وەرگێڕ : مەریەم ئەمینی
خوولیو كورتاسار
له وڵات«برووسڵ» ژیانێ ده‌س پێ‌كرد. ناونیشان كورتاسار له جەهان دیارییه. له ساڵ ۱۹۴۴ – ۱۹۴۵ بۊیه گریلا. شێوه‌‌‌ێ نۊسان كورتاسار فره سه‌خت و پێچه‌ڵپێچه. شێوه‌‌‌ێ ساده‌‌ێگ نه‌ێرێد و هه‌م له چیرووك و هه‌میش له رۆمان ناسیاگه. «ئمته‌هان ئاخر» ناسراو ترین رومانێیه. تۊیه‌نم بۊشم كورتاسار وهێ رۆمانه فره‌تر ناسنه‌‌‌ێ. له ناو گه‌ورا ترین رۆمانه‌یل دنیا «ئمته‌هان ئاخر» جێگه‌ێ دیاریێگ دێرێد ك كورتاسار لهێ رۆمانه نموونه‌‌‌ێ یهێ رۆمان پۆست مۆدڕن وه دنیا ناسانێیه.
په‌ێاپه‌ێ پارك
یه چه‌ن رووژه ده‌س كردێیه‌سه خوهنین ئێ رۆمانه. له ناو رووژ هه‌ر كه‌شه یهێ جار كتاوه‌گه‌‌ێ نه‌ێده زه‌ۊ تا وه كاره‌یل رووژانه‌ێ بڕه‌سێد. ههگ داجمیا ک بچوود ئڕا ناو ئاوای، له ناو قه‌تاریش هه‌م چه‌وێ تره‌ك هه‌ڵاورده رۆمانه‌گه‌ێیا. وێنه‌ێ ئاێه‌مه‌یل ناو كتاوه‌گه و فیت‌فه‌نێیان ئڕا یهێ ته‌ته‌بوو پێس، له خوهنین سه‌ردێه‌و كرد.
وهێ ئێواره له دۊاێ یه‌گ نامه‌‌ێ ئڕا وه‌كیله‌گه‌‌ێ نۊسا و قه‌ێرێگ له سه‌ر كراێه‌‌ێ زه‌ۊ وه‌ل پاکاره‌گه‌ێیا چه‌ق‌په‌ڵ كرد، هه‌م له بێده‌نگی دیواخانه‌گه ك وراێوه‌ر پاركێ پڕ له دار به‌ڕۊ بۊ، چێ ئه‌وسه‌ر كتاوه‌گه و نیشته سه‌ر سه‌نده‌لی راهه‌تیێگ. قه‌ێرفره‌ێگ ده‌س سایه بان مه‌خمه‌ڵ سه‌ونزسه‌نده‌لیه‌گه‌ێیا و ده‌س كرده خوهنین. بێ‌یه‌گ ته‌قه‌‌لاێ بكه‌ێد گله گله ناو ئاێه‌مه‌گان و شێوه‌ێان هاتنه وه‌ر چه‌وێیا و په‌ژاره و خه‌‌ێاڵات داگرتنه‌ێ. چمان له‌زه‌ت دا پێ، له‌زه‌تێ پڕ له وه‌ره‌لایی و سه‌ره‌‌هه‌رزی تا بچووده ناخ كتاوه‌گه و هێڵ وه هێل ژێر و بانێ بكه‌ێدن و بنچه‌كێ درارێ. چییه پشتا و ته‌ك دا سه‌نده‌لییه‌گه‌‌وه تا ته‌ز سه‌ر و ملێ له بانمه‌خمه‌‌ڵه‌گه‌‌ێ ده‌رچوود و سیكاره‌گه‌‌یش گوڕان له ناو كلكێ رووشن بۊاد و گوڕ گرت.
