گەشتییا مرنێ! – عەبدۆڕەحمان بامەرنی
هسارە : بیست و پێنج هزار دولار، هەر کەسەک دێ بیست و پێنج هزار دولاران دەت، ئەڤە من چەند جار دوبارە کر! ئەڤ دوبارەکرنا وی ژ بەر وێ ژنا گەنج بو، ئەوا برایێ وێ دگەل دا و هەر داخاز دکر، چەند سەد دولارەکان بۆ برایێ من بهێلە، دا بشێت تا سنۆرێ وەلاتی ڤەگەریت و چ دی داخازا کێمکرنا پارێ سیاربۆنا گەشتیێ ژێنەکەت. ژ بەریکا خوە، من دوو سەد دولار کرنە ددەستێ برایێ وێ دا و من گۆتە قەچاخچی، درەنگە مە برێ بێخە؟ ئەڤە ژی نە ژبەرکو ئەو ژن یا جوان و جەحێل بۆ و دێ دڤێ سەفەرێ دا، خوە نزیکی من کەت یان دلێ من مابیتە ب برایێ وێڤە، کۆ ل کۆلانێن ڤی وەلاتێ بیانی، نە کەڤیتە سەرجاددان. بتنێ هەر روژەکا گیرۆبونا مە و تا قەچاخچیەکێ دی بدەست دکەڤیت، ئەم گەلەک پاران ل هوتێل و خارنگەهان دمەزێخین و ئەڤە ژبلی خوە ڤەشارتنا مە ژ پۆلیسان.
ئەم ل گەشتیێ سیاربوین و مە دا بەحرێ. سێ جاران ئەم نزیکی سنورێن یونانێ دبوین و قەچاخچی بهێجەتا پولیسێن زێرەڤانیا سنۆری دکەن، ئەم دڤەگەراندینە نیڤا بەحرێ ڤە. دوماهی جار، ئەڤێن دنیڤا گەشتیێ دا، دەست بقیژییا کرن و نیڤا گەشتیا مە تژی ئاڤ بۆ. هندا دەست ب لاڤاکرن و هیڤیێن خوە گەهاندنە بەر پەرێن عەسمانی و هندان دەست بهەوارهاتنێ کرن و هندان ژی ب چ تشتێ ل بەر دەست، بهەمی هێزا خوە ئاڤ ژ گەشتیێ ڤالا دکرن. بتنێ قاچاخچی نەبیت، چۆخکێ سەرئاڤ بونێ ب سەر ملێن خوە داگرت و عەسلی ل پشتا خوە شداند و خوە سەرنشیڤی ئاڤێ کر.
گەشتی نقومی ئاڤێ دبۆ و هەر کەسێ چۆخک ل پشتێ، ب سەر ئاڤێ کەت و یێن وەک من بێ چۆخک و ئەڤێن دانعەمر و زارۆک، کەتنە لاڤەلاڤێ و من ئەو هێلان و خوە هاڤێتە چۆخکێ قەچاخچی، من ملێن وی گرتن و ئەز و ئەو پێکڤە بن ئاڤ بوین. ژبلی بزاڤا سەرئاڤ بونێ، ئەوی ب پێهنا و هەر هێزا د لەشی دا هەی، ئەز ژ خوە ددامە پاش. ژ من و ژ وی! من چۆخکێ وی بەرنەدا و من نەهێلا سەرێ وی سەرئاڤ بیت و چپکا هەوای بگەهیتە ناڤ سیهێن وی. تا ژ بێهنێ مالق بویی و وەکی ئاڤا دەریایی لێ هاتی و تەزیتر. من چۆخکێ وی دسەردا ئیناخارێ و ل سەر ئاڤ بونێ، رەخ و دۆرێن من هەمی یێن بوینە کەلەخ و وەکی مریشکێن مرار، سەرێن وان یێن کەتینە سەر ملێن وان. مانا مە دۆێ ئاڤا تەزی و وێ شەڤ تاریێ دا، زێدەتر ژ چەند سەعەتان ڤەکێشا و گەشتیەکا رزگارکرنێ، ئەم یێن ساخ و نیڤ ساخ و کەلەخێن مری ژ ئاڤێ دەرئێخستین.
هێشتا قەچاخچی یێ دبێژیت، هەر کەسێ سەفەرێ بکەت، چ مەزن چ زاروک بیت، دڤێت بیست و پێنج هزار دولاران بدەت و ئەو ژنا گەنجا جەحێل یا بدەڤ و لێڤێن وی ڤە بویە میچرک، بەلکویە، کێمتر پارەی ژوێ وەرگبریت، دا برایێ وێ ڤەگەریت وەلاتی ڤە. ژ بەریکا خوە من دوو سەد دولار کرنە ددەستێ برایێ وێ دا و من گوتە قەچاخچی، درەنگە، گەشتیێ ب رێ بێخە؟ ئەڤە ژی، نە ژبەرکو ئەو ژن یا جوان و جەحێل بو و دێ دڤێ سەفەرێ دا، خوە نزیکی من کەت یان دلێ من مابیتە ب برایێ وێڤە، کو ل کولانێن ڤی وەلاتێ بیانی نە کەڤیتە سەرجاددان. بتنێ ئەز دزانم ئەڤە سەفەرا مریانە و ئەڤێن لدوورێن ڤێ گەشتیێ خرڤەبوین، ساخ و نیڤ ساخ و مری دهاتنە بەرچاڤێن من.
سەرچەوە : ئەنجومەنی ئەدەبیی بۆکان
