‌س هێز کار هه‌رزانه، له پاێ ههر دیوارێگ په‌نجا لێیان لمته لمتێیانه، پۊل مفت نه‌ێرم وه که‌س بێیه‌م،کار تووام ، کار!
– قوربان، قوربان.
– ژار مار و قوربان.
ته‌کان و ئهو مل یه‌کا که‌فتن مناڵه‌یل له خه‌و و خه‌ێیاڵ د‌رارێده‌م. جار تره‌ک سه‌ر به‌مه نزیک ده‌روه‌چه‌گه‌وه، هه‌رکام لهو داربه‌ڕۊیه‌یل به‌رزه ک ره‌سن وه ناو قه‌ێیانا نیه‌ڕه‌سێ لهو بانه‌و چۊ خاڵ سه‌وزێگ وه سه‌ر روومه‌ت زه‌ۊیه‌و دیار ده‌ن، دۊیه‌ته‌یل ئازه‌و و نازار وڵاته‌گه‌م وه‌و دڵنگه‌یل ره‌نگین وه‌رێانه‌و ، دۊنم ک چۊ پووڵێ په‌پووله له ناو ده‌یشت پڕ له گوڵ خڕ خوه‌ن و ده‌ون تا گوڵێ ره‌نگین تر له خوه‌ێیان بۊننه‌‌و، بوو وه پێیه‌و بکه‌ن. بزه‌ێ شیرینێ نیشێیه بان لێوم، بزه‌ێگ شیرین تر له ماچ لێو هه‌رکام له‌وانه. دهنگ نه‌رم هێرو ئهو نازداره ک له مناڵیه‌و دڵم هاپێیه‌و له گووشم زرنگێده‌و:
– مراێ، مراێ گیان، ئمڕوو من و بڕێگ له ژنه‌یل هاوڕێم قه‌راره له ده‌ور یه‌ک کووه‌و بۊمن، بۊ‌شه نه‌سور باێ وه ماشینهگه بووه‌ێده‌مه بازار، با که‌مێ خرت پرت و میوه بسێنم،
– ده‌مه پێ له کارخانه بارێده‌و،
– نه ، ئه‌وه وه کار نیه‌تیه‌ێ
– من مارک دار تووام،مارکدار.
– ده‌ی مارک نه‌ێاشتوود نیه‌و؟
– نه نیه‌و، ئاخه ت ههر چێ گه‌ناڵه که‌یدنه هه‌ڵق ئهو کارخانه‌ێیا، ئیمه که‌ێ گه‌ن خوه‌ر بۊمنه، باوگم وه‌رجله گشت که‌سێگ سه‌رگوڵ و نه‌وبه‌رانه ئڕامان سه‌ن.
– نه خانم، نه، بووه‌خش، وه ناو چه‌و، هه ئێرهنگه کلێ که‌م.
– نه‌سور، وه‌ها نه‌سور، یه‌لا زۊ بکه‌‌فه رێ، ماشینهگه بووه، خانم بڕه‌سنه بازار، بزان چوه توواێ بسێنێ. وه‌ل تنا ئۊشم، که‌ڕی؟
ئه‌وقه‌ره وه دهنگ به‌رز خوڕم له نه‌سور، تاگه‌ر شنه‌وێ :
– چوه‌ده برا؟ چوده؟ نامه‌ی کوو گردێه‌سه‌د، خانم چوه؟ له‌ێ بان ئاسمانه، بازار ها له کوو، داسه سه‌رد؟ هێمان ئهو زهۊ نه‌نیشتیمنه، د ته‌قه لیمان نه‌کریاس ،ئڕا شێویایده.
نووڕمه نه‌سوره‌و بسکه‌ێ گرێده‌م، وه ناو له‌پ ، که‌مێ ده‌م و چه‌و وڵام.:…..
– نه‌سور گیان ئاخ ، ئه‌گه‌ر بزانی له ناو چ دنێاێگ بۊم؟
– زانم کاکه، مراێ گیان زانم، منیش جار جارێ لێوا پێم تیه‌ێدن، وه‌ڵام له قه‌دیما وه‌تنه :ئه‌وڵه وه خیاڵ نمه‌‌وو وه ماڵ: هه‌وڵ و ته‌قه‌ڵا توواێدن و تێکوشان بێ وچان.ئه‌گه‌ر تووایدن دنیا بگـۊه‌ڕنید له خوه‌ده‌و ده‌س پێ بکه. بزان وه خوه‌دا دۊنی! کوڕێ هه‌ید!م قه‌وڵ دامهسه خوه‌م، نیه‌وسم، فه‌رار که‌م. هه‌رگز ته‌قه له رۊ براێ خوه‌م نیه‌که‌م. ها ت بنووڕه منه‌و، ئه‌گه‌ر فره زوور لیم بکه‌ن خوه‌م کوشم.
