هسارە – خەوەرکەر خەوەر هاورد ک له وڵات هاوسا سۊره !
لە دەم ئێوارەگانێگ، ئامی شفووڕ گەڵ واخی[۱] هندڵ وه دەس لە ماڵ هاتەو دەیشت. ئامی پێشت چەمان و هندڵ خس لە جیب و تا ئەوره زوور داشت هندڵ پێچان، ماشین نرکەێگ کرد و زرپەێگ هەڵسا و گوڵتووپەێگ دۊد لە دۊاێ ماشین درچی! ماشین رووشن نەۊ !
قردگ قردگ و بڕبڕ مەردم لە خانگەیل وەر و پێشت هاتنەو دەیشت و لە دەور جیب گردەو بۊن!
سووراو زووان چەفت، یەێ شانێ لەکوتر هاوردۊدەو دەیشت و کەمێ لە لنگ شواڵەگەێ کیشاۊدەو بان. قورقەێ کرد و وه ت:
– ئامی، بنزیل ها لە ناوێ؟
ئامی گڕێ ساکت مەن، هناسێ کیشا و بێ سەرهێزدان وەت:
– دۊیەکه شەوەکی پڕێ کردمه!
سەیە تەمۊرەژەن دۊ سێوڵێ پێچ دا و پفێ دا لە چووخەگەێ و وەت:
– رۊن چه؟ رۊن دێرێ؟
ئامی بسکەێ کرد و چشتێ نەوەت.
کەم کەم ژن و پیاێ لە ماڵ، هاتنەو دەیشت وگردەو بۊن، ئسی خاواره وه شەلەشەل و هووزگورچێ گا، وە تڵ و تانجی و بێەروەگ گاڕان دریژ وه شۊتەشۊت! بێەروەگ شوان بۊ، لەبه لە پەس فیکه کیشاۊد، هناێ وەل کەسێ قسە کرد، شۊت کیشا!
ئامی دجاره هندڵ کوتا ، جیب گرپەێ کرد و رووشن نەۊ!
عەلی زووان پیەن وەت:
– وه بێ ماشین وه سۊرا نیەڕەسیم ! ئەگەر کەسێ تواێ بچود ، ئلان وه چارواوا بچوود ، تۊلق بەیان ها لە ئەوره!
سووراو زووان چەفت وەت:
– ئیمە وه بێ ماشین نیەچیم!
سەیە تەمۊرەژەن خڕێ خوارده ناو مەردما و دجاره قورقەێ کرد و وەت:
_ منیش وه بێ ماشین نیەچم!
عەلی زووان پیەن وەت:
_ باێەس م بەرمەکی بووم؟ ماشین هن بنەماڵ منه! خوەم و ژنم لە وەر ماشین نەنیشیم!
فچەفچ له مەردما هێز گرت وه یەکەو وەتن:
_ ئیمەیش ماشین توایم!
ژن مێرزا بەقاڵ وەت:
– گشتێ ک نیەتۊیەنیم بچیمه سۊر ، چەپاومان کەن! هەر چێ دیریم لە دەسمان چوود ، وڵات خەننه پیمان!
ئامی لە ژێر لچەو وەت:
_ ماشین هێما رووشن نەۊیه ، یەک مەکوشن!
ئسی خاواره وەت:
– وە هەرچێگەو بچین ، م تیەم، گەها چشتێ گیرم کەفت!
کەم کەم هووز وەرزێر، خڵ نانەوا و شوان و وەرەیلەوانەیلیش له ماڵ هاتن و گردەو بۊن و چشتێ نەوەتن!
سەیه تەمۊرەژەن وەت:
– م باوگم ئڕاێ مردمە دەرهاتێیە! ئە سۊره سەرم بڕیەێد، ئەر دەزۊرانییە سەرم بڕیەێد!
عەلی زووان پیەن دەنگێ بەرزەو کرد و وەت:
_ بنەماڵ م باێەد نیشتۊن یا خەفتۊن! باپیرم لە بان ئێ مردمە کوشیا! جفتێ کوڕم نامەو بان ئێ مردمه! قورخ و میلکان و هەوارگە و زمگەدان لە منه!
سووراو زووان چەفت وەت :
_ زامەت مێواندان ها بان کیەو؟ سەرتیل ئێڵ منم! ئەمنیەو دەوڵەت لە ماڵ م کوو بوون ، مێوانی دەر منم! جیب هن من و ژن مناڵمه!
ئسی خاواره پریکەێگ کرد و وەت:
_ ئمجا ئێ جیبە رووشن بوو؟
بێەروەگ گاڕان دریژ مفەێگ کرد و یەێ کلگێ هێز دا و وەت:
_ برا ئیوە سێ چوار ماڵە، خووەدان بەکەفن لەیەک، ئێ دۊامان وە پا چیمن!
سەیە تەموورەژەن کەف دەور دەمێ گرتیۊد و سێوڵێ بژبژەو بۊد، وەت:
_ گەپ ئیمە وە ت چوە؟ مامر کوورەید؟ لە کوو خا کەید؟ بابا قوقو ! دادا قوقو!؟
گاڕان دریژ جواو نێیا و پێشت کردەو مەردم و هناسێ هەڵکیشا!
