وەرگیڕان چیرۆک

په‌ێاپه‌ێ پارک – نۊسەر : خوولیو کورتاسار

وەرگێڕ : مەریەم ئەمینی

 

  خوولیو کورتاسار

له وڵات‌«برووسڵ» ژیانێ ده‌س پێ‌کرد. ناونیشان کورتاسار له‌ جەهان دیارییه‌. له‌ ساڵ ۱۹۴۴ – ۱۹۴۵ بۊیه‌ گریلا. شێوه‌‌‌ێ نۊسان کورتاسار فره‌ سه‌خت و پێچه‌ڵپێچه. شێوه‌‌‌ێ ساده‌‌ێگ نه‌ێرێد و هه‌م له‌ چیرووک و هه‌میش له‌ رۆمان ناسیاگه‌. «ئمته‌هان ئاخر» ناسراو ترین رومانێیه‌.‌ تۊیه‌نم بۊشم کورتاسار وه‌‌‌ێ رۆمانه‌ فره‌تر ناسنه‌‌‌ێ. له‌ ناو گه‌ورا ترین رۆمانه‌یل دنیا «ئمته‌هان ئاخر» جێگه‌ێ دیاریێگ دێرێد ک کورتاسار له‌‌‌ێ رۆمانه‌ نموونه‌‌‌ێ یه‌‌‌‌‌ێ رۆمان پۆست مۆدڕن وه‌ دنیا ناسانێیه‌.

په‌ێاپه‌ێ پارک

یه‌ چه‌ن رووژه‌ ده‌س کردێیه‌سه‌ خوه‌نین ئێ رۆمانه‌. له‌ ناو رووژ هه‌ر که‌شه‌ یه‌ێ جار کتاوه‌گه‌‌ێ نه‌ێده‌ زه‌ۊ تا وه‌ کاره‌یل رووژانه‌ێ بڕه‌سێد. هه‌‌گ داجمیا ک بچوود ئڕا ناو ئاوای، له‌ ناو قه‌تاریش هه‌م چه‌وێ تره‌ک هه‌ڵاورده‌ رۆمانه‌گه‌ێیا. وێنه‌ێ ئاێه‌مه‌یل ناو کتاوه‌گه‌ و فیت‌فه‌نێیان ئڕا یه‌ێ ته‌ته‌بوو پێس، له‌ خوه‌نین سه‌ردێه‌و کرد.

وه‌‌ێ ئێواره‌ له‌ دۊاێ یه‌گ نامه‌‌ێ ئڕا وه‌کیله‌گه‌‌ێ نۊسا و قه‌ێرێگ له‌ سه‌ر کراێه‌‌ێ زه‌ۊ وه‌ل پاکاره‌گه‌ێیا چه‌ق‌په‌ڵ کرد، هه‌م له‌ بێده‌نگی دیواخانه‌گه‌ ک وراێوه‌ر پارکێ پڕ له‌ دار به‌ڕۊ بۊ، چێ ئه‌وسه‌ر کتاوه‌گه‌‌‌ و نیشته‌ سه‌ر سه‌نده‌لی راهه‌تیێگ. قه‌ێرفره‌ێگ ده‌س سایه‌ بان مه‌خمه‌ڵ سه‌ونزسه‌نده‌لیه‌گه‌ێیا و ده‌س کرده‌ خوه‌‌نین. بێ‌یه‌گ ته‌قه‌‌لاێ بکه‌ێد گله‌ گله‌ ناو ئاێه‌مه‌گان و شێوه‌ێان هاتنه وه‌ر چه‌وێیا و په‌ژاره‌ و خه‌‌ێاڵات داگرتنه‌ێ. چمان له‌زه‌ت دا پێ، له‌زه‌تێ پڕ له‌ وه‌ره‌لایی و سه‌ره‌‌هه‌رزی تا بچووده‌ ناخ کتاوه‌گه‌ و هێڵ وه‌ هێل ژێر و بانێ بکه‌ێدن و بنچه‌کێ درارێ. چییه‌ پشتا و ته‌ک دا سه‌نده‌لییه‌گه‌‌وه‌ تا ته‌ز سه‌ر و ملێ له‌ بانمه‌خمه‌‌ڵه‌گه‌‌ێ ده‌رچوود و سیکاره‌گه‌‌یش گوڕان له‌ ناو کلکێ رووشن بۊاد و گوڕ گرت.