كه‌مێ له ئه‌ولاترپه‌نجه‌ره‌گان، وا پساێ داربه‌ڕۊه‌گان شه‌كنێد و یه‌ۊ وشه وه وشه چیرووكه‌گه په‌ێجوور كه‌‌ێد و چیه‌سه ناو ناخ ئێ گه‌په‌و تا بزانێ ئاێه‌مه‌یلناو كتاوه‌گه تا كوو به‌نه‌‌‌ێ و بۊیه‌سه ته‌نیا ڕێوار گووشه‌ته‌قه‌‌ێ تا شاهد دیداردۊاینێگ له ناو كووڵاێگ له دڵ كۊیه‌سان بوود.
یه‌كم جار ژنێ وه سه‌ر و پاێ په‌‌تی، ئێكه‌ش پیاگه‌ێ دڵخوازێ ک له شوونزامێ له ده‌مچه‌وێ خۊن تكێد، تیه‌نه‌و ناو. ژنه تێد وره‌و پێ تا شوونزامه‌گه‌ێ ماچ بكه‌ێد. وڵام پیا نیە‌یلێد. چمان نیه‌توواێ ئێ تامه‌زرووشاوه‌تیانه ك هه‌میشه هه‌ر وه دزییه‌و خه‌ریكێ بۊنه، له ناوهێن ئێ دارسان وشکه جارێ تر نیشانێ بێیه‌ن. ژن وڵكه‌ر نه‌ۊ. هناسه‌بڕه‌كی قسیه‌گانێان هه‌ر هه‌یتاهه‌یت له بانپه‌‌ڕ‌‌‌ه‌‌ێ كتاوه‌گه هات و چوو كرد. تا سه‌ره‌نجام ژن ده‌س خوهێ خس و وه لار و له‌نجه نه‌رمپیا كرد و قامه‌تێ چه‌مان. پیاگه‌یش چمانێ خودا خه‌ریكێ كردۊد. چه‌قوه‌گه‌‌ێ ده‌سێ ك له خوه‌‌ێیا ئڕا كوشتن هاوردۊده‌‌ێ له ده‌سێ سڕ برد و له‌ش پێس هه‌ر دووانێان شله‌و بۊ. هه‌رسه‌ێ هیچ كامێیان گه‌نه‌كاریه‌گانێان له هۊریانه‌و نه‌چۊد؛ كارێان جووری چێه‌و سه‌ر ك چمان هه‌ر له ئه‌وه‌ڵا ئڕا یه نۊشتۊنه‌و یه‌ك. ههگ له ده‌ر كووڵاگه له یه‌ك جیاوه بۊن هڵاێه ده‌م سوو بۊ. ژن وه هه‌ڵه‌په‌ڵه وه کوڵبڕێگا ك وه‌ر‌و باشوور چوود، كه‌فته رێیا و پیاگه‌یش گڕێ نووڕسه گیس په‌شێو ژن و رێ خوهێ گرته‌‌وه‌ر و له ناوهێن گژ و گیا و ته‌م و مژ شه‌وه‌كی رێ ماڵ كرده دی. ئه‌و ده‌مه ته‌نانه‌‌ت گه‌ماڵه‌گانیش خه‌فتۊن و سووسه لێانه‌و نات. پاكاره‌‌گه‌یشێ لهێ وه‌خته له ماڵ خوهێ بۊ، له پله‌گان چێه‌و بان و له ناكاوا ده‌نگ ژنێ ئه‌ژنه‌فت، هه‌ڵپڕۊچگانه‌‌ۊ و بێ‌‌هه‌وڵا پا نا ناو ماڵه‌گه. یه‌كم جی مێمانداری و ئێكه‌ش راڕه‌و و راپله‌‌ێ فه‌رش كریاێ و دو دیم ك كه‌س له تێان نه‌ۊ ، ده‌ر دیواخان داده‌و. چه‌قووه‌گه‌یش هێمان له ناو ده‌سێ بۊ . چه‌وێ هه‌ڵاورده ناو دیواخانه‌گه‌‌ێا، رووشنای په‌نجه‌ره‌گان و سه‌نده‌لیێگ له مه‌خمه‌ڵ سه‌وز و پیاگێ ك خه‌ریك روومان خوهنین بۊ.