کوتەڵ خوەر، چەویلێ پاکەو کرد، تسپۊیەگەێ لە گیرفان دەرهاورد و وەت:
_ گشتمان وەیەکەو دەڵەک جیب بەیمن!
ئامی بێدەنگ بێدەنگ نیشتە پێشت جیب و وەت:
_ وە یەکەو زوور بەکەن!
پیایل ناد عەلی بردن و دەڵەک جیب دان وەرەو رۊە پاڵ!
دەنگ عەلی عەلی هێز گرت و ئامی گاجار کڵاچ وڵ کرد و جیب تەکانی خوارد، دۊدێ وەشان و رووشن نەۊ.
سووفی دەوریش لچی تەکانێ خوارد ، دوواێگ خوەنی و پفێگ کردە دەور خوەێیا، وەت:
_ گشتێ بچن، ئیشالا خەێرە! ئیمە گ پاێ هاتن نەێریم!
مەردم هەسە هەس و هنەهن وڵ جیب کردن، له بان سان بەڕ گەوراێ وەر دیەکە کووڵە دان!
سەیە تەموورەژن وەت:
_ ئێ جیبە ئەر رووشن بوو، هە ئیمه گرێ!!
سووراو زووان چەفت وەت:
_ برا باێە ت نان ئڕا خودا بردۊد؟
عەلی زووان پیەن کردەو جوواو:
_ هەرکەس ناو ئێ گەپە بەێد، مێژگ خەمە دەمێ! باوگ م بەێراخ دا وە دەم تووپخانەێ شاوا!
گووچان ئەرژن لە ژێر پاڵتاو دراوردو تاو گووچان دا!
گڕێ نەکیشا، هەر بڕێگ وەرو لاێگ کیشان!
مرخش هێز گرت!
هووز سەیە تەموورەژن قووشەن کیشان، هاوارکەر زووان چەفت قۊ کرده وڵاتا و زارا شەڕەونەر لە هووز زووان پیەن باقەباقە تێڵا کوو کرد و دا لە سینگ و وەت:
_ هووز مایخان شواڵدان گا بخوەێدەێ! مەگەر لەێ بنەماڵە دی مەرد نەمەنێیە!
دیەکە بڕ خووارد و دەنگ تریکەێ ژن و مناڵ، هاوار پیایل و قرچەێ گورز و کوتەک، گووش وڵات کەڕ کرد!
داڵگە زینەت، قورئان وەباوش، سەنگین سەنگین، لە ناوڕاس مەردم دەنگی هێزدا:
_ تەسەق بکەنە ئێ قورانه!
عەلگ هەنەزا کووتا و چوارشانە، گەڵتاف گرت و چما کەڵ پەڕی، هناێ سان وەشان، گن گن گووشته زەۊ هێز دا!
سووراو کەڕەک کیشاو سەر! سێ گورز وە یەکەو لێ هاتەو خوار… بۊیه زاکان جەنگ!
باقه باقه تێڵا لە یەک شکانن، دەنگ مناڵ و ژن و گەورا وەل قاڕقۊ پەسا وەل دەنگ سەگ پاسا بۊدە یەکا!
شەوار چۊ دەلیای قیل وڵات داپوشان. ترۊسکە هسارەیل، وەل زەۊا چەوچەو کردن.
ئامی لە بان سان بەڕ گەوراێگ سیکار کیشا و وەر جیب لە رۊەپاڵ بۊدەو خوار!
هەیمان کەڵەشێر باڵ نێایۊد، داڵگە زینەت ، ماڵ وە ماڵ گەردی و جاجگ و رۊن نا بان زام دەس خواردێەیلا! سەر شکیاۊد، پا شکیاۊد، دگان کەفتۊد و گن گن گووشت لە گیان پیایل و ژنەیل بچهەڵکەن بۊد! داڵگە لەیلا جاجگ و رۊن تێوانەو و نووڕ کرد و خراو دا!
_ تفە کاردان، بنەماڵەێ مایخان، وجاخ کوور و تشگاێ سییه! ئاو بکنە کووانێ، ماڵ بڕمنن، دۊ ئەسپەیلدان بووڕن! باپیرمان مایخان چوو هزاره خس، وڵات قورخ و میلکانێ بۊ ! دنیا مڵکی بۊ ، هەرکەس هات دووڵێ برد ، هەرکەس هات قڵاپەچیەێگ جیاوازەو کرد، ئێرنگە خوەمان بۊمنەسه لاێە و خاوارە و گورچێ گا و یەک کوشیمن! خوەزێەو گشتێ بۊنه یەکێ ، یەکەگەیش وا بوەیدەێ!
خوەر دەس و نەێزەێ له زەۊا هێز گرتۊد!
باوەمیر هوورەچڕ، لە گوڵ سووا، د پرووقەی چڕی. له بان چیاێ بەرز دیەکە بڕێ دۊیەت و کوڕە کورپە، دەس یەک گرتۊن و دەسماڵ خڕدان و ئاواز خوەنین و چووپی کیشان! لە دۊر دۊرا وا دەنگ دێوڵ وەل خوەێیا هاورد.
تەمەلۊل پا تاوەێ کۊیەسان داپوشاۊد…
[۱]– گشاد گشاد راه رفتن
