هێمان
زریکه‌ێ شاوار شووفار
له به‌رزی
خێاڵ خوه‌ر و خودا
بێ ده‌سڵات ئڵاژیاس و
له دزی تاشه‌یل تۊش ساڵ هاتێ
گوڕاێگوڕ
فریشته‌یل بێ سقان له بارێ چوو …
م
مژ نامه‌سه تیه‌ڵی ده‌روه‌چه‌یل زووڵه‌زا
تیه‌نێ مه‌نم
تیه‌نێ مه‌نم و
ته‌نیاییێم له مانگ ساێڕ خس …
جفتێگ سیه‌پرۊسنه‌ک
له ئيواران ده‌روه‌چه‌یل قیچ
تلیمارێگ له تیه‌ڵی ئاسمان
وه ده‌م خوه‌زیاوه‌یلان گردۊن و
وراو ….
ـ چوارشه‌مه‌یلْ ئه‌ێ شێعره
له زه‌خم نێمه‌ڕووانێگ دۊازاێ
تاێرمه به‌سان ـ
خودا چه‌ن شه‌مه‌س ؟
م باێه‌س
چه‌نێگ رووژنامه بووم
تاگه‌ر
چنگێڕ بخه‌م ئه‌و شه‌وه‌کیانێگ
ک باشووره‌یل پاکه‌فتێ
له وه‌راێوه‌رێ
بێ ئاگا دامڵکیه‌ن …
ئاهووه‌یل ناو خاوه‌گان ت
گشتێ ناسم
یه‌کێگ له لێیان
تووز ته‌ماکوو
تا ژێر مردنێ خه‌فتۊد
به‌ڵام
ت نیه‌زانی
ک وه‌رجاێ مردن ت
که‌ش کۊیه‌یل ئافریقا
ده‌ماوخوار خه‌فتن ……
م
کڵه‌شێر ئاژاژگی له‌وه‌رێگ ناسم
ک هه‌ر شه‌وه‌کیان
هاوار هساره‌یل تیزه جاڕ
له بارێ چوود ….
شه‌وه‌کی چوه تۊنێ بوود
بێژگه چلێار وا بردێێگ
ک له ژێر لاوه‌لاوه‌یل هه‌که‌دار
کلگه‌یل نگریسْ شاوار مژێد
ئێواران قول بڕیاێگ
له بان مناڵی م شین که‌ێد
شین که‌ێد و
یاێ هووشم زڕخه‌و بوود
ئاێ رێیل پا که‌فتێ !
هێمان قاپێگ دێرم ک خه‌ر ناوم !
هێمان
واران له ده‌مه‌کاوکییه‌لم وارێ
ئه‌گه‌ر
کاوشه‌گانم
له په‌رتخ ژیان مه‌مگ بڕ بۊن
ئه‌گه‌ر
ئێواران له وارانه‌یل شه‌که‌ت
واز تیه‌رن
م
وڕینه‌ێ مردن که‌م
وڕگ … وڕگ …
داڵگه !
م ده‌مه‌کاوکی ژیانێگ گردمه
که پڕه له دیرووکه‌یل نه‌زووک ….
ک
تانه‌ێ تیه‌ریک ته‌نیای
له خوه‌م گلمه‌و ده‌ێد
م وڕگ خاوه‌یل مناڵیێم که‌م ……..
وڕگ … وڕگ … وڕگ ……
ئه‌ۊ
له خاوه‌یل بانان خه‌فتۊد …
له بان جیکه‌یل کامین مه‌لۊچگ
باروه‌نی ئاوه‌خته‌یلێ داخسۊد
ئاو سروه‌ێ سیه‌ێ سڕه
ک زاواێ ده‌مه‌کاوکییه‌ل مێژوو بۊ ؟؟!
داڵگه !
له‌ێ دنیا
ته‌نیا له یه رخم چوود
ک نه‌واێ
بڕْ مردن نه‌که‌م ……
ک نه‌واێ
خه‌سپن ده‌سه‌یل وا بردێ م
ته‌نیا نووڕسن
وه وهار خاوزڕێگ بوود
ک له بێ په‌لاماری تاشه‌یل وجاخ کوورێ
ته‌نیا و ته‌نیا
خۊن چۊزه ده‌ێد
نه‌واێ ……….. !؟؟
ته‌نیا چووار سێمره تا مردنم مه‌نۊد
ترۊسکه‌ێ “داوینچی” یل وا بردێ
تا خه‌فتن ئاورێگ بڕ نه‌کرد
دی شه‌که‌ت بۊمه
له باوشه‌یل بێ تاوسان و
ساڕێژه‌یلێگ خۊن خوێان هه‌وا که‌ن
له هه‌ر چێ په‌لامار قووخ دریاێ ….
له‌قاێله‌ق تاوسان سه‌ره‌خوه‌رێگ
سه‌ر که‌ڵ هاوردمه ….
تاوسان ـ له سۊک زوقومه‌یل بێ ئاگا ـ
براێ هاوپشت رووژنامه‌ێگ بۊ
ک نه‌وێ له باشوور سووک تره ….
سووک تره‌و خۊن شه‌وه‌کی
له‌په‌سا
وراو ئه‌نفاڵه‌یڵ بێ داڵگ
گوچان وه گه‌ز ده‌ێد ………..
هۊچ جامه‌ک ئازاوێگ
له خێاوانه‌یل نزم قووخ دریاێ
تڵاوکه‌ر هه‌ڕه‌شه‌ێ دیرووک نه‌ۊ .
ته‌نیا مه‌مگه‌یل ئاو ره‌ژێاره
خه‌وه‌ر داشتن
به‌ڵام
جامه‌که‌یل فره‌ێگ
له بارێ چۊد ـ یه‌سه گ ئۊشم
بنچینه‌ێ هۊچ تماشاێگ
له ژن نیه‌ڕه‌سێ ـ
ئێره‌نگه
هڵم زێاره‌ته‌یل وجاخ کوور
بان ناخوواێ باکوور
گردێه‌و
ته‌نیا چوار سێمره‌ێ چه‌پێڵ مه‌نۊد
تا خڵێف دان رووژنامه‌یل روونج کردێ
له نێمه‌ڕووان سڵپ گرتێێگ
ک م له خاو دامڵکییه‌م …..
