مەڵک عالی، گونی لۊل کریاێگ وە ناو گیرفان گەوراێ ئورکوتەگەێ کیشا دەیشت. وازێ کرد و تەکانەێ: «کاکەت وتێیه بام تۊتگەگاند بووەم».
ئەو هەفتەگە «بازە» چەکیا و شەش لفانە هاورد. پاشا یەکێگێیان جیا کرد، ک ڕەنگێ وەگەرد تۊتگەگان‌ترا فەرخ کردیا. ناوێ نا «بوورە». ناتواست بوورە بەێە مەڵک عالی، ک بوەدەێ شار بفروشێدەێ. چییە ناو تەۊلە، پاشایش وە دۊیاێ چی.
بازە، گورگەخەوێ کرد، تۊتەگانیش وە ژێر زگێ جم و جۊلێیان بۊ و مەمگ پڕ لە شیرێ مژیان. وەگەرد زوان قرمزێ لیسیادێیان، ئەوانیش گل خواردیانە بان يەک. تا چاوێ کەفتە مەڵک عالی وسا بان دەس و هەپ هەپ کرد. مەڵک عالی یەێ گام چییە دوما:
«چخە… چخ چخ ….»!
بازە دوجارە ڕمیا. دەنگ نۊزە نۊز تۊتەگان، قاتی بۊیە ناو یەک. تەۊلە بوو لاس و کەێ دیا. لیسک خوەر کەم ڕەنگێ وە لاێ دەرز دەروەچەگان خواردیا بان بازه و کوڵک لەشێ وە ژیر نۊر، بریق باق کردیا.
مەڵک عالی دەر گونیەگە وا کرد. یەێ گلە وە تۊتەگان وە ژێر زگ بازە کیشا دەیشت. قولەیلێ وە تەناف بەسا.
پاشا چاوێ کەفتە چەکمەیل چەرمێ مەڵک عالی ک هشک لە هەڕگ بۊ، وت: «وە شار خۊن وارێ، هەمیشان چەکمەگانت و گونییەگەت پڕ بانێ لەکەێ خۊنە»؟
مەڵک عالی دەنگ نەکرد. یە تۊتگ تر وە ژێر مەمگ بازە کیشا دەیشت. تۊتگ نۊزە نۊز کرد، شیر وه گوشەێ دەمێ چکیا بان پۊزەێ ڕەشێ.
پاشا فکر کرد ئەڕا چەکمەێ ڕەش ناکەێە پاێ، جوور مێرزا مراێ کە وە ناو گاداری کار کردیا.
نەوبەێ بوورە بۊ. تا دەس برد هێزێ بەێ، پاشا دەس نا بان دەسێ: «ئێ یەێ گلە، توام خوەم، گەوراێ بکەم».بازە، بورە بوو کرد و لسیێ. تا مەڵک عالی دەس بردە نوا، هێز گرت و گەڤان.
مەڵک عالی دەسێ کیشا دوما. کەێ وە گوشەێ دەمێ بی، تف کرد و خەنی، دنانەیل چەفت و چڵ و ڕەشێ کەفتە دەیشت. دەم بووگەنێ داچەقان و وت: «کاکەت زۊتر پۊلێیان سەندیە».
مەڵک عالی پاڵ دا گونی یونجەگان.
تۊتەگان وە ناو گونی نۊزە نۊز کردیان. لەێ وەختە مانگاێگیش قووڕان. چەن مەلۊچک کە وە ناو کوناێ دیوارەکە کولانە کردۊن هەڵفڕینە دەیشت و مەڵک عالی هێمان بێ دەنگ بی. وە یەواش دەس بردە ئەڕا بوورە و گرتەێ باوش. بازە فەقەت نووڕییە پێ. وەفراو وه بان تیرچووگان ڕشیا ملێ، سەر خوەێ چەن جار شەکانەو.
مەڵک عالی، پایەخ بوورە کرد و خستەێ ناو گونی و دەرێ بەسا و نایەێ نەر شان و لە تەۊلە دا دەیشت. بازە وە شوونێ کردەێ گەڤانن: هەپ هەپ.
پاشا، هاڵێ گیریا. شەش ساڵ، لێ گەوراتر بۊ. زووریش پێ نەڕەسیا. ژنەفتۊ وەختێ مەڵک عالی، هەشت ساڵێ بۊیە گەماڵەیل “بێڵەهوو” پەلامارێ دانە و یەێ گوشێ خووڵوماننە. وەو تاریخەو دی نەچیەسە مەدرەسە. کەمتریش وە ناو بێڵەهوو، خڕخواردێە. گەوراتر کە بۊیە کارێ بۊیەسە کوڵەگرتن لە دەڵەگان تا بچەکن. نەیشتێیە تۊڵەگان، چاو واکەن، پۊلێیان دەێا و بردێانە شار و فورشتیادێیان. هەر جار دەڵێگ چەکیا، تۊتەگانێ بردیا شار و تا چەن وەخت خەوەرێگ، لێ نەۊ.
