شاعر: ژاک پره‌ور
وه‌رگێڕان: عزدین حه‌یده‌ری
………………………………………..
دنیا پڕه له گوڵه‌مه‌یل گه‌وراێ خــۊن
ئێ هه‌مگه خــۊن رێیا گرتێیه
وره‌و کوو چوو
یانێ زه‌مین خــۊن کیشێده‌و سه‌ر و
مه‌س که‌‌ێد؟
زه‌مین خاس ئڕا خوه‌د و مه‌یخوه‌ریید!
باده‌‌ێ خــۊنخوه‌ر
چه‌نێ پارێزکار و چه‌نێ هاماری زه‌مین!
خــۊنین زه‌مین!
نه زه‌مین ئاڵ پیاڵه نییه
زه‌مین له‌تر نیه‌وه‌ێد و خڕ نیه‌خوه‌‌ێ
هه‌ڕاده‌‌ێ بـۊچگ چواروه‌رزێ
وه‌قایه‌ت دڕانێ زه‌مین
واران و وه‌فر و هڕشت و هه‌واێ خوه‌ش
هیچ ده‌مێگ مه‌س نیه‌که‌ێ
زه‌مین
ته‌نانه‌ت گاجارێگیش مه‌س بوو
ئاگروه‌شان کوڵووڵ بۊچگێ
زه‌مین خڕ خوهێد و نیهوسێدهو
وه‌ل دار و باخ و باڵاخانه‌یلێیا
وه‌ل گوڵه‌مه‌یل گه‌وراێ خــۊنا
زه‌مین خڕ خوهێد و نیهوسێدهو
بوونه‌وه‌ره‌یل بانیشێ وه‌لێیا خڕ خوه‌ن
رفت خــۊن رێیا گرێ
زه‌مین ده‌ربه‌ن نییه
ههناێ خڕ خوهێ
بوونه‌وه‌ره‌یل بانیشێ وه‌لێیا لۊلنن
بهڵام ده‌ربه‌ن نییه زه‌مین
خڕ خوهێد و نیهوسێدهو
نه خــۊن له رێیا داگرتن کوتایی تێ و
نه زه‌مین له خڕ خواردن
وسییه‌ێده‌و
ئێ هه‌مگه خــۊن رێیا داگرتێیه وره‌و کوو چوو؟
خــۊن پیاێ‌کوشه‌یل و خــۊن شه‌ڕوانه‌یل و شه‌ڕه‌ونه‌ره‌یل
خــۊن کاره‌سات
خــۊن چام
خــۊن نه‌هامه‌ت
خــۊن مرۆڤه‌یلێ ک له ناو زندانه‌گان
شه‌ل و په‌ت کریه‌ن
خــۊن مناڵه‌یل بێ‌جۊله و هێمن
ک وه ده‌س باوگ و داڵگ جه‌زه‌ربه بوون
خــۊن ئه‌وانه‌گه که‌پووڵێیان خه‌ڵتان له خۊن کریاس
له شه‌قامه‌یل و به‌ندیخانه
خــۊنێ ک له ناوخوڕه‌یل خوڕه‌ێ تێد و
له کووڵانه‌یل رێیا گرێ
لافاو خــۊنێ ک ههناێ تێ،
رێگرێ ئڕا شه‌پووله‌یل خوهێ نیه‌ۊنێ
خــۊن گه‌رد وه دنیا هاتن زاڕووک کوورپه‌ێا که‌فێده رێ
داڵگ شیوه‌ن و شینکه‌ر
وه کوورپه‌ێ ک وانگ هه‌ڵاڵێ
رفت خــۊنه
زه‌مین خڕ خوهێد و نیهوسێدهو
زه‌مین له خڕ خواردن ده‌س هه‌ڵنیه‌گرێد و
خــۊن له رێ که‌فتن
ئێ شه‌تاوه‌یل خــۊنه وەره‌و کووره‌ێا سه‌ررێژ بوون؟
خــۊن شمڕ خواردێه‌یل و
خــۊن ئه‌وانه ک بێ‌هرمه‌ت بۊن و
سووکی پێیان کریا
خــۊن نه‌‌ڕشیاێ سه‌ر داره‌یل
خــۊن ئه‌وانه‌گ خوه‌ێان خوه‌ێان کوشتن
تیرواران بـۊن
ماکووم کریان
خــۊن وه بێ‌خود مردگه‌یل
له پێشهاته‌یل نادیار
یه‌کێ هاته خێیاوان و خــۊن له ده‌مێ رێیا داگرت و
وه جارێ مرد و سه‌راسه‌ر له‌شێ خــۊن داگرت
بهڵام خــۊن داوانگره و پاکه‌و نیه‌ود
خــۊنه‌یل وه ناهه‌ق رشیاێ
له‌وره ک ته‌رمه‌گه‌ێ که‌فتـۊد
تا فەره وه‌خت دۊاێ ئه‌وه
چه‌ن دڵوپ خــۊن سییه
هێماێ وه هێماێ نه‌چێیه‌سه‌و
خــۊن وه خــۊن پاکه‌و بوو
خــۊن تاێرمه به‌سیاێ
ژه‌نگ ژیان
ژه‌نگ ته‌رمه‌گان
خــۊن وه‌کوو شێره‌یل ئه‌وبه‌سیاێ
ک وه یه‌‌ێـهه‌و ده‌رچن
جوور شێر ک ههناێ تیه‌ن و
وه ناو گه‌له گاوکـۊیه‌گانا خڕ خوه‌ن
خڕ خوهێد و نیه‌وسیه‌ێده‌و
هه‌ر وه‌ک زه‌مین
یا وه‌کوو شێته شێره‌یل
ههناێ خڕ ده‌ور گه‌له گاکۊ‌یه‌گان ده‌نه‌و
خڕ خوهێ زه‌مین
وه‌ل دار و بوونه‌وه‌ر و باڵاخانه‌یلێیا خڕ خوهێ
وه‌ل شووخه‌بووکه‌یلْخڕخوه‌ر بان زه‌ۊا
مردگه‌یل چاڵ کریاێ
له وه‌رز که‌فتن گووشه‌ماسی
یان تاڵان ئاوات چه‌وساوه‌گان
ز‌مین خڕ خوهێد و نیهوسێدهو
وه گوڵه‌مه‌یل گه‌وراێ خــۊن
قـــۊله‌و بوون و ژێـــرکه‌ت راس که‌ن
ســەرچــــەوە : ژیار کورد