– خوه‌زێه‌و وه خوه‌د، هه‌رگز نه‌ێمه د دڵ بۊدن، وه‌داخه‌وه بڕیاردان له لاێ م فره سه‌خته، هه‌مۊ‌شه چه‌وه‌ڕێ بانانم، خوه‌م ده‌مه ده‌م شه‌پووله‌و ، هه‌میشه ئـۊشم ههر که بۊیه خه‌ر منیش بوومه پاڵانێ. خوه‌م زانم لێوا بۊن گه‌نه، ئه‌‌ێ هاوار چوه بکه‌م؟! نیه‌تـۊیه‌نم.
– هه ت نییدن له بانان ترسی، فره که‌س ترسن، ئه‌ۊش وه خاتر نادیار بۊنێیه، ئه‌گه‌ر دیار بوودن که‌س لێ نیه‌ترسێ، وه‌ڵام مراێ گیان ههر چۊنێ بوو له ئێ بارودوخه گه‌نتر نییه. هه‌س؟
– نه ئاخه…
جارێ تره‌ک لهو ده‌ر‌وه‌چه نووڕمه ده‌ره‌و، دۊیاێ ته‌کان قه‌ۊێگ ئهو فڕوکه‌ێ بار هه‌ڵگره یه‌ک د پل خوه‌ێ، ڕه‌نگ له رۊم نیه‌مێنێدن، کیسه‌یل برزنت ک قورسێ هه‌رکامێان وه سی چل کیلو ره‌سێ، له بانا ده‌ێه مل سه‌ر ئهو مناڵه‌یلا ک وه تاڵێگ برزنت به‌سیانه‌‌سه‌و، فڕوکه بار هه‌ڵگره‌گه جار تره‌ک چۊ و‌اشه‌ێگ ئڕاێ مه‌ل کووس که‌فتێگ قۊچه بکه‌ێ وه سه‌ره‌و چوودنه خوار، که‌س نیه‌زانێ په‌نا بووه‌ێدنه کی. ده‌س که‌س له هۊچ کوو به‌ن نییه، گشت هایم له فکر یه‌گ چۊ خوه‌مان له ده‌س ئهو به‌نه خه‌ڵاس بکه‌یم، ئێرهنگه دی دهنگ قیژ قاژ مناڵه‌یل له بووڕه‌ێ ئهو مه‌ل ئاسنیه که دیار نییه بۊیه تیر شکارچێگه‌و یاگه‌ر متره‌‌گه‌ێ له کار که‌فتێه به‌رزتر. ئهو فڕوکه بارهه‌ڵگره گوڕاێگوڕ پڵ خوه‌ێدو له زهۊ نزیکه‌و بوو، یهێ پڕشه ترۊسکه‌ێ هیوا ئهو دی نیه‌کریه‌ێ، من ک هه‌مۊشه‌و داێم هه‌‌وسار خوه‌م دامهسه ده‌س قه‌زا و قه‌ده‌ره‌‌و سفت دو کلکه‌‌ێ ئاسنێ گرم و جم نیه‌خوه‌م، راسێ بتوواین له پڕێ چیمه،ده‌س و پام ڕکێ، مه‌رگ کردێیه‌سه رۊ وه رۊمه‌و، وه ریشم خه‌نێ:
– له چوه ترسی! ها؟ زانی له چنگم نیه‌ده‌ر‌چی؟ بێچاره، ههر چێ لیم بترسید فێشتر لیم نزیکه‌و بۊد، بترس، ترسین له‌من ترسنوکده‌‌و که‌ێ، باێس بوو زۊتر بمرید، که‌سه‌یلێگ هه‌ن م له پڕێ بووه‌ن، ته‌نانه‌ت له پایش د‌رارنه‌م وه‌ڵام ئه‌وه ت نیدن، خوه‌زێه‌و خودا ڕێ چۊنه مردن وه ده‌س من بۊ‌یاد، م هه‌ڵوژانیام چۊ بمرداین، وه‌داخه‌وه ئهو ڕێیه ها ده‌س خوهدان، خوهدان هه‌ڵوژنین.