مەڵک عالی تا پاێ وە تەۊلە نا دەیشت، بازە کەفتە شوونێ. پاشایش، داس سۊک تەۊلە هەڵگرت و چییە دەیشت و وت: «بازە، وە سەور بچوو. بزانێ هایتە شوونێ تووپنێگەت».
بازە جوور زوان فام، یەواشتر چی.
مەڵک عالی وە دۊرەو دیار بۊ. تازە ڕەسیە سەر جادە. پاشا فکر کرد وەگەرد مینی بوس چودە ئەڕا شار. وەلێ چێیە ئەو سەر جادە و لە دارسان بەڕۊگان نوقمەو بۊ.
ئاسمانیش بۊیە هەور و وەفرەلۊل. پاشا کڵاوەگەێ کیشا بان گووشەیلێ و واێە شوون بازە. چینە ئەو دەس جادە بازە وسا، خوەێ لەقانەو. وەفرگان بان لەشێ تەکان. بوو کیشا، سەر لە نوو کەفتە ڕێ. شوون پایل بۊچکێ مەنیادە بان وەفرەگان.
وە نواتر جی پاێ گەوراێگ بۊ کە مەنیادە قەور مناڵ. پاشا چەکمە چەرمێیەگان مەڵک عالی هاتە وەر چاوێ.
وە سەختی توانستن وە ناو تەم و وەفر بچنە بان کۊیە. ڕەسینە پیرە بەڕۊێ. بازە هەم پا شل کرد. پاشایش وسا و نووڕیە پێ. بازە زوانێ شووڕەو بۊ تا بان قەپووزێ. هەناسەبڕ بۊ و هڵم چۊ هەور وە دەم و لۊتێ دەێا دەیشت. چاوێ کەفتە کوڵمان نەچیرەوانەگان. هیکەێ خەنەێ مەڵک عالی تا ئەورە هاتیا. بازە ڕێ چەفتەو کرد. پاشا پا نیا جی پاێەیل بۊچک بازە.
وەفر تا زرانی بازە هاتیا. وە سەختی چیا نوا. هەر جار کە دەس و پاێ چیا ناو وەفر، دۊمێ چەمیادە چەپ و ڕاس.
جوورێ چیین کە سەر وە پێشت کوڵمان دەرهاوردن. پاشا خوەێ شاردە پشت چیلگەگان لاێ کوڵمان. یەێ بنگز وەفر وە بانێ بۊ. بوو نمرچ چوو تەڕ، لۊتێ پڕ کرد. بازەیش هاتە لاێ، دەم پۊزێ ساێە قەێ پاشا.
پاشا وە دزی سەر کیشا، دی مەڵک عالی وە ناو ئەو تەم و وەفرە، تەور وە دەس وساسە کەش قوتەرەێ بەڕۊێ. وە ئەو دەسەێ یەێ گلە، وە تۊتەگان وە ناو گونی کیشا دەیشت. سەر تۊتەگە بردە نزیک دەمێ، گووشێ کردە دەم و وە یەێ چڕکە، قەپ کردە پێیا. نۊزە نۊز تۊتەگە پێچیا. گووش کەنیای کە وە ناو دەمێ بۊ تفێ کردە زەۊ. خۊن دەمێ وەگەرد پشت دەس پاکەو کرد. سەر تۊتەگە نا بان قوتەرە. تەورەگە بردە بان، بتەو کوتا بان ملێ. سەر بۊچک ڕەشێ فڕە بەسا و خۊن پاشریا زەۊ. ئمجا لاشەێ تۊلەێ، خستە خوار.
پاشا، کەفتە ویر مێرزا مراێ، وە پێ وتۊ: تۊتەگاندان نەفروشنە ئی گووش بڕیایە. وتۊ: مەڵک عالی تواێ چین گەماڵ، وە ناو بێڵەهوو لابوەێ.
سەر لە نوو، دەس بردە ناو گونیەگە. بوورە هاوردە دەیشت. تا تواست گووشێ بوەێدە دەم، بازە گەڤان و هەڵامات مەڵک عالی دا.
مەڵک عالی سەر وە لێ شێویا. تەور وە دەسی کەفت. بوورە فڕە دا زەۊ. بازە قەپ قەپ کرد و پێچیانە ناو يەک. دەنگ خرمە خرم بازە و دەنگ قیڕە قیڕ مەڵک عالی، تەنیا دەنگ کۊیەسان بۊ.
پاشا، چاوێ کەفتە بریقەێ چەقوگەێ مەڵک عالی، کە وە گیرفانی کیشا دەیشت. وە قینەو دەسەێ داسەگە جەڕان و لە پشت کوڵمان هاتە دەیشت. نووڕیە گووشەیل کەنیای بان زەۊ. ڕەشی گووش و قرمزی خۊن وە بان وەفر بریقە دیا…