که‌مێ له‌ ئه‌ولاترپه‌نجه‌ره‌گان، وا پساێ داربه‌ڕۊه‌گان شه‌کنێد و یه‌ۊ وشه وه‌‌ وشه‌ چیرووکه‌گه‌ په‌ێجوور که‌‌ێد و چیه‌سه‌ ناو ناخ ئێ گه‌په‌و تا بزانێ ئاێه‌مه‌یلناو کتاوه‌گه‌ تا کوو به‌نه‌‌‌ێ‌ و بۊیه‌سه‌ ته‌نیا ڕێوار گووشه‌ته‌قه‌‌ێ تا شاهد دیداردۊاینێگ له‌ ناو کووڵاێگ له‌ دڵ کۊیه‌سان بوود.

یه‌کم جار ژنێ وه‌ سه‌ر و پاێ په‌‌تی، ئێکه‌ش پیاگه‌ێ دڵخوازێ ک له‌ شوونزامێ له‌ ده‌مچه‌وێ خۊن تکێد، تیه‌نه‌و ناو. ژنه‌ تێد‌ وره‌و پێ تا شوونزامه‌گه‌ێ ماچ بکه‌ێد. وڵام پیا نیە‌یلێد. چمان نیه‌توواێ ئێ تامه‌زرووشاوه‌تیانه‌ ک هه‌میشه‌ هه‌ر وه‌ دزییه‌و خه‌ریکێ بۊنه‌، له‌ ناوه‌ێن ئێ دارسان وشکه‌ جارێ تر نیشانێ بێیه‌ن. ژن وڵکه‌ر نه‌ۊ. هناسه‌بڕه‌کی قسیه‌گانێان هه‌ر هه‌یتاهه‌یت له‌ بانپه‌‌ڕ‌‌‌ه‌‌ێ کتاوه‌گه‌ هات و چوو کرد. تا سه‌ره‌نجام ژن ده‌س خوه‌‌ێ خس و وه‌ لار و له‌نجه‌ نه‌رمپیا کرد و قامه‌تێ چه‌مان. پیاگه‌یش چمانێ خودا خه‌ریکێ کردۊد. چه‌قوه‌گه‌‌ێ ده‌سێ ک له‌ خوه‌‌ێیا ئڕا کوشتن هاوردۊده‌‌ێ له‌ ده‌سێ سڕ برد و له‌ش پێس هه‌ر دووانێان شله‌و بۊ. هه‌رسه‌ێ هیچ کامێیان ‌ گه‌نه‌کاریه‌گانێان له‌ هۊریانه‌و نه‌چۊد؛ کارێان جووری چێه‌و سه‌ر ک چمان هه‌ر له ئه‌وه‌ڵا ئڕا یه‌‌ نۊشتۊنه‌و یه‌ک. هه‌گ له‌ ده‌ر کووڵاگه‌ له‌ یه‌ک جیاوه‌ بۊن هڵاێه‌ ده‌م سوو بۊ. ژن وه‌ هه‌ڵه‌په‌ڵه‌ وه‌ کوڵبڕێگا ک وه‌ر‌و باشوور چوود، که‌فته‌ رێیا و پیاگه‌یش گڕێ نووڕسه‌ گیس په‌شێو ژن و رێ خوه‌ێ گرته‌‌وه‌ر و له‌ ناوه‌‌ێن گژ و گیا و ته‌م و مژ شه‌وه‌کی رێ ماڵ کرده‌ دی. ئه‌و ده‌مه‌ ته‌نانه‌‌ت گه‌ماڵه‌گانیش خه‌فتۊن و سووسه‌ لێانه‌و نات. پاکاره‌‌گه‌یشێ له‌ێ وه‌خته‌ له‌ ماڵ خوه‌ێ بۊ، له‌ پله‌گان چێه‌و بان و له‌ ناکاوا ده‌نگ ژنێ ئه‌ژنه‌فت، هه‌ڵپڕۊچگانه‌‌ۊ و بێ‌‌هه‌وڵا پا نا ناو ماڵه‌گه‌. یه‌کم جی مێمانداری و ئێکه‌ش راڕه‌و و راپله‌‌ێ فه‌رش کریاێ و دو دیم ک که‌س له‌ تێان نه‌ۊ ، ده‌ر دیواخان داده‌و. چه‌قووه‌گه‌یش هێمان له‌ ناو ده‌سێ بۊ . چه‌وێ هه‌ڵاورده‌ ناو دیواخانه‌گه‌‌ێا، رووشنای په‌نجه‌ره‌گان و سه‌نده‌لیێگ له‌ مه‌خمه‌ڵ سه‌وز و پیاگێ ک خه‌ریک روومان خوه‌نین بۊ.

نوشته های مشابه

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

دکمه بازگشت به بالا