ڕمه‌ێ ناهساوێگ وه نیشانه‌ێ رسین وه زهۊ راسه‌و بوودن، یانێ ئێره دی ئاخر خه‌ته، هه‌رچێ باێهس ئهو سه‌ردان باێدن ، هاتێیه، له‌یه‌ئه‌‌ولا خوهدان بڕیار ده‌‌ین چۊ بژیه‌ین، کام له‌ێ د ڕێیانه هه‌ڵوژنین؟، هه‌ڵسمه‌و پا هه‌رچه‌ن هێمان پایلم ڕکێ، سه‌ر پا نیه‌گرم، ده‌س گرمه ده‌ر و دیوار فڕوکه‌گه‌و، ههر چێ سه‌ر گل ده‌م ژیانێگ ئهو دی نیه‌که‌م، سه‌ر که‌مه ناو کابین فڕوکه‌وانه‌گه‌وه، که‌س له تێ دیار نییه، که‌س نیه‌زانێ که‌ێ په‌ڕیه‌سه‌و.
– بنووڕه ئێ بێ باوگه‌و چۊ گیان خوه‌ێ ده‌ر کردێیه! ئێ دۊیا مرن وه جانم، براێ باوگ ئه‌ۊ خو نیمن!، هه‌رچێ ئهو سه‌رمان تیێه‌ێدن بیلا باێد.
جار تره‌ک گله‌و خوه‌م دهنگ نزه و نرکه‌ێ تیه‌ێده گووشما، له یه‌که یه‌که‌‌ێیان نزیکه‌و بووم، نیشانه‌ی له ژیان وه دی نیه‌که‌م، تا ره‌سمه لاێ نه‌سور ، خوه‌ێه، ئه‌ۊیه ، نه‌سوره. فه‌ر‌ه گیان سه‌خته، خودا تا خاس دۊ دوزه‌خ وه پیمان پڕه‌و نه‌که‌ێ نیه‌کوشێده‌مان، که‌مێ له‌قنمه‌ێ:
– نه‌سور، نه‌سور گیان، زنه‌ێد؟
وه‌ده‌م گیانه‌و:
– ئه‌رێ زنه‌م، زۊکه بچیمه ده‌ر، بن باڵم بگر با بچیمه ده‌ر.
وه ههر نقه‌جڕێگ بوو راسێیه‌و که‌م، کڕنمه‌ێ ده‌ر، تا له بان ئهو چیمه‌ن سه‌ونزه ها لهو نزیکه هڵاژنمه‌ێ ، ههر دگمان وه ته‌‌خت پشته‌و که‌فیم،
– نه‌سور. نه‌سور گیان م ئزرائیل دیم، باوه‌ڕ بکه وه چه‌و خوه‌م ئزرائیل دیم! له ناو فڕو‌که‌گه بۊ، ئه‌ولما ناده کیش‌که‌وان، وه‌ته پیم خوهدان رێ ههر چۊنێگ بمرین هه‌ڵوژنین، وه‌ت وه ده‌س م نییه، ها ده‌س خوهدان، یه‌یش وه‌ت ، هه‌ن که‌سانێگ م له پرێ به‌ن، ته‌نانه‌ت له پا د‌رارنه‌م، ئێ که‌ش وه‌ته م، ت ئهو که‌سه نید، راس وه‌ت نه؟ راس وه‌ت م وه خوه‌ما نیه‌ۊنم.
– غه‌ڵه‌ت کرد،
– نه، نه‌سور گیان، نه، راس وه‌ت وه خوه‌ما نیه‌ۊنم، م هه له‌ێره وسم، با هه له ئێره گیانم ده‌ر بچوودن، دی تاقه‌ت که‌نه‌‌‌و کیشه نه‌ێرم، ت بچوو تا وه ئه‌وه‌ێگه ها له سه‌رد بره‌سیدن.
– نه تنیس به‌م وه یه‌که‌و مه‌رگ له پا د‌راریم ، وه‌یه‌که‌و
– نه باوگه، نه، کوڕ خوه‌ێ توواێ مه‌رگ له پا د‌رارێ ، خوه‌ێ وه‌ته پیم ت نیدن، خاس ناسییه‌م، ئه‌ۊ زانست باێهس له کی بترسێدن، ڕێگ ک ت هه‌ڵوژانیده تۊیه‌نێ له پا د‌راریده‌ێ، م باوه‌ڕه پید دێرم، بچوو، رێد رووشن کاکه، بچوو سه‌ر که‌فتێ بۊد.
نه‌سور رۊ نه‌ێ له به‌رزیگ چووده‌و بان. مه‌رگ له پشت ده‌روه‌چه‌گه‌وه نوورێده پێیه‌و.
– دیاره ئێ کوڕه گیرو گرفت فره‌ێ ئڕام درس که‌ێ …..